拍拖唔使日日見嘅～下下放閃你唔厭，我都悶啦！難得啱啱先由地獄升返上人間，今日我依莉詩就約咗個舊行家放工後去焱丸水產銅鑼灣新分店聚一聚，慶祝大家轉工成功，啤一啤！
日式佈置悠閒舒適
朋友話上網見到呢間裝修十足十日本著名嘅浜燒店磯丸水產，所以就帶我去試下。呢間焱丸水產裝潢好有日式風格，木質裝潢加上紅藍色燈籠同日本掛畫，真係好似去咗日本一樣。餐廳坐位分 3種，除咗普通嘅枱，仲有 bar 枱同 VIP 室，我哋得兩個人，所以就安排坐 bar 枱，感覺自成一角，可以放鬆地吞苦水 ！雖然每張枱都有個電爐，不過都唔會話有韓燒果種油煙味，反而會有陣陣烤海鮮嘅香味。
▲ 日式掛畫配合木牆好有日本 feel。
▲ VIP 室就睇落幾舒服，幾個朋友圍埋吹水，應該將一天辛勞忘記。
生猛海鮮即燒即食
嚟得呢度當然要食浜燒、貝燒海鮮，原來呢度仲有刺身、壽司、沙律、天婦羅同鍋物，食物種類都幾多。至於飲品就有各種燒酌同梳打。平時少入廚嘅我，見住啲海鮮真係唔知幾時熟，好彩啲店員見到唔對路都會出手相助，而且會教我哋點燒先啱。
▲ 蟹味噌甲羅燒 ($68)
蟹味噌甲羅燒 係呢度招牌菜，入面有松葉蟹膏、蟹肉、蟹籽、鵪鶉蛋、香蔥等，貌相一流。不過燒嘅時候就要攪勻晒，所以要影相就襯未燒之前影啦！平時一隻蟹都未必有咁多蟹膏，今次一匙匙咁食，濃郁嘅蟹膏食落齒頰留香，配合爽脆蟹籽，增加多點口感。不過食多幾啖有啲膩，而且比較濃味，我建議最後先食，作一餐嘅總結。
▲ 雪場蟹磯燒 $95
坦白講，呢味雪場蟹腳真係有啲貴，一隻腳已經成舊水。起初幻想會好似係蟹道樂嘅燒蟹腳咁，外層香口，內裡爽軟有海水味。可惜唔知係咪自己燒得唔好，唔單止無海水味，仲大部份蟹肉都痴住個殻，無乜肉食。
▲ 芝士魚旦 $35
芝士魚旦呢個當然係保險之選，軟滑芝士溶係魚旦內，一咬輕輕擠入口腔，好滿足呢！
▲汁燒魚翅 $48
魚翅都可以燒真係好特別，原來燒完嘅魚翅好似魷魚乾咁，好有咬口，掃上燒汁好非常惹味，係好好嘅佐酒小食。
燒魷魚好似好普通，不過又大隻又厚肉，夾埋燒汁一齊燒，香香甜甜。
▲ 三文魚什菇牛油燒 $48
牛油燒用錫紙盤裝住，好有 BBQ 感覺，食落有濃濃黑椒味，菇十分爽口。
炸雞本來應該無萬無一失嘅菜式，可惜呢碟炸得有啲乾，再食嘅興趣不大。下次有機會再嚟都係叫返海鮮比較好。
依莉詩 ：「貴！但偶然都要慰勞下自己」
浜燒店最正就係即場泡製，有得食有得玩，份外有氣氛。不過呢間價錢有啲貴，兩個人就食咗六百幾蚊，好肉痛呢！不過，平時咁辛苦，偶然都要慰勞下自己嘅。同朋友可以輕輕鬆鬆吹下水，盡情釋放壓力。但女人心海底針，口講生活上點點點，食完餐飯一出門口，朋友嘅未婚夫就接走咗佢了。內心突然有陣酸味，鬼叫自己住屯門咩!?
焱丸水產
地點 ：銅鑼灣謝斐道440號駱克大廈B座地下C2地舖