未出發先興奮
一入到 PMQ 就見到兩大個人頭氣球浮係 PMQ 中庭。因為係黃昏時份，呈現出陰深趣異嘅氣氛。對於伊藤潤二漫畫一知半解嘅我，未出發已經充滿恐怖幻想，又要驚又要睇。相反睇晒成套《富江》嘅餵蚊，外表就顯得好冷靜！
▲ 入去之前，長長嘅走神印有多幅恐怖漫畫，開始感受到伊藤潤二嘅漫畫並唔係單純驚嚇嘔心咁簡單，而係慢慢散發出嚟果種毛骨悚然。
AR 恐怖漫畫動起來
第一站係係台北站已經展示過嘅「恐怖漫畫動起來」，利用 AR實境技術將一幅幅經典漫畫場景以立體方式呈現。漩渦就好似撲向你，加埋尖叫聲，恐怖感幾倍級數上升。提提大家入場前記得用 PMQ 免費 Wi-Fi down 定「伊藤潤二AR」APP，免得入場後先手忙腳亂啊！
▲ 利用現場借用嘅 VR 眼鏡觀看，人頭氣球就會隨隨升起，十分趣異。
▲ 展區中間仲有個富江人偶係度等你。
真人角色呈現現前
到第二區，《富江》女主角實體模型坐係水缸中間，配合懸疑音樂同燈光就好似兇案現場一齊。旁邊仲循環播放住真人版「富江」短片，令呢個不斷被情人分屍卻能再生繁殖嘅恐怖少女進一步實體化！
▲ 富江、雙一等以往只係漫畫出現嘅角色，展覽中就有機會見到實體了！
恐怖元素融入香港場景
上年伊藤來港宣傳嘅時候，佢順道為香港站展覽取材創作，所以第三個區就係香港獨家專區，將經典人物與廟街、維多利亞港等結合成畫，就連富豪雪糕車都有添！將童年回憶砌底改寫。
香港站獨有公開手稿
第 4區就係粉絲必定著迷嘅珍藏手稿展，當中更有首次公開展出嘅 10張《魔之碎片》手稿、《富夫：紅色高領衫》、《緩慢的告別》、《解剖妹》同《黑鳥》等，手稿上有伊藤嘅手寫對白同筆迹，就連塗改液修改痕跡宦清楚睇到，非常值得細心欣賞。
成為人頭氣球主角
最尾一站更入咗互動元素，大家可以到預時間排隊試玩「人頭氣球恐怖拍照亭」，拍攝 3張連續相片就可以製作專屬的「人頭氣球」漫畫頁面，成為恐怖漫畫主角。不過佢預設咗係兩個人玩，所以入去前記得搵定拍擋啦！
▲ 就好似影貼紙相咁，連續影 3張！
▲ 即時就會印出專屬嘅「人頭氣球」漫畫頁面啦！
展期限定精品
粉絲們當然唔會放過買精品嘅機會，今次最吸引嘅就係全球獨家嘅闇黑美學著色繪本，繪本內有今次展覽嘅作品，可以買返本留念。另外，仲有香港獨家嘅人頭氣頭發售添！
▲ 買唔到套票唔緊要，呢度都有第二款布袋賣，不過就係黑白色嘅。
▲ 恐怖角色徽章都幾恐怖架！
▲ 紙膠帶印有逐格漫畫，印花好細緻，$40 可以買返卷收藏。
伊藤潤二恐怖美學體驗大展
日期：2017 年 2 月 6 日至 26 日
地點：PMQ 元創方地下
票價：套票 $200 （可獲贈一個香港限定人頭氣球布袋（非賣品），以及一個人頭氣球） 、門票 $100