一向係 Pop-up Café 迷嘅我依莉詩，知道上個月 Monchhichi Cafe 登陸朗豪坊之後一直心思思想去。可惜一路都無時間。開咗大半個月，終於得閒嚟食啦！
佈置以紙牌為主，影相位不多
無時間去澳門 Monchhichi 主題甜品店，點都要試下朗豪坊店有咩特別啦！今次 Monchhichi 其實同日式麵包輕食 Cafe 81番合，由 1月19 至 3月19日，橫跨新年同情人節大搞 Pop-up Cafe。不過，因為環境所限，睇落其實似露天茶座多過鋪頭，即使玻璃同枱都貼有可愛爆燈嘅 Monchhichi 貼紙，但都無嗰種被 Monchhichi 包圍嘅感覺。至於影相位方面，店外只有兩個半身嘅 Monchhichi 紙板公仔，未算太多。比較吸引就係，如果點肉眼扒餐，店員會免費幫你影張即影即有，留個紀念。
▲ 收銀下嘅 Monchhichi 待應打住煲呔好得意。
▲ 玻璃貼滿 Monchhichi 貼紙，不過樓底太高，無被 Monchhichi 包圍嘅感覺。
▲ 每張枱都有唔同嘅圖案，好有心思。
▲ 門口嘅樹掛滿 Monchhichi 同揮春，唔知係咪同風水有關呢？
食物質素高，態度需改善
既然係餐廳，食物梗係最重要。食物種類都幾多，多至飽肚嘅日式丼飯、漢堡扒，少至下午茶嘅輕食、麵包、甜品都有，而且大部份食品造型都好精緻。玉子燒鋪上 Monchhichi 五官嘅米紙，又或者麵包上印有Monchhichi 圖案，並非插旗仔咁簡單。今次因為嚟食午餐，所以叫咗漢堡扒同咖喱飯，以 Pop-up Cafe 嚟講算高質。最衰銀兩有限，唔係一定會食埋甜品。奇怪嘅係明明係星期日 lunch 時間，但就無乜人，除咗熱潮已過，我諗應該同員工態度有關，雖然無話咩正面衝突，但就係覺得佢哋無笑容，無去主題餐惑嘅喜悅。
▲ 熱辣辣鐵板漢堡扒 $78
▲ 吉列豬扒自家咖喱飯 $78
白飯圍住咖喱汁，再加上 Monchhichi 萌樣，貌相一流。雖然話係日式咖喱，不過都有少少辣，吉列豬扒外脆內軟，唔乾身，又有樣又好食。
精品專區以公仔為主
對 Monchhichi 粉絲嚟講，一定會儲唔同版本嘅 Monchhichi 公仔，而 Café 出面就有精品售賣專區，有大量不同款式嘅 Monchhichi 公仔比你揀，真係花多眼亂呢！
81 Ban Japanese Deli x Monchhichi Pop-up Café
日期：2017 年 1月 19日 至 3月 19日
地址：旺角朗豪坊 4樓 12號舖 81番
電話：3417 6034