話咁快又到年尾，回想起過去幾年，個人真係好摺，連呢個網都停咗落嚟，好似咩都無做過一樣！趁今個聖誕，眼見啲商場佈置返晒嚟，我都想出返嚟啦！
第一站我就去咗旺角 MOKO 新世紀廣場會一會好萌好可愛嘅 Duffy！今次嘅佈置好有心思，整個中庭化身聖誕星空小鎮，仲將香港迪士尼樂園嘅「奇妙夢想城堡」搬埋過嚟！Duffy 同佢嘅好朋友 ShellieMay、Gelatoni、StellaLou、CookieAnn、’Olu Mel ，仲有新朋友 LinaBell 都換晒冬日新裝，同大家慶祝聖誕！
近距離同 LinaBell 見面！
今次嘅主角之一梗係 LinaBell 啦！為咗大家過一個暖笠笠聖誕，佢已經悉心為5.8米高嘅聖誕樹屋繫上心愛嘅巨型粉紅色蝴蝶結同閃亮璀璨燈飾，仲乖乖聖誕樹下嘅木系小屋等你探佢！12月4日仲舉行「Duffy與LinaBell 聖誕見面會@MOKO」，唔洗入迪士尼都有機會同佢自拍！粉絲們記得留意商場社交平台嘅最新消息呀！
▲ LinaBell 已經坐喺梳化上等緊你！
4大特色小屋 Duffy & Friends 逐個捉！
除咗中間嘅小木屋，一眾可愛「萌」友亦分別喺 4間小屋，悉心為家居添上閃亮精緻嘅裝飾品！每間屋都好有冬日感，配色都好溫暖，又好似自成一角咁，超好影，記得帶埋自己嘅應援公仔去打卡呀！
▲ 換咗一身藍黃色冬日服裝嘅 Duffy，正在裝飾金光閃閃啲聖誕樹。
▲ ShellieMay 已經預備好大大小小嘅禮物，送上驚喜！
▲ StellaLou 正在勤加練習，準備喺聖誕舞會上表演！
▲ Gelatoni正舞動畫筆，勾畫出一個冬日森林飄雪世界。
「夢幻聖誕長廊」展出最新應援公仔服飾
行完星空小鎮，記得去埋 L1樓層嘅「夢幻聖誕長廊」！7位 Duffy & Friends 嘅應援公仔分別放喺唔同場景，仲最新冬日系列大晒冷！
▲ 好想帶佢哋返屋企！
▲ 穿上全新冬日服裝嘅軟綿綿「萌」友置身喺飄雪水晶球內，好夢幻呢！
迪士尼 Pop-Up store 帶晒 Duffy & Friends 返屋企
小鎮旁邊仲有 迪士尼 Pop-Up store，唔止有 Duffy & Friends 嘅最新產品，仲有其他迪士尼朋友嘅聖誕限量精品賣，一於入手佈置一下屋企啦！
▲ 搵嚟搵去到唔見 CookieAnn，原來佢喺嗰 pop-up store 瞓住呢！
▲ 連 LinaBell 精品都有！
▲ 買返隻聖誕襪放床頭先！
「Duffy and Friends: A Journey to Christmas Town」
日期：2022年11月19日至2023年1月8日
時間：上午10時至下午10時
地點：MOKO MTR樓層中庭及L1樓層走廊(近MARK FAST)