放閃過年初一！【大埔林村許願節】 美食 x 市集 x 許願

恭喜發財！新年又到啦！祝女嘅愈嚟愈靚，男嘅升職加薪，情侶們蜜運成功，最重要就係心想事成許咩願都成真！大年初一，我依莉詩同Raymond 就去咗林村許願節，許願、掃街兼行市集！

定必心想事成許願法

今年第二次去林村，比起上年範模大咗好多，延長到初十五都仲有嘢玩。除咗掟吉放水燈外，仲有手作市集同美食攤檔，可以玩足一日都唔悶呢！單單許願方法都多咗好多款呢！無論幾貪心，幾多願望都一定滿足到你！

▲ 呢得林村必做梗係掟吉同放水燈，今年套裝價同上年一樣，$50 有交易，一於賣個希望吧！

1) 掟吉求願法

大家都知，原本嘅許願樹比人掟得多已經就嚟枯，所以用嚟許願嘅都係假樹同膠吉。但唔理啦！咁難掟都畀你掟到上去，願望會成真嘅！

▲ 呢棵就係真．許願樹啦！雖然無晒枝，但都好大棵呢！

2) 放水燈祈福法

掟咗5、6次終於掟到上樹，之後就去放天燈，一朵朵蓮花係水上飄浮，都幾浪漫㗎！

▲ 哈哈～放完就好跑去河尾搵留啦，唔係就會畀人沒收了！▲ 唔知點解大部份水燈都無咗許願紙。

3) 日式掛馬牌

玩完傳統許願法，可以試下日式許願法，場內有幾棵假桃花樹，$20 買個「繪馬」許願牌就可以寫木牌許願，而最吸引係未許願先送你小小雞 Lego，仲有得抽獎中咖啡添！

▲ 木質嘅「繪馬」幾有特色，想就咁帶佢番屋企呢！

4) 免費許願寫紙仔

如果唔想畀錢又想許願，九巴幫到你，有幾個司機係到派紙仔畀你許願。係就係流流地，唔使錢就玩下吧！

5) 添丁點燈

圍村傳統，上一年有男丁出世嘅家庭都要點燈。雖然唔係人人有資格點，但就可以䏲點燈前嘅舞獅表演啦！

▲ 醒獅一邊吊盞燈上去，另一邊有人爬上去插電，超好笑！

橫掃二十多檔香噴噴美食

許完願就去掃街啦！今年有成廿幾檔小食，燒雞、羊架、串燒、炒雪糕乜都有，仲要重覆幾並唔多，所以都幾多選擇㗎！

▲ 台灣腸食得多，飛魚籽腸食過未呢？

▲ 呢串龍珠勁囉～超多人排隊！

▲而我最 like 就係呢隻應節嘅奧爾良烤雞。 $40 就有大大隻燒雞，好抵呢！ 啲味仲好得意，甜甜地鹹鹹地，少少辣，好吸引呢！
▲ 食肉獸嘅我，食完雞食羊架。香噴噴而且肉嫩唔膻。$38 就有 4件羊架超抵食！
▲ 金蠔肥嘟嘟好似好好味咁！
▲ 甜食仲有棉花糖、炒雪糕、雪糕泡芺等等，幾多選擇。▲ 不過嘢飲就得一檔，仲要係普通支裝維他奶同罐裝飲品，好似少咗啲。

假日市集空降賣手作

今年最有趣巴士站旁邊空地變咗由麥田捕手主辦嘅手作市集，入面有彩繪紋身、押花、飾物、手作皮革等，最慘係有檔美容宣傳，好似同傳統氣氛好唔夾。

▲ 某啲檔會整新年主題嘅手作，都帶番少少氣氛。▲ 仲有曲奇添！

花牌工作坊初五啟市

之前睇 Media 報導今年帶迷你花牌工作坊，本來都好想玩下，可惜要年初五先有，所以無得玩。有興趣嘅朋友可以初五去玩，$100一位，完成後仲可以可以參加設計比賽添！
▲ 傳統花牌好有香港特色，好值得保留呢個文化呢！

▲ 唔參加工手坊都可以買現貨，不過最平都 $500 先有交易。

香港許願節2017 x 林村新春嘉年華
日期：2017 年 1 月 28 日 至 2 月 12 日
時間：上午 9 時 至 下午 6 時
地點：林村鄉公所路林村許願廣場