我哋冬天打邊爐食雪花肥牛，京都人春天原來會睇住櫻花食和牛。乜京都都有和牛架咩？其實日本大部份地區出產牛，只係平時比較少出口，所以好少食到。想試京都和牛，依家去 KUROTAKI 黑瀧板蕎麥專門店 就有得食啦！我依莉詩就有幸可以食都一口，果然入口即溶好感動，但望見張收據包你更加感動到喊出嚟！
點解京都更入口即溶？
神戶牛聽得多，京都牛真係第一次聽。因為京都和牛好少出口，所以除咗去日本，平時好食得到。今日一食就發覺京都牛真係好唔同，雖然無神戶牛咁濃味，但就入口即溶程度真係一食難忘。原來係因為京都牛一般會係 30-36個月先屠宰，比一般嘅 28至 29個月花更長時間等牛成熟，所以比神戶牛平均多 114公斤，腰部同西冷油花比例會較高。
創新食法套餐多元化，但超級超級貴
餐廳用咗多種唔同方法煮牛嘅不同部位，除了京燒食法外，更有火炙和牛壽司、吉列和牛及黃梅燴和牛鍋巴等等，想一次過食多幾個唔同食法可以叫個京都和牛餐一人前 ($498) 有沙律、鵝肝和牛壽司好豐富，當然亦可以單點。不過和牛真係一口千金，唔係因為有活動邀請，自問真係食唔起。
▲ 日本紫剘蘿蔔番茄沙律 $78
前菜嘅沙律用咗京都出產嘅紫蘿蔔同多種色彩嘅蔬菜，單靠顏色豐富嘅賣相都已經開胃。冰震後嘅蔬菜變得更爽口，十分特別。
▲ 吉列京都和牛 $328
吉列京都和牛用咗西冷部份，外皮鬆脆，內裡軟滑，不過肉汁不多，牛味唔太重。
▲ 黃梅燴和牛鍋巴 $298
黃梅燴和牛同牛腩部份製成，軟滑不膩有啖口，配合鍋巴一齊食，一脆一軟，非常有層次。
▲ 火炙和牛鵝肝壽司 $108
和牛鵝肝壽司用牛小排薄砌而成，表面輕輕炙熟，入口即溶。配合鵝肝醬甘口味濃，雙重享受。
▲ 燒京都和牛 $328
燒京都和牛用肉眼位置製成，係最傳統做法，亦係三款食法中最能鎖住肉汁，最有油花，最香，最濃味，加少少海鹽一齊食更能提升肉味。
▲ 京都和牛雅壽喜燒 （二人前）$798 (6pcs) / $888 (8pcs)
除咗套餐仲有和牛雅壽喜燒，薄薄嘅和牛輕輕一灼，沾上貴過一般蛋4倍嘅御藻蛋，軟滑、鮮甜、入口即溶，好味到想食完再食！
▲ 睇到啲油花已經知道係非一般嘅牛可以做到。
抹荼甜點多選擇
自問和牛就食唔起，同時推出嘅抹茶甜點售價由 $38-78 ，總算貼地少少。店內所有抹荼甜點都選用有 300 年歷史嘅一保堂茶葉同抹茶粉製成。雖然個人覺得無八女茶咁甘香，但每款甜品都有淡淡抹茶回甘而不苦，抹茶控可以一試。
KUROTAKI 黑瀧板蕎麥專門店
地址：銅鑼灣告士打道 280 號世貿中心 413 – 415 號鋪