日日返工無時停，放工返屋企對住四面牆。收入低、工時長，生活想有啲變化都難，唔想咁仲可以點？既然改造唔到呢個世界，不如試下改變自己心態。阿Q 精神一啲，就算買唔到樓，都可以買小小嘅家品點綴一下，個人開朗咗，機會自然嚟啦！今次我依莉詩就嚟到海港城，一睹 香港家庭用品展及國際家用紡織品展 + 香港禮品及贈品展 + 香港國際印刷及包裝展 預展，率先感受咩叫生活品味啦！
生活對「窮忙族」嚟講就係返工、OT 再 OT ，但嚟到家品展或者就有另一種睇法啦！「LIFE」就係「Lifestyle」、「Interior」、「Feast」同「Enrich」。為咗進一步凸顯 4大主題，大會今年仲與知名意大利趨勢預測公司 A+A Design Studio 合作，設置 4個潮流概念展示區，展示各式各樣的家庭用品及室內裝飾品，揭示2018年春夏的設計潮流。
▲ 「Lifestyle」網羅的展區包括：「精萃廊」、「品味餐饗」、「品味家飾」、「寵物用品世界」、「綠色居庭」，以及今年增設的「咖啡精品廊」。睇下呢個寵物帳幕就知露帳並非山系女孩嘅專利啦！
▲ 「Interior」囊括各類家居裝飾，產品專區包括「室內家居裝飾」、「節慶家居裝飾」、「卓越東盟」以及「文化創意工藝品」。嘩！有睇《逃恥》嘅你，一定會記得呢本平匡係片尾曲翻開，似書嘅燈吧！
▲ 「Feast」顧名思義係涵蓋與餐飲相關的產品，專區包括「餐具」、「品酒用具及配件」、「廚具及廚房小器具」、「家居電器」以及今年新增的「酒店及餐飲業用品」。呢個好似冬甩又似年盒嘅小食盤係咪好特別呢？
▲ 「Enrich」就有「家居百科」、「嬰兒用品」、「浴室美容及保健用品」、「家居清潔及洗衣用品」、「貯物設備」及「戶外及園藝」。呢個清潔球結合奶樽擦同彈彈波嘅設計，只要放三個波入去水樽，搖搖下就可以清乾淨個水樽啦！超方便呢！
▲ 而成個預展中最吸引我就係呢支智能多功能您妝品分裝瓶。內置嘅皮膚水分測量器可以隨時測量肌膚濕度，仲可以放自己用開嘅化妝水，一測到唔夠就補水。啱晒我呢啲忙得嚟又想 keep 住靚樣嘅女仔啦！
香港家庭用品展及國際家用紡織品展
日期：2017年4月20至23日
地點：灣仔會展
香港禮品及贈品展
日期：2017年4月27至30日
地點：灣仔會展
香港國際印刷及包裝展
日期：2017年4月27至30日
地點：亞洲國際博覽館