一年一度媽媽節就快到，大家諗好去邊未呢？食快餐又無誠意，食連西餐又太貴，都係中菜實無死，但又怕被人劏到一頸血？早排有朋友好事近，叫我去試菜，經理話只要 Book 定位，嚟緊母親節都唔會加價喎！雖然我 依莉詩 平時食開日本嘢，但今次試完覺得啲有機菜又幾爽甜，菜式都唔會好似平時啲酒樓咁 hea。
▲ 涼拌紫洋蔥
平時唔食菜，更唔好話係洋蔥。不過成班親戚一圍枱食飯，咁多長輩望住你又真係敢唔食？如果係呢碟或者會無咁驚，因為紫洋蔥無普通洋蔥咁大陣味，咬落少少辣，有少少麻油味，幾怕洋蔥都接受到！
▲ 芝麻醬油麥菜
蔬菜白灼好考新唔新鮮，呢碟油麥菜都幾爽甜，加埋芝麻醬甜甜哋，好似食沙律咁。
▲ 冰震西蘭花
冰震刺身、冰震奶茶都見過，估唔到西蘭花都可以冰震，仲要點 wasabii 食。又咩分別，就係更爽口，咬到索索聲。
▲ 蒜炒白菜仔
蒜蓉炒菜平時屋企都會食到，簡簡單單家常餸，不過要炒得嫩就要考師傳功架啦！
▲ 南瓜鮮秀珍菌
真係中菜先會原個南瓜上，睇落好有灰姑娘架南瓜車咁童話。
▲ 鰻魚汁燒原條茄子
燒茄子本身已經好好食，加埋鰻魚汁炒蝦球，多重口感。
▲ 即燒有米奶豬
平時去飲最期待隻乳豬，呢隻仲要係未戒奶嘅，真係夠晒皮嫩肉滑，脆卜卜一啲都唔油，入面啲炒飯吸收晒豬仔嘅精華，不得了！
▲ 金銀蒜香辣澳洲泥蟹
泥蟹出名大隻肉厚，炒完之後微辣入味，非常惹味。
▲ 頭抽煎南非鮑魚
識我嘅人都知我妹仔肚，對鮑魚敏感，得個睇字。唯有食下旁邊座「冰山」吧！好甜～哈哈⋯⋯
▲順德煎焗鮮魚咀
魚胃上次就試過，今次試魚咀，不過好似都係啱啲鐘意噒骨嘅朋友。
▲ 米網蟹子明蝦球
煎炸嘢幾時都咁好食，滿滿蟹子食落卜卜聲，好滿足。
▲ 台南三菇排骨煲
一次過食咁多，去到尾都幾飽，但呢塊排骨都幾滑幾有肉汁，都係要食多幾啖。
▲ 秘製東江鹽焗雞
見到碟雞就知差唔多，有趣嘅係，啲雞皮火灸過，有少少脆皮感。
金御海鮮酒家
中環皇后大道中 88 號勵精中心 3樓
睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie