年尾特別多飯局，成班人食飯可以吹水地方選擇唔多，加上今年冬天特別凍，放題、刺身都凍到唔想食，最好就係食啲暖笠笠嘅嘢！雞煲、打邊爐日日食都熱氣，今次就去咗出名多潮州餐館嘅荃灣三陂防搵食！雖然經過條街，每間菜館侍應都會出鋪sell自己間餐廳，我 依莉詩 就第一時間畀心夜來潮嘅砂鍋粥同原板海膽炒飯吸引咗入去啦！
新派潮食 餸菜足料大大碟
聽聞心夜來潮旺角嗰間都幾出名，而荃灣店嘅菜式原來同旺角店好多都唔同，就好似最吸引嘅原板海膽炒飯就係荃灣店限定。雖然餐廳都係主打潮州菜，但菜式唔止打冷，仲有唔少特別嘅菜式，好似涼拌蔥脆魚皮就唔係度度都食到。講到冬天最啱食梗係砂鍋粥，一路食有個火爐暖住，一定唔怕凍。而一大班人吹水食飯就可以揀啲鑊氣小炒，宵夜送酒都不失一個好選擇。菜式都係預多人一齊食，所以全部都大大碟，如果想食多幾款最好約多幾個朋友一齊去。
▲ 龍蝦膏蟹砂鍋粥 $280
天氣咁凍，靚仔大廚 Kay 就推介我哋食潮汕砂鍋粥，下面有個火爐一路幫個粥加熱，真係超暖。沙鍋粥可以自己揀料，海鮮同肉料都有，即叫即整，除了今次揀咗嘅龍蝦同膏蟹，仲可以揀聖子王、象撒蚌仔、田雞等十幾種配料可以揀，每份都係 $60蚊內有交易！計番細煲最少揀$180，可以揀到 3份料，四個人食的話，每人唔止一碗，份量好夠！
講番個粥，因為即叫即整，要等約30分鐘，但個粥本身，煲得好綿好滑，好有潮州粥嘅風味。膏蟹好多膏，分散喺成鍋粥度，差唔多啖啖都食到，而且仲愈滾愈鮮甜同濃海鮮味！而龍蝦肉無話煲都老晒，反而仲更鮮味，肉質仲幾彈牙！
▲ 原板韓國馬糞海膽炒飯 $138
之前去塔門食中式海膽炒飯，啲海膽炒埋落飯搞到乾晒，好似蟹膏咁，但今次呢碟就原板韓國馬糞海膽鋪喺炒飯上面，貌相相當吸引！海膽肥美又 creamy，炒飯底飯粒乾身，有鑊氣，入面仲有帶子同蝦仁，好足料。百幾蚊就食到真係慳抵！
▲ 涼拌蔥脆魚皮 $78
魚皮好多時都係食炸嘅，涼拌蔥脆魚皮都係第一次食。開頭都擔心會腥，好彩又唔係，咬落仲好爽脆，好似食緊啫喱咁，好得意。
▲ 火焰辣酒煮醉螺 $108
辣酒煮螺送酒一流，田螺份量都幾多，而且好彈牙，落到喉嚨先辣，好刺激！而大腸仲要愈滾愈辣，非常惹味。
▲ 鐵板黑椒手抓豬仔肉 $98
雞脾食得多，豬仔脾原來都好好食。唔使講都知啖啖肉，去炸咗之後好香口，做到外脆內軟，入面僅僅熟，好Juicy。同樣好啱送酒。
環境乾淨光猛 最啱一班人吹水聚腳
一向對打冷印象，都係大排檔坐晒係街邊，啲枱用枱布包住唔多乾淨。今次呢間又幾唔同，環境都幾潔淨，面積不算好大，但坐得唔會太擠擁，加上裝修好似古裝片嘅庶民客棧，感覺好特別。
▲ 宵夜又點可以唔似番杯？最搞笑係呢度要用碗飲啤酒，上面仲要寫住「戰鬥碗」，夠豪夠霸氣，唔係唔戰嘛？
▲ 天花嘅燈都好特別，每一盞都唔同。
心夜來潮-荃灣
地址：荃灣三陂坊30號地舖
荃灣區美食精選！
死場不再！10間平民食肆進駐荃灣新 Food Court – 嫩滑手撕雞腸粉 x 醒胃麻辣串
粉色系呃 like 甜品團！食盡荃灣 3大潮食店 – 玫瑰士多啤梨窩夫 X 山形縣白桃厚班戟
睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie