粉色系呃 like 甜品團!食盡荃灣 3大潮食店 – 玫瑰士多啤梨窩夫 X 山形縣白桃厚班戟

開口埋口都話要減肥,但只要放碟甜品係面前就好難抵抗到誘惑!無所謂啦!好姊妹就係要一齊喪食再一齊 keep fit嘛!胃食嘅我 依莉詩  上次同大家介紹完 元朗 同 大坑 有咩好食,今次就同 YoYo 組成「甜姐兒甜品團」,去荃灣食足一日啦!

荃灣小店多,新界人宵夜聚腳地

荃灣呢個「天空之城」,出名天橋商場特別多,但其實都有好多貼地嘅小店美食,就算由朝食到晚都食唔晒呢!就好似眾安街一帶就係掃街同宵夜集中地。以前喺紅十字會開完會,都會同成班隊友去海壩街一帶食甜品或者串燒做宵夜。松記雖然唔係特別好食,但可以話係每次必去的呢!而四個坡坊入面都有好幾間打冷同雞煲,一大班人去真係好熱鬧。亦好懷念嗰段「燃燒青春」嘅日子啊!

1) 由佈置到甜品一樣夢幻

除咗宵夜吸引,荃灣亦開咗唔少 Café,而呢間門面以粉色裝修,加上咖啡杯同天鵝佈置嘅咖啡灣就好適合同閨蜜一齊去食啦!唔單止門口好似置身韓風粉色系靚相入面,食物貌相都好吸引,好似今次食嘅黑松露海膽蟹蓋飯同玫瑰士多啤梨窩夫,一層一層,顏色豐富,而熱飲每杯都會有拉花,好有心思,打卡一流!最重要係唔止得個樣,連味道唔錯呢!難怪由大埔開到嚟荃灣都一樣咁多人排隊。

▲ 玫瑰士多啤梨窩夫 $88

平時好少對一間餐廳有咁高評價,不過呢個玫瑰士多啤梨窩夫又真係帶到畀我驚喜,玫瑰花味好出,又唔太甜。本來花形窩夫配上士多啤梨未算太特別,但加埋中間嘅牛乳、玫瑰雪糕同埋星星脆脆及棉花糖就變得好靚。我最鍾意係上面嘅玫瑰花瓣同自家製玫瑰醬,好香好清新,未食已經「醉」了!

▲ 黑松露海膽蟹蓋飯 $178

食甜品之餘都要食正餐,呢個黑松露海膽蟹蓋飯用上現時最興嘅海膽乜乜乜同芝士乜乜乜,再加個蟹蓋夠晒霸氣。雖然韓國馬糞海膽、黑松露同芝士都係濃味食物,都合起嚟原來都好夾,而且龍蝦汁燴飯入面都有幾多虎蝦肉同蟹肉(蟹蓋係吉嘅!),食落軟綿多汁,好鮮味!份量多,加上食得多都有啲膩,建議 2-3人叫一份,再叫其他小食比較好。

▲ 玫瑰綠茶牛奶 $42

平時鍾意牛奶抹茶嘅我幾欣賞呢杯加咗玫瑰花瓣嘅抹茶,抹茶味未算太苦澀,但都有抹茶味,軟滑得嚟玫瑰花好香,飲落好清新,好啱夏天飲,好解渴。

▲ 岩鹽焦糖鮮奶咖啡 $38

平時要飲到一杯靚靚拉花嘅咖啡都要 $40以上,而呢度杯杯拉花都唔同,如果繁忙時間可能簡單啲,非繁忙時間就會複雜啲。今次呢杯上面有個帶熊仔帽嘅女仔,咖啡師真係好用心呢!要提醒大家,餐廳會畀一樽岩鹽自己添加,但千奇唔好好似 YoYo 咁貪心,加得太多會好鹹㗎!

咖啡灣Cafe Swan
地址:荃灣眾安街68號千色匯2期地下G30-G33號鋪

2) 平民價人氣厚班戟

食完窩夫都未夠,第二站去 Aroma Dessert Cafe 食厚班戟。呢間 Cafe裝潢清新簡約,以木色為主調,本來門面都幾特別值得留影,但就被門口貼滿嘅「每日限100份」、「每人最低消費」等大字告示破壞氣氛。好明白租金貴,先小人後君子的做法係必須,但亦貼太多了吧!說到甜品方面種類都頗多選擇,除咗日式厚班戟外,仲有心太軟、火焰雪山、拿破崙、窩夫、梳乎厘、吐司盒等,貌相好精緻,而且價格都唔算太貴,比起奇跡pancake ,用上山形縣白桃嘅厚班戟都只係$65,算係親民價了!

▲ 山形縣白桃厚 pancake 伴純乳酪 $65

嚟得當然要試每日限量 100份嘅厚班戟,製作需時 10-20分鐘,所以一坐低就要叫。而門口嘅告示都好清楚,每人最低消費係一個單點,可以點嘅班戟數量按人數而定。

班戟質感鬆軟中帶實在感,似濕潤嘅海綿蛋糕,所以無空氣感,食落仲十分漿口。睇嚟我都係鍾意梳乎班戟口感多啲。至於上面嘅生果揀咗爽甜嘅日本山形縣白桃,配上冰涼消暑嘅益力多雪葩,相比起班戟,伴碟反而更好食呢!

▲ 朱古力芭菲伴迷你心太軟 $60

呢杯芭菲就啱晒多心之人,一杯就有齊心太軟、馬卡龍同雪糕,睇得出師傅要用好多心機去製作,$60就食到 3種甜品相當抵食。當中朱古力味重,會好快食都好飽呢!但YoYo好介意心太軟唔流心,哈哈!

Aroma Dessert Cafe

地址:荃灣鱟地坊38-46號祐強樓地下42號舖

3) 煙燻效果玉子燒

築地食過玉子燒之後一直念念不忘,原來荃灣都有一間玉子燒專門店,不過所賣嘅玉子燒就更特別,有鹹味同甜味,有凍有熱,最估唔到會有紫薯同蘋果味。而每件玉子燒都係即叫即製,店員會泵入核桃木煙霧入盒內,而收到後都要等 3分鐘先好開蓋,等木味深入蛋內。

 

 

▲ 紫菜明太子玉子燒 $34

打開蓋前記得準備相機,一開蓋就有煙霧效果,仲有一陣香濃煙燻味湧出,好誇張呢!至於味道上,可能我哋焗耐咗,煙燻味太濃,反而蓋過咗蛋香,幸好夠熱同嫩滑,加上清淡的蘿蔔蓉減淡玉子燒嘅油膩感。

 

 

▲ 明太子份量不太多,無入口爆破嘅感覺,紫菜少少鹹,做到鹹甜平衡。雖然無築地嗰次食嘅咁好食,$34」件有啲貴,不過都值得一試。

 

煙燻玉子燒

地址:荃灣鱟地坊80-84號華成樓B座地下B3號舖

區外人是否需要潮聖?

荃灣無論對於住新界還是九龍嘅人嚟講都超方便,基本上去新界東、西定出旺角、尖沙咀都有凌晨車,所以一班人食宵夜都會約係呢區。加上呢區無論新潮 Cafe 定懷舊小店都有,就算一個月嚟幾多次都可以搵到新嘢食,絕對係一個搵食好地方呢!

 

各區美食精選!

地膽帶路!土瓜灣街頭小食 – 足料花膠魚肚粥 + 濃香米香腸粉

地膽推介!$150 掃盡 5大紅磡街頭小食 – 混醬班戟麵條 + 超大粒手製芋圓

死場不再!10間平民食肆進駐荃灣新 Food Court – 嫩滑手撕雞腸粉 x 醒胃麻辣串

粉色系呃 like 甜品團!食盡荃灣 3大潮食店 – 玫瑰士多啤梨窩夫 X 山形縣白桃厚班戟

大坑 2大呃 Like 甜品! 粉色棉花糖燒 x 彩虹沖繩鹽刨冰

5萬呎水產市場登陸黃埔!九號水產 4大食店率先睇 – 蟹痴必掃北海道皇帝蟹

旺角 1日 4餐,由朝食到晚!青檸烏冬係劣食?韓系日式吉列牛一定正?

銅鑼灣 SOGO 地庫重開!5大人氣日本過江龍進駐 必食香脆海鮮煎餅 + 鹿兒島彈牙魚餅

元朗 4大人氣食店!必食北海道布丁燒 X 啖啖肉無骨雞翼包

屯門潮食集中地!紅橋 4大不得不吃的小食+主菜+甜品

 

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie



About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。