死場不再!10間平民食肆進駐荃灣新 Food Court – 嫩滑手撕雞腸粉 x 醒胃麻辣串

荃灣向來多食肆,特別係海霸街一帶更加係宵夜天堂。我 依莉詩 發現附近嘅一個死場「地皇廣場」,最近竟然進駐咗 10幾間食平民食肆,主食、小食、甜品樣樣都有,既可以滿足掃街慾望又可以坐低慢慢食!而家就帶大家睇吓有咩食啦!


死場不再 – 10間平民食肆進駐

呢個叫「大食皇」嘅美食廣場地方細細,感覺就似西九龍中心嘅 Food Court ,大部份都係廿幾三十蚊就有交易價格非常親民。不過始終都係擋場,鋪同鋪之間比較窄,坐嘅位都唔多,但麻雀雖小, 10幾間港式、川式、台灣菜、日本菜等食肆,款式多而且性價比高,街到攰可以考慮吓去醫肚。

 

1) 「說一不二」醒胃麻辣串

街邊食咖喱魚蛋就多,麻辣串又食過未?呢間「說一不二」將 30款串物放入四川地道香料熬製嘅湯汁,涮一涮之後變得又香又麻,好過癮呢!蔬菜$6起、肉類同丸類都係$8起,仲平過南豐中心嘅咖喱串,值得一試!

 

▲ 串串金麻辣燙 $6-8/串

口感超爽嘅魷魚涮一涮辣汁之後,變得又香又麻,加上少少辣非常醒胃。

2) 「3兄弟」嫩滑手撕雞腸粉

手撕雞通常配粉皮,仲唔到配腸粉又有另一個效果。腸粉加埋手撕雞,啖啖肉又嫩滑,仲有腸粉必備嘅甜醬、麻醬加芝麻。$28咁大份,足夠食到飽飽!

3)「口福堂」拉絲櫻花蝦芝士玉子燒

上次介紹過一間荃灣嘅一間玉子燒,比起煙燻味我更愛有蛋香嘅玉子燒。呢個櫻花蝦玉子燒$26,即叫即整熱辣辣,有蛋香之餘,軟淋淋。加埋$10芝士會變得更濃郁,仲有拉絲效果?!

▲ 櫻花蝦玉子燒$26,加芝士$10

▲ 玉子燒有厚度,軟淋淋,上面仲有沙律醬、茄汁同木魚花,食落好滿足。

4) 「Cupking 杯子王」入味牛魔王炒麵

近年好興海鮮杯,貪可以邊食邊飲,掃街最啱嘅組合。而呢間杯子王都係用上面小食下面飲品嘅配搭,不過飲品就係更健康嘅自家製糖水,掃街食得多油炸嘢,呢杯正好可以潤吓喉。

 

▲ 雞翼杯配糖水 $25

一杯有 4隻雞翼同兩舊蘿蔔,下面仲係滋潤嘅糖水,以掃街嚟街都算健康㗎喇!

 

▲ 牛魔王撈麵 $38

 

▲ 除咗杯裝,仲有即叫即撈即炒嘅西冷牛肉醬撈麵,材料多,份量多,又夠惹味,應該會好受學生歡迎。

5) 「茹素人家」黑松露雜菌薄餅

素食嘅朋友同樣有選擇,茹素人家就有多款素食Pizza。雖然無奶同蛋,但都非常香口,材料都多,但相比起其他鋪頭,一個黑松露雜菌薄餅就要 $78,似乎有啲貴。

6)「顯徑揚揚」冰花手工餃子

除咗小食,Food Court 仲有可以食得飽飽嘅鋪頭。顯徑揚揚唔單止有車仔麵,仲有手工餃子。薄薄嘅皮輕輕煎一煎,有層脆片,外脆內飲。$28 就有 8隻餃子,抵過食八方雲集。

7) 「ICE CREAM BROTHERS」藍色海鹽雪糕窩夫

掃街點少得甜品同雪糕?呢間雪糕店同樣係學生價,$5就有得食!味道都好特別,有黑松露味同海鹽味,不過份量就略嫌少咗啲。而最啱呃like 梗係呢個藍之戀人 ($38),冰藍色嘅沖繩海鹽雪糕配埋藍色窩夫夠晒吸引呢!

地皇廣場

地點: 荃灣大河道18號地皇廣場1樓
開放時間: 11am-11pm

 

各區美食精選!

地膽帶路!土瓜灣街頭小食 – 足料花膠魚肚粥 + 濃香米香腸粉

地膽推介!$150 掃盡 5大紅磡街頭小食 – 混醬班戟麵條 + 超大粒手製芋圓

死場不再!10間平民食肆進駐荃灣新 Food Court – 嫩滑手撕雞腸粉 x 醒胃麻辣串

粉色系呃 like 甜品團!食盡荃灣 3大潮食店 – 玫瑰士多啤梨窩夫 X 山形縣白桃厚班戟

大坑 2大呃 Like 甜品! 粉色棉花糖燒 x 彩虹沖繩鹽刨冰

5萬呎水產市場登陸黃埔!九號水產 4大食店率先睇 – 蟹痴必掃北海道皇帝蟹

旺角 1日 4餐,由朝食到晚!青檸烏冬係劣食?韓系日式吉列牛一定正?

銅鑼灣 SOGO 地庫重開!5大人氣日本過江龍進駐 必食香脆海鮮煎餅 + 鹿兒島彈牙魚餅

元朗 4大人氣食店!必食北海道布丁燒 X 啖啖肉無骨雞翼包

屯門潮食集中地!紅橋 4大不得不吃的小食+主菜+甜品

 

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie



About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。