Day 1 行咗幾乎成個澳門半島，第二日決定去氹仔行下。氹仔同澳門半島唔同嘅係，近年多咗好多新賭場，每間都有自己特色嘢玩，好似新濠影匯嘅 8字形摩天輪同銀河嘅星浪淘園咁。不過今次話明係窮遊，梗係去啲免費活動啦！由永利皇宮到官也街，再到巴黎人都係搭賭場巴士，連車費都慳埋添！
永利皇宮－中途上纜車每人慳 $100
講到 2016年新開嘅賭場一定要講永利皇宮，皇宮出面有個 八英畝嘅表演湖，每日上午11點至凌晨12點，星期六日會提早一小時由上午10點開始，每隔20分鐘都會有大約3分鐘嘅巨型音樂噴泉表演，比起永利嗰邊大多，睇落都幾壯觀架！雖然日夜嘅花式一樣，不過夜晚表演配合燈光睇落更壯觀。但為咗順路，就決定朝早嚟啦！
另外，一個永利皇宮嘅娛樂設計就係圍住個湖嘅纜車，全程大約 10分鐘，每位 $100澳門幣。不過，我依莉詩當然唔捨得比錢坐。如果係新濠影匯後面嘅湖邊車站上車就唔使錢啦！雖然只係搭得半程，坐得坐5分鐘，不過就慳番 $100/人，當係體驗都夠抵玩啦！
▲ 雖然湖邊嘅中途
▲ 纜車車廂空間唔大，最多可以坐六個人，但就唔算多人，我聖誕節去都唔使同人夾車坐。雖然都係圍住個湖轉，無咩景睇，不過轉彎個下，真係
龍環葡韻－情侶放閃之地
搭纜車去到永利皇宮，入面都係賭場平時有嘅名店，行咗陣就轉穿梭巴士去氹仔市區。因為係聖誕，官也街超多人，所以就先由後街繞去龍環葡韻。「龍環葡韻」係澳門八景之一，亦係婚攝嘅著名景點，當中嘅 5間小型建築都係港女最愛嘅 tiffany blue，充滿葡萄牙建築風韻，建築係 1921年落成，修復後，政府改建成博物館，每間入面都有不同展品，講唔同故事。係度除咗自拍放閃，亦可以更加認識澳門呢！
▲ 雖然話四圍都係人，不過因為座座嘅外觀差唔多一樣，好多遊客行到中段已經回頭，就只有好似我哋呢啲帶腳架自拍嘅情侶會行到最一間。基本上大家都會輪住影，都幾得意架！
▲ 影相影到攰，坐咗係度休息咗好耐好耐，旅行就係要 hea。
綠野花蹤－冬季花卉展
係綠色住宅旁邊，咁啱係冬季花展，展場分田野風光、蜜蜂樂園、原木森林及蝴蝶花園 4大區域，配合森林樂園和歡樂聖誕裝置，展出多種穗形花卉，如羽扇豆、大飛燕草等，並有各種冬季時花如麗格秋海棠、大紅、淺紅聖誕花等重點搭配，打造成片片花海。雖然比起維園花展係蚊型，
▲ 呢幾舊巨型海藻球睇落好搞笑呢！
▲ 花種其實唔多，都係一品紅、薰衣草同海棠，不過都幾香。
▲ 睇花之外，仲有…咁大隻甲蟲嘅？
官也街中伏店－得一粒豬油渣嘅油渣麵
行到肚仔餓，都係要去番官也街搵食。去得澳門，大三巴街同官也街呢兩條手信街基本上都係必去，大利來豬扒包、晃記餅家杏仁餅、誠昌飯店水蟹粥同榴槤雪糕應該都唔使我介紹，亦因為食過了，決定去試下新嘢，點知就係咁，我就中咗個大大大伏！就係大利來豬扒包對面，有一間叫唔知乜乜葡國餐廳 (其實入面係普通茶記)，我哋見海報碗油渣麵好吸引未去試下，點知… $25一碗就係得一粒豬油渣咁大把！真係唔知好嬲定好笑。
▲ 大部份人都會去官也街行，但其實旁邊嘅小巷都好多特色。
▲ 雖然話係旅客區，都預咗乜都貴，但得一粒豬油渣嘅油渣麵真係喊出嚟～
▲ 低處未算低，呢個悔洋蔥鹹牛肉包啲洋蔥多到呢～真係滴晒汗…
夜遊巴黎人－迷你版嘅浪漫地標
醫飽個肚，就搭新濠影匯嘅睹場巴士，去對面嘅巴黎人。雖然開幕只係幾個月，但我都去咗 3次，第一次因為工作，第二次同屋企人去，今次終於都帶男朋友去啦！因為基本上成個巴黎人都幾乎行過了，亦知道邊度有影相位 (想知有咩玩同有咩影相位，係 google 搵 “依莉詩 巴黎人” 吧！呢度唔方便貼 link)，所以今次直接去影相位影相。
▲ 巴黎人嘅歐陸裝修同聖誕真係好夾，呢個景，靚過好多室內影棚呢！
▲ 除咗係鐵塔下影相，聖誕節塔下多咗好多棵方形樹，影相超有 feel 呢！
威尼斯人－賭場區內的平民之選
快快趣去完巴黎人，就行去威尼斯人睇 3D光效投射音樂滙演。呢個 show 嘅宣傳唔多夠，不過每年都會喺聖誕上演。利用 3D投射技術，威尼斯人整個外牆都變成畫布繽紛圖案配合節奏輕快的音樂，再加上飄雪效果，充滿聖誕氣氛。上年聖誕同屋企人係呢度睇光影 show，一年後同男朋友喺
雖然係聖誕節，但並無去食自助餐，反而去咗威尼斯人嘅美食廣場。係賭場餐廳食嘢大部份都好貴，好高級，就算 food court 都貴過人，而威尼斯人算係比較平民而且多選擇，中、日、台、韓、新加坡等等，有 20多間食肆，有選擇困難嘅朋友真係唔知點揀好呢！
▲ 揀嚟揀去唔知食乜好，最後揀咗碗札肉河粉，普普通通無乜特別，都係俾 Raymond 食好了。
▲ 反而呢個 A餐就好好味，$100有齊喇沙、肉骨茶同海南雞飯，食都超飽！
快啲 click 入去睇埋晒 Day 1-4 嘅分享吧！
- 【澳門】拍住拖遊澳門半島！下環街市隱世小食 X 夜遊光影節
- 【澳門】探索氹仔新與舊！官也街中伏店 x 免費搭永利纜車 x 夜遊巴黎人
- 【澳門】單車路環半日遊！食住葡撻睇日落 x 豪食乳鴿葡國菜
- 【澳門】居高臨下飽覽澳門城區！參觀可能係全世界最細嘅動物園同最短嘅纜車