【澳門】居高臨下飽覽澳門城區!參觀可能係全世界最細嘅動物園同最短嘅纜車

頭三日先後去過澳門半島氹仔路環,想去嘅都差唔多去晒。最後一日我依莉詩就打算去由細到大都未去過,一直以來個個都話係搵笨,亦可能係全世界最細嘅動物園同最短嘅纜車!

惟珍粥麵店-滋味飽肚早餐

參觀可能係全世界最細嘅動物園之前當然要醫飽個肚先。因為今日無同親戚飲茶,所以選擇咗係二龍喉公園入口旁嘅粥麵店食早餐。雖然係普普通通嘅 menu,食物亦唔算太吸引,不過個魚滑麵都幾 OK 。

▲平時食魚滑都好怕陣胡椒粉味,好彩呢間唔怕,而且都幾滑。份量夠多,夠飽肚。

二龍喉公園-睇爛瞓熊

澳門半島出名細,動物園就更加細。二龍喉公園就係澳門半島唯一設有動物園嘅公園。公園中央築有人工瀑布、小溪同水族池,而旁邊就有幾個動物籠。雖然話動物園內飼養咗哺乳動物、雀鳥同爬行動物,但其實都係一隻起兩隻止,而最特別就係獼猴同黑熊。

▲ 有籠困住啲馬騮感覺比去馬騮山安全好多,但其實都幾可憐。

▲ 而呢隻黑熊已經好老,所以成日都瞓覺。睇下佢嘅睡姿幾休閒。

超短纜車-兩分鐘就到

用十分鐘左右行完二龍喉公園,之後就去返入口右邊嘅松山纜車站,搭全世界最短嘅纜車。呢條纜車線全長得 186公尺,車程大約只需要一分鐘多少少,係地面都可以睇到山頂站,比起永利皇宮嘅纜車仲短呢!既然單程票只係 $2MOP,來回票都係 $3MOP,搭下都無妨!

 

▲ 纜車車箱唔係好大,最多可以坐 4 個人,滴滴骰骰都幾可愛㗎!想搭嘅記得朝早去,因為開放時間只帶上午 8時 至 下午6時,星期一仲休息添㗎!

▲ 分幾鐘嘅旅程可以清楚睇到整個二龍喉公園同腳下嘅人散步,唔會話有大海、森林等悶場,絕對係精華體驗。

▲ 松山纜車唔似昂坪 360 或者貓空咁熱鬧。與其話係旅遊景點,不如話係本地人嘅後花園。落車之後沿路裝有唔少健身設備,而且都好齊,小朋友專用同老人專用都有,最意外係有比成人用嘅,感覺好新好專業,一啲都唔似香港屋邨公園啲又殘又舊嘅貨色。

松山燈塔-飽覽澳門風景

經過長長嘅行山徑同中間嘅防空洞 (有啲恐佈,唔敢影相) 就到東望洋燈塔。白色底、黃色綫條點綴嘅東望洋燈同前面嘅聖母雪地殿都係澳門八景和世界文化遺產之一。雖然近睇殘殘地,不過影出嚟都係有氣氛,都有唔少人係度影婚紗相㗎!

▲燈塔我嚟過幾次,但今次就超級大風,頂帽差少少就吹走了!好難想像以前打風會有工作人員掛「氣旋信號球」,佢哋真係好專業精神呢!

▲ 燈塔前嘅教堂雖然細,卻透露出莊嚴同優雅。

▲ 教堂旁嘅石梯好有地中海風情呢 !

▲ 松山雖然得 90公尺,但已經係澳門最高嘅山,係呢度就可以俯瞰整個澳門半島,感受舊城區嘅魅力

即製金錢餅-排足半個鐘

被大風吹完後,我哋就慢慢行返去噴水池果邊,發現到一檔排好長龍嘅金錢餅。記得以前我都會去大三巴附近個阿伯度買,但隨住佢愈做愈高竇,3點先開檔,啲金錢餅十塊有六塊都燶之後就無再買了。今次見到呢檔小販檔咁多人排就試下。因為即整所以排咗成個鐘先有得食,而且 $20 就廿塊左右都幾貴,不過好耐都無食過咁香蛋黃味嘅金錢餅了!

▲ 每併金錢餅都即叫即整,係就係等得耐,但咁香咁脆都值得排嘅。

日食堂拉麵-日本人主理

食完金錢餅都仲係有啲肚餓,所以就去咗噴水池對面斜巷上、誠記白粥隔離嘅日食堂。近年澳門多咗唔少拉麵鋪,但好食嘅唔多,而呢間老闆卻請了個有二十幾年經驗嘅日本師傅,製作嚴謹。無論食物同餐廳佈置都充滿日式嘅柔和氣氛,靜靜地坐係度非常舒服。

▲ 因為係下午茶時間,所以無食拉麵,而係點咗小食同燒酒。

▲ 燒飯團雖然好普通,但要做到飯粒分明,軟硬適中,而且燒得啱啱好其實唔易,送酒一流呢!

依莉詩旅程小結

澳門 4日嘅旅程話咁快就完,今次係我去澳門咁多次行程最豐富嘅一次。因為想畀只去過兩次嘅 Raymond 一次過感受澳門嘅多姿多采同充滿童年回憶嘅地方,所以並無刻意去搵景點同美食,反而加入咗唔少由細去到大嘅地方。呢個旅程唔再單純「返鄉下」、唔再為工作,令我重新感受澳門。澳門其實好特別,雖然不停變,特色街道同小店仍然存在,但又可能會隨時消失,新舊交替下,形成獨有嘅一面。



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。