之前一路掛住去商場玩，都未有時間寫番聖誕節去澳門嘅遊記，今日終於坐定定寫下。可能你會問，4日假咁長，點解會去澳門而唔係台灣呢？因為親戚屋企啱啱裝修好，所以就決定過去窮遊兼渡假啦！第一日我就去咗每次必去嘅下環街市同 光影節 2016 感受聖誕氣氛啦！
下環街市尋隱世美食
身為半個澳門通嘅我依莉詩，第一站就係去下環街市搵食！呢度可以話係平民美食集中地，廿間左右小店，樣樣都又平又好味。雖然自從大部份小店由街邊搬咗上街市二樓熟食市場之後，風味有啲唔同咗，唔少鋪頭都晏開早收，亦無以前咁熱鬧，不過就乾淨咗唔少，可以一次過坐低食齊唔同嘅小食，都幾好架！
▲ 由司打口行去下環街都有唔少街頭小食，估唔到俾我搵到有小販賣香蕉糕！
▲由細到大每次過澳門都一定會食香蕉糕。呢款香蕉糕同香港食嘅唔同，雖然睇落似雞蛋仔，但會散發陣陣香蕉味，脆卜卜好香口。其實一啲都唔出名，但我就覺得呢樣先係澳門特色小食囉！
▲嗱～口味嘅嘢人人唔同，Raymond 第一時間就買咁煎釀三實同大大隻炸雞脾啦！(知你肚餓啦～洗唔洗食成咁呀！)
▲ 熱氣成咁！真係唔多啱我～
▲ 都係食碗茶果湯比較實際。茶果湯有啲似十八座狗仔粉，不過啲粉比較軟身同無乜料，不過幾好味嘅，特別係上面嘅豬油渣 。(乜豬油渣唔係脆卜卜架咩？呢碗茶果湯又面嘅豬油渣點解淋架？哈哈～唔理了！照食！)
▲ 雖然呢度仲有豆腐花，蕃牛通，牛雜等等…不過冬天都係食番碗雪耳糖水潤一潤！
▲想提提大家，如果想食多幾間，最好就1點後7點前去，因為大部份鋪頭都晏開早收架！
不一樣嘅澳門夜景
食飽飽過後就係 3小時萬里長征，亦係今個平安夜嘅重點活動－澳門光影節
▲澳門半島唔係好大，今年光影節避開晒啲遊客區，所以無乜人，就係去嘅都係本地人多。由 7點出發，慢慢行，行3個鐘都可以去得晒。
第一站－媽閣廟
▲ 第一站選擇咗去媽閣廟，雖然係平安夜，但就無乜人，放腳架影大環境都無難度。
▲ 不過相比起上年大三巴嘅 3D投影，媽閣嘅投影實在太細了吧!?
▲ 加咗聖誕裝飾嘅碼頭影落特別靚！(唔知有冇留意我條裙呢？係Raymond 整畀我嘅聖誕禮物，一路行，好多人都讚條裙閃得靚呢！)
第 2站 – 港務局大樓
▲ 行上兩步就到光影節第2站 – 港務局大樓。呢到只有幾個光管砌嘅幾何圖形，好多人望兩眼就走了，我哋算係留得耐了！用唔同角度睇，其實都幾得意嘅。
▲ 尤其話呢啲係聖誕佈置，不如話係藝術裝置。
第 3站－鄭家大屋
▲ 之後分多 3分鐘左右就到鄭家大屋，坦白講，夜媽媽入去都幾恐怖。好彩大家都食完飯，開始多番少少人..
▲ 好多小朋友都被呢個投射落地下嘅跳飛機吸引，不過背景嘅紅燈依然都…
▲ 除咗燈飾同表演，光影節仲有啲互動遊戲。呢個搖搖板就係要同另外兩個搖搖板嘅人比賽，同一時間內搖得最多下就贏，好講合作架！
第 4站－亞婆井前地
▲ 轉個轉就到亞婆井前地，亦因為開始多人，用唔到腳架影相了。呢度嘅佈置好怪，特別係啲樹一枝枝咁。
▲ 呢個表演流流地，都係 3D投影，不過只係投射係個平面布幕，無乜特色。
▲ 呢條瀑布燈睇都係唔錯嘅影相位！
第 5站－聖老楞佐教堂
▲ 而對面聖老楞佐教堂咁啱做緊彌撒所以入唔到去，唯有係樓梯影下相。
▲係樓梯旁影張杷當到咗！
第 6站－南灣雅文湖畔
▲ 行多5分鐘就入到南灣開始感受到聖誕嘅熱鬧氣氛，要排隊影相啦！不過啲裝置燈光比較暗，好難影得明顯。
▲最後嘅三個景點幾乎連埋一齊，中間嘅市集好早就收檔了。
第 7站－南灣湖景大馬路
▲ 成條路都係燈，如果有支 50mm 係度就可以玩好靚嘅雪花散景了，可惜可惜。
第 8站－南灣湖中心
▲ 係南灣湖中心嘅投射表演好特別，而且好精彩呢！
▲ 我變！呢棵樹咁似上年 K11 嗰祼嘅？仲要一樣可以用app控制出現咩圖案架添！？
▲ 有時間要影聖誕裝飾一支閃光燈未必夠，多一支可以校色調溫嘅 LED 燈，成個 feel 唔同晒。不過就搞到好大陣仗咁，為咗影呢張相，唔知幾多人經過都望過嚟。
▲ 今年光影節比起 2015年其實普通咗，不過因為遠離遊客區，行得舒服咗。就算唔係光影節，南灣同媽閣廟嘅夜景其實都好醉人。夜晚食完飯去其中一度散下步應該都唔錯。
福隆新街食宵夜
行完成條光影節路線有啲肚餓，但都成 10點幾，舊區好多食店都關咗門，於是去福隆新街搵下有咩宵夜。畀我哋搵到間收 11點嘅，臨收工都仲肯整啲熱辣辣嘅嘢比我哋食算係咁啦！
▲ 呢個芝心豬扒包好豐富，除咗豬扒仲有芝士、火腿同蕃茄，
▲ 合桃胡湯丸都唔錯，好滑同濃郁，記得好耐以前姨媽都請過我食呢！
快啲 click 入去睇埋晒 Day 1-4 嘅分享吧！
- 【澳門】拍住拖遊澳門半島！下環街市隱世小食 X 夜遊光影節
- 【澳門】探索氹仔新與舊！官也街中伏店 x 免費搭永利纜車 x 夜遊巴黎人
- 【澳門】單車路環半日遊！食住葡撻睇日落 x 豪食乳鴿葡國菜
- 【澳門】居高臨下飽覽澳門城區！參觀可能係全世界最細嘅動物園同最短嘅纜車
【延伸閱讀】
