日本人放工都鍾意去居酒屋飲番杯，放低番工嘅壓力先番屋企。而當中宮崎連鎖居酒屋塚田農場居酒屋就係唔少當地人經常去嘅好地方。特色係蔬菜都由農場直送，走地雞亦相當出名。最近呢間居酒屋係香港都開咗第一間分店啦！胃食嘅 依莉詩 我梗係要去試下啦！
食完「美人」菜式做美人
一路以為居酒屋都係男人嘅地方，但睇到個餐牌就覺得好搞笑，好多都係用「美人」做開頭。有美人鍋、美人卷，美人甜卷。食咗會唔會變美人就唔知，不過唔少日式餐廳嘅美人鍋都係普通湯底加濃縮骨膠原而成，而呢度嘅湯底就用雞骨烹煮 8個鐘而成，震騰騰嘅湯底充滿骨膠原。至於美人卷就係用米紙包住香港種嘅水耕菜或者福岡久保田農園直送嘅菜，食材都非常新鮮。
▲ 下午茶組合 $348/2人用
三心兩意嘅我最有興趣就係呢個下午茶組合，鹹甜點放係兩層架上面，加上維港景色，就係好有係酒店食 Tea 嘅感覺。每一款份量少少，但就可以一次過食齊 3 款甜品、美人甜卷、美人卷、壽司卷、一口漬物 同 櫻花煎茶。同西式 Tea 唔同，大部份都以蔬菜為主，同好姊妹一齊食就唔怕肥！
▲ 美人卷有好幾款，米紙會包住鰻魚忌廉芝士、三文魚牛油果、吞拿魚長芋、海老牛油果 或者 雞肉炸茄子。可惜 Tea Set 無得揀，是日係邊款就邊款，不過全部都好清新爽口呢！
▲ 燒汁團子鹹鹹地，而枝豆蓉團子就甜甜地，食落好煙軔。
▲ 培茶同抹茶 Tiramisu 上面有厚厚嘅茶粉，下層係豆乳慕絲同海綿蛋糕，好滑好輕巧。
▲ 美人甜卷同樣同米紙包士多啤梨、西柚、白玉、紅豆。甜甜酸酸嘅西柚同士多啤梨恰好中和咗白玉同紅豆嘅飽滿感。
▲ DIY 壽司卿膳 $138
平時叫壽司都係一件件上，而呢個 DIY 壽司卿膳就係一碟碟材料放係度，俾你自己整壽司，小朋友嚟講應該好開心，有得玩又有得食嘛！不過一格格咁 courful，成個便當咁，真係想就咁食就算！
▲ 美人鍋 $320/2人用
呢個美人鍋同其他餐廳外加濃縮骨膠原唔同，湯底用雞骨烹煮 8個鐘而成，所以上台時係震騰騰，成個布丁咁，勁多骨膠原！最正係點呢個鍋會有專人埋位服待你，坐係到等食，最啱懶人。
▲ 湯底超濃雞味，再食舊雞脾肉好滿足！
▲鹽味炭燒走地雞 $180
去得居酒屋點都要食番啲燒嘢。呢個炭燒走地雞絕對係塚田農場嘅招牌菜。一入到門口就見到廚師贊雞油，啲火超高超有鑊氣！啲雞因為贊過 3次雞油，所以好香，雞肉十分彈牙，有少少炭味，送啤酒一流。
睇住維港夜景嘆美食
始終塚田農場都係連鎖店，好似話遲啲打算係香港開多十幾間。而作為香港第一間分店選擇係海港城開相當重本，一半位置都可以睇到維港景色，好有高級餐廳氣派。不過，因為接近郵輪碼頭，除咗郵輪客，平常人好少會經過，所以將來會係咩食客多，大家都心中有數吧！
塚田農場
地址：尖沙咀廣東道17號海港城海運大廈2樓OTE 202號舖
查詢：2467 0777
睇更多拍拖好去處！
FB： 依莉詩生活
IG： ErieDiary
網址：ErieDiary.hk
YouTube：Diary Erie