人氣日本餅店 Mon cher 登陸中環!OL 必食迷你堂島卷 X 宇治抹茶軟雪糕

平時食卷蛋都一條條買,要番到公司或者屋企先切開,唔多方便。最近人氣日本餅店 Mon cher 就係中環SOHO 區擺花街開設香港第 5間分店,仲特登為一眾 OL 製作迷你版堂島卷,可以拎住邊行邊食,一人一條!今次我依莉詩就一次過試咗幾款新產品同期間限定蛋糕,款款都唔同味,唔好揀錯啊!

香港限定堂島卷雪糕

Mon cher 之前係 SOGO 都食過一今次新分店最大特色就係多咗堂島手卷、雪糕芭菲杯同香港限定嘅宇治抹茶堂島卷雪糕,就連日本無推出過㗎!講番堂島卷點解咁特別啦!睇落雖然似普通卷蛋,不過忌廉嘅比例特別高,一卷嘅海綿蛋糕中間包住由北海道空運到港嘅牛乳忌廉,食落非常滿足!鍾意食忌廉嘅一定會鍾意!不過當然,要減肥嘅就⋯⋯哈哈哈⋯⋯

▲ 堂島卷雪糕 (原味/ 抹茶)$52

身為抹茶控嘅我,第一樣梗係試香港限定嘅宇治抹茶堂島卷雪糕,一杯有齊堂島卷同抹茶雪糕,啱晒我要求!雖然 $52 蚊杯有啲貴,不過雪糕用咗高級宇治抹茶粉調製,抹茶味相當濃郁又有層次,食落回甘帶少少苦澀,同中村藤吉有得揮!

▲ 堂島雪糕芭菲杯 $55

相比堂島卷雪糕,堂島雪糕芭菲杯更抵食!多幾蚊有多幾種口感。三種芭菲杯底可任意配搭牛乳或抹茶雪糕,想點配都得。抹茶堂島雪糕芭菲杯入面有抹茶凍、白玉、抹茶忌廉、海綿蛋糕同高級紅豆蓉,而Tiramisu堂島雪糕芭菲杯有意大利軟芝士、咖啡忌廉及海綿蛋糕,最後芒果堂島雪糕芭菲杯就有新鮮芒果,配芒果醬、堂島忌廉同海綿蛋糕,材料非常非常豐富。而我覺得抹茶雪糕配芒果杯底最夾,食完濃濃抹茶雪糕之後,食口感清新嘅新鮮芒果同海綿蛋糕,甜度啱啱好!

 

▲ 堂島手卷 (幸福の味/ 咖啡涷//夏日水果) $42

堂島手卷同招牌卷蛋糕尺寸少一半,直徑大概係嘉頓蛋糕咁寬,長嘉頓蛋糕少少,所以一手拎住慢慢咬就好方便!當然入面嘅餡唔會係嘉頓蛋糕咁乾憎憎啦!幸福の味入面係新鮮堂島忌廉包軟芝士蛋糕同特製吉士醬,濃郁的芝士味加上軟滑忌廉,飽滿感急升!而咖啡凍用香濃咖啡蛋糕配咖啡味忌廉,加上粒粒咖啡凍,咖啡超濃,咖啡狂一定要試。夏天食咁多忌廉可能會怕膩,而夏日水果入面加咗草莓、白桃及芒果做餡,甜甜酸酸又爽口,清新唔少!

 

▲ 白桃乳酪堂島卷 (夏季限定)$198、蜂蜜檸檬堂島卷 $208

除咗新品,又點少得招牌堂島卷,今次新店就率先推出白桃乳酪堂島卷同蜂蜜檸檬堂島卷。白桃乳酪堂島卷以酸忌廉帶出白桃清甜,而蜂蜜檸檬堂島卷剛剛相反,而甜忌廉配合激酸檸檬啫喱,兩者對味蕾都有一定衝激!

▲ Perrier 啫喱 (薄荷菠蘿/紅莓$38

最後兩款 Perrier 果凍杯,水旺旺嘅啫喱配上新鮮水果,好有夏日 feel 呢!

 

Mon cher
地點:中環擺花街25號中環大廈地下

大坑 2大呃 Like 甜品! 粉色棉花糖燒 x 彩虹沖繩鹽刨冰

元朗 4大人氣食店!必食北海道布丁燒 X 啖啖肉無骨雞翼包

睇更多拍拖好去處!
FB: 依莉詩生活
IG: ErieDiary
網址:ErieDiary.hk
YouTube:Diary Erie



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。