5萬呎水產市場登陸黃埔!九號水產 4大食店率先睇 – 蟹痴必掃北海道皇帝蟹

香港人一向鍾意食日本菜,繼上年灣仔開咗個築地山貴水產之後,黃埔嘅「 九號水產 」亦會係星期五(16/6)初步開幕。5萬呎水產市場入面將會有十幾間日式餐廳,有外賣有堂食,仲有超市同活海鮮等你買番屋企!

雖然開幕初段只有 4間食店初步開幕,不過入到去就好似去咗台灣上引水產一樣,充滿濃濃海水味呢!就等我 依莉詩 率先帶大家走一轉吧!

5萬呎水產市場 – 滿足食玩買

成個商場咁大嘅漁市場入面可以話有齊食玩買 3個重要元素,十幾間日式餐廳將於未來三個月內陸續開幕,由高級嘅懷石料理、蠔吧、酒窖到潮爆嘅冬甩壽司、卡通主題咖啡室同日式甜點麵店都一應俱全。媽媽可以到超市同海鮮大街掃新鮮食材,小朋友亦可以到探知館試下網網千斤嘅滋味,無論大人細路都可以留足大半日呢!

▲ 一入到去就見到大大隻「九號水產號」,展出昔日香港水上人嘅日常衣食住行嘅實體展品,仲有得體驗漁夫網網千斤嘅興奮呢!

1) 直送生猛巨蟹 – 懷石料理一蟹多食

蟹痴都應該去過日本食蟹道樂,全蟹懷石料理真係令人一去再去!而九號水產亦有主打活蟹料理嘅食店。呢間「蟹筵」每星期 5日都有活蟹由日本、阿拉斯加同太平洋北部白令海直送抵港,大大隻鱈場蟹同毛蟹放係蟹缸生猛新鮮,非常吸引,睇見都流晒口水!

 

▲ 全蟹宴套餐 $1,388/位(兩位起計)

不過,價錢方面當然係係日本食咁平啦!10道菜嘅全蟹宴套餐包括:鱈場蟹天婦羅、鱈場蟹刺身、鹽燒鱈場蟹等等 ,就要每位盛惠 $1388。唔係大時大節真係好難食得起呢!

▲ 呢隻蒸北海道毛蟹即叫即劏,唔單止保留原始鮮味,淡淡肉之餘沾埋蟹膏一齊食,雙重享受!

▲ 呢個冷凍啫喱由鱈場蟹肉同蟹身煮成,上面加上芥未蟹籽同北海道海膽,濃濃鮮味係口腔徘徊,好滿足呢!

蟹筵
營業時間:星期一至五12nn-3pm,6pm-11pm;星期六、日及公眾假期12nn-11pm
備註:須先以電話訂座

2) 米芝蓮餐廳載譽歸來 – 精選 Omakase

覺得「蟹筵」都未算高級?另一間重量級坐鎮嘅餐廳就啱晒你!「翔太壽司」曾經係 2002年開店,更加獲米芝蓮推薦。如今載譽歸來,不但繼續以 Omakase 為主打,師傳每日精選多款由築地或九州漁市場直送新鮮海產,為客人打造刺身、燒烤、天婦羅、魚生丼。為精益求精,餐廳只有少量坐位,亦要先預訂先有得食,餐廳更有香港少見嘅魚生熟成櫃,讓刺身有充分時間熟成,食落更有魚味!

 

▲ 大廚發辦(Omakase)$780/位起

「翔太壽司」作為高級壽司亭,餐單每日都係師傳按當日來貨製作,不時不食,當然價錢都有番咁上下啦!

▲ 熟成咗 3日嘅吞拿魚,魚味份外濃郁,而且質感柔滑,入口甘香即溶,難怪單點都 $120一件。

▲ 前菜都唔簡單,銀杏、螢光魷魚、蕃茄,款款都精心製作。

▲ 刺身方面用咗唔少高級食材,呢隻三陸岩蠔就超級肥美。

▲ 甜品係靜崗溫室蜜瓜,睇見就知好多汁呢!(可惜得個睇字,真係好想靜靜雞咬淡!)

翔太壽司
營業時間:12nn-2:30pm;6pm-11pm
備註:Omakase 須提早一天訂位

3) 有得玩又得食 – 和食居酒屋

見識完兩間高級餐廳,係時候去番啲平民化嘅餐廳大刷一餐!「饒之味居酒屋」走輕鬆風格,有得食有得玩。門口有個大 LED 魚缸,小朋友可以係等餐嘅時候為魚仔填顏色,再到魚缸放生,睇住自己條魚係LED 魚缸游,好有趣呢!至於食物方面,為咗向元祖級大師西村弘美先生致敬,唔單止用正宗嘅和食料理烹調方法,將日本漁村農莊食材入饌,更請來跟隨西村先生 20年嘅何志東師傅坐鎮。一齊品嚐咩係西村風味吧!

▲ 等嘢食嘅時候可以填顏色同放生自己嘅作品去魚缸呢!

▲ 吞拿魚皮凍 $58/客

鹹味啫喱食過未?呢舊豐富骨膠原嘅吞拿魚皮凍用咗去掉碎骨雜質後嘅魚皮濃縮所得,味道濃郁,鹹中帶酸帶辣,刺激味蕾。

▲ 煙肉芝士燒生蠔 $48/客

居酒屋更要有佐酒小食,呢碟燒生蠔被煙肉芝士包住,味道濃郁有層次,生蠔入口飽滿,加上芝士嘅 Creamy,食到講唔到嘢呢!

▲ 蕪菁真丈 – 「西村的味道」$78/碗

呢碟睇完個名都唔知係咩嘅菜式,原來係懷石料理中一頁巧手菜。蕪菁係日本大頭菜,去皮磨蓉加入蛋白、鮮白果、蝦粒、三葉、百合同枝豆製成,食落腍甜清爽,口感獨特。

饒之味居酒屋
營業時間:11:30am-3pm,6pm-10pm

4) 小朋友都愛 – 七彩冬甩壽司

壽司點止大人嘅專利,小朋友一樣喜歡。「頣之味」分開壽司吧枱同自助堂食兩個區域。自助堂食區嘅壽司七彩繽紛,更有美國、東京最流行嘅冬甩壽司,刺身配上牛油果,外表吸引又食得健康!

▲ 冬甩壽司 $35/客

呢款冬甩壽司係美國、東京潮爆美食,刺身配上牛油果,色彩繽紛,非常吸精!

▲ 繽紛壽司杯 大杯$38-68、小杯$28-38

為方便邊行邊食,仲有繽紛壽司杯,魚生壽司就有吞拿魚、牛油果、雜錦魚生、三文魚、油甘魚,而熟食壽司就有,燒玉子+蟹柳+粟米粒、青瓜+熟蝦+粟米粒、鰻魚+蟹籽+粟米粒。一層一層,同樣七彩繽紛。

頣之味
營業時間:11:30am-10pm(壽司吧吧枱),11:30am-9:30pm(自助外賣區)

5) 產地直送 – 海鮮超市

除咗食店,更有由新華日本食品主理,佔地近 7,000呎的優質食材專賣店。食材店將食材分成 3個區域:「慢煮區」、「快煮區」、「易食區」,方便愛下廚嘅朋友。當中七成貨品從日本產地直送,唔少係獨家發售,急冷水產、當造蔬果、米糧麵食都有。雖然九號水產對面就係 Aeon,不過買食材都要嚟逛一逛吧!

▲ 主打日本急凍四大名蟹,不但可以解凍即食。開業首三天(16/6-19/6)只要係「九號水產」嘅 Facebook 預訂就可以用$589 買急凍鱈場蟹,超抵呢!

▲  粒粒直徑有 2cm 大嘅墨西哥有機藍莓 $69.9/盒,開幕優惠仲要盒 $49.9,一個字,抵!

 

▲ 北海道福祿壽米係呢度獨家㗎!

九號水產食材專賣店

營業時間:10am-10pm

6) 包劏包洗 – 七千呎海鮮大街

呢度唔簡止有急凍海鮮,仲有佔地 7,000呎嘅海鮮大街,25個巨型水缸,每個濾缸都有由日本、澳洲及東南亞到港嘅生猛海鮮。而最正嘅係提供一站式劏、洗、切處理服務,買番屋企就可以即煮即食,手殘都搞得掂!

 

▲ 不過開業初期,海水系統仍在調整中,所以海產品種唔多,暫時以龍蝦和海斑為主。

依莉詩小總結

香港人一向貪新鮮,之前灣仔築地開嘅時候人潮不斷,但依家就好靜了。現在再嚟一個強勁對手,真係不得了!雖然九號水產未開晒,不過從規模同種類嚟睇,九號水產都遙遙領先,拍得住台灣上引水產。日本菜幾時都有佢嘅市場,相信只要 Keep 得住食物質素,就算人潮過咗,應該都會有一定人流。大家開晒之後一定要去試下呢!

 

九號水產(2017年 6月 16日 開幕)

地址:紅磡德豐街8號黃埔花園第九期地下

營業時間:10am-11pm

銅鑼灣 SOGO 地庫重開!5大人氣日本過江龍進駐 必食香脆海鮮煎餅 + 鹿兒島彈牙魚餅

Oisa 魚籽滿到瀉!北海道直送魚生丼飯大滿足

 

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。