一年一度嘅「美食博覽」下個月就開鑼啦！唔少人嘅印象都係 $1 鮑魚同夾龍蝦遊戲，但現場有成 1500個參展商，又點會得咁少嘢睇？出咗名係吃貨嘅 依莉詩 我，當然密切留意有咩好嘢食，有咩平嘢掃。早幾日嘅記招就來一個大晒冷！
必試特色食品
入到場，試食一定係重要環節，除咗免費試食之外，仲有唔少「會場價」美食，試完可以買埋番屋企。每年都會食到好飽呢！而今年嘅有唔少正嘢可以即場試食呢！
1) 3米長拉芝咸牛肉多士
雖然咸牛肉罐頭唔係咩貴嘢，一塊芝士咸牛肉多士要成 $35 ，係美食展未必係抵食，但芝士迷一定唔可以錯過！外脆內軟嘅多士夾住咸牛肉碎同厚厚嘅芝士。一啖咬落去唔止滿足，仲可以拉絲拉成米都唔斷，超有視覺效果呢！
攤位：遠太貿易有限公司 1A-D02
▲ 長長嘅芝士拉絲夾住少少咸牛肉碎，少少鹹又唔漏。雖然唔係貴食材，普通茶餐廳都可能有得食，但呢件整得係好食呢！
2) 黑松露長洲大魚蛋
長洲大魚蛋嘅彈牙相信已經迷到唔少人，而呢個仲要淋上黑松露忌廉醬/韓風松露醬($20/2粒) 或者 黑松露醬 Raclette 熱熔芝士 ($35/2粒) ，濃濃嘅黑松露同芝士味，非常吸引呢！
3) 免費試食即煮和牛
入到場其中一個目標係試食貴價食材，除咗鮑魚、海參外，日本畜產物輸出促進協議會就會每日即場示範煮和牛、日本豬、日本雞蛋、日本牛奶、日本雞肉，全部都有得免費試食㗎！我食咗兩片鹿兒島牛肉，真係入口即融，好嫩滑呢！
攤位：日本畜產物輸出促進協議會 5B-C30
4) 無肉之未來漢堡
和牛矜貴，「未來漢堡」就夠特別。呢塊漢堡係 100%純素，由非基因改造嘅天然植物中抽取與真漢堡對應的成份，如碗豆、紅菜頭汁及椰子油等。食落質感軟身，加埋醬汁之後，味道真係幾可亂真㗎！
攤位：Common Good Trading Limited 3B-E12
▲ 試食完，可以用會場價 $75/盒（兩塊）買番屋企慢慢鋸。
5) 札幌名物卡通布丁燒
布丁燒係香港未算普及，不過係元朗食過一次，覺得好好食。雞蛋布丁到加上乳酪輕芝士蛋糕，再淋上焦糖漿，蛋味濃郁，加上焦糖輕甜不膩。而出名做卡通人物甜品嘅山下菓子今次就將布丁燒燒上 Melody 、Little Twin Stars 同蛋黃哥圖案，會試試食價 $35，唔算太貴，每日限量 400杯。
攤位：山下菓子 3B-F03
▲ 除咗見慣慣熟嘅卡通卷蛋同馬卡龍，仲有粉紅兔兔同粉紅屎屎外型嘅白桃味乳酪手工雪條， $48/條，$80/2條，原價買 5 送 1。
必掃 $1 福袋
講到美食展最受歡迎梗係 $1 美食，唔少人都會為咗戰利品而排通宵，相信今年都唔會例外。參展商分別推出$1 福袋接鮑魚、$1 玩遊戲終身免費食榴槤月餅、$1 燕窩等。留意以下個表，睇下有咩啱吧！
| 參展商 | 優惠 | 數量 |
| 醉榴香 | $1「剷水晶月餅」遊戲，享一世免費食貓山皇榴槤月餅 | 首日頭3名 |
| 安記海味 | $1接鮑魚福袋 | 首日頭10名 |
| 御燕軒 | $1一片即燉純淨燕窩 | 首日頭10名 |
| 香港優質標誌局「Q嘜」 | $1 Kinox建樂士不銹鋼平底鑊；$1雙喜牌百花蜜；$1 Clip Fresh密實保鮮盒 | 限量5個及30個 |
| 高格行有限公司 | $1購物車，內有20盒韓國百濟越式牛肉味米線；$1玩「金輪大運轉」遊戲，大獎為3,500元旅遊禮券及台灣果園入場券 | 限量10部及大獎1名 |
| MAMA | $1購買（原價$88）泰國公仔麵福袋 | 首日頭10名 |
| 榮華月餅 | $1徒手一次任拎迷你冰皮月餅 | 每日頭20名 |
| Dolci | $1 一盒八件裝低糖蛋黃奶黃月餅 | 首日頭 50名 |
| 天然有機食品公司源田 | $1一盒羅漢果月餅 | 首日頭10名 |
| 陳記點心 | $1100粒魚蓉燒賣；$1 22粒粉果 | 每日頭 10名 |
| 黃飛紅 | 購買滿 $100，以 $1 換購 100包 15g黃飛紅麻辣花生 | 每人每日限量發售 |
| 高盛有限公司 | $1日本信州香印提子 | 每日100杯，於2pm開始發售 |
| 金京發展有限公司 | $1一支德國有機手工啤；$1一條德國腸仔 | 每人每日限量發售 |
| ALQ | 購買滿 $50，以 $1 換購 ALO蜂蜜原味 500ml / 山竹芒果味 500ml | 每日首 20名 |
1) 一蚊搶鮑魚福袋
$1鮑魚就年年都有，今年安記海味就搞咗個迎「鮑」接「福」活動，首日頭 10位可以用 $1 玩遊戲，分為2隊，每 5人一隊，每隊派2人作賽，其中 1位走入巨型福袋，向外拋出裝著鮑魚模型之小福袋，另1位接到幾多就可以得到幾多鮑魚福袋，每個福袋有值 $480嘅鮑魚、花菇等6款食品呢！
攤位：安記海味 1C-B10
2) 1蚊低糖蛋黃奶黃月餅
Dolci 嘅雪糕一向都好吸引，今次首日頭 50名可以 $1 買到一盒八件裝低糖蛋黃奶黃月餅。
攤位：Dolci 3E-C05
3) 1蚊羅漢果月餅
傳統月餅一向都好肥，唔知用羅漢果糖整嘅月餅又會唔會健康啲呢？首日頭10名就可以用 $1 買一盒啦！
攤位：香港源田實業有限公司 3E-D18；3B-E22
4) 泰國食品福袋
泰國食品又啱唔啱口味？$1個福袋都有齊咖啡、粉絲等泰國食品。咁抵～可以買番個試下啊！
攤位：寶泰食品(香港)公司 1D-C27
5) $1試食日本香印提子
未必樣樣 $1 美食都係第一日先有，$1 日本信州香印提子就每日100杯，於 2pm 開始發售。
攤位：高盛有限公司 1D-E02
6) 1蚊嘆啤酒德國腸
而德國手工啤酒同德國腸都可以用 $1 試到呢！德國腸烤熱咗外皮脆脆哋又有肉汁，送啤酒一流！
攤位：金京發展有限公司 3E-A04
新款月餅迎中秋
因為美食節係 8月舉行，所以其中一個焦點就係月餅。各大參展商都會把握機會推銷新款，好多都會有特價呢！我年年去都會掃平價月餅番屋企食㗎！
1) 九型人格月餅
最近九型人格嘅廣告成日播，相信大家都會睇過，每次睇到尾先知係介冰皮月餅始祖大班推出九型人格冰皮月餅。九款當中，冰皮白珍珠紫甘薯月餅入面嘅一粒粒白珍珠充滿彈牙口感，配上紫甘薯淡淡甜味，可以話最特別呢！
攤位：大班麵包西餅 1C-E02
2) 奇華現烤奶皇月
記得上年試過嘅新口味月餅當中，最好食就係柚子奶黃月餅。今年奇華就推出芝士奶皇月，將芝士融入奶皇月餅，多咗份濃郁味道。另外，仲有會場限定現烤新口味「奶茶奶皇月」同「咖啡奶皇月」，一齊食未變鴛鴦囉！
攤位：奇華餅家 1D-D02
3) 朱古力脆皮意式雪糕月餅
雪糕月餅好多時都大大個，要分幾次先食得晒，而 Dolci 今年推出四款朱古力脆皮意式雪糕月餅細細個，一次食一個。非常簿脆嘅朱古力，內裡包住咖啡、荔枝玫瑰、開心果及海鹽焦糖味雪糕，不會太甜，食完一個想繼續食呢！
攤位：Dolci 3E-C05
4) 可愛貓棉花糖
呢個貓貓棉花糖雖然唔係月餅，不過實在太可愛，不得不提呢！一盒棉花糖入面每粒都由日本雜貨品牌Felissimo貓部日本師傅人手製作，每一粒都唔同樣。無論係咪貓奴都會鍾意呢！
攤位：Kwok Nung Trading Limited 3B-F06
香港貿發局美食博覽2017
日期：2017年8月17至21日
時間：10:00-22:00
票價：$40
套票於指定7-11、OK便利店、快達票售票網、Tap& Go「拍住賞」手機錢包及現場有售
**同場還有家電‧家品博覽、國際茶展及美與健康生活博覽
睇更多拍拖好去處！
FB： 依莉詩生活
IG： ErieDiary
網址：ErieDiary.hk
YouTube：Diary Erie