始終身份唔同咗，最鍾意去商場活動嘅我 依莉詩 無得再話去邊就去邊。不過就發現平時夏日檔期，大小商場都出盡奇招吸客，但今年唔知點解好多商場都唔大搞。論影相位好似得 mcp 嘅小雲 x 龍珠比較新鮮，論互動都係得幾個場有新意。
前幾日我就趁轉工期嘅一日空檔去咗樂富玩啦！而吸引到我去嘅呢～就係 12款怪味雪糕！熊仔餅妙趣、蔗汁味、五花茶味及凍檸茶少甜味聽到都覺得怪！食落就更怪！最緊要係排隊玩遊戲，贏咗就有得免費食啦！
挑戰雪糕身手，免費食雪糕
呢個世界係無免費午餐嘅，想食免費雪糕除咗要排隊，當然要付出汗水！今次活動有兩個遊戲等你挑戰，比較簡單嘅奇趣跳「糕」機，只要發揮彈跳力係3.5米高嘅跳「糕」機拍下按鈕，拍到幾高就有幾多球雪糕！輕輕鬆鬆就贏到最多 5球雪糕！不過要食怪味雪糕就要更高難道！要係指定距離將巨型健身球球投入籃內，成功「過三關」先得一球呢！
▲ 呢個「雪糕當入樽-籃球九宮格」唔單上考眼界，仲好參體能添！要打得個波高，少啲手力都唔得㗎！玩完真係身水身汗！
*星期一至五每日限量 200 球雪糕，星期六及日每日限量500 球雪糕，先到先得，換完即止。
▲ 呢個奇趣跳「糕」機絕對係為我呢啲未到 150cm 而設，事關分咗 150cm 以下／150cm 或以上兩個難度，所以輕輕一跳就得到 5球五球了！呵呵！
*星期一至五每日限量 600 球，星期六及日每日限量 1500球，先到先得，送完即止。
「十二道雪糕味」Wasabi 味最刺激！
講番嗰「十二道雪糕味」唔係話食就有得食，要7 月 12 日至 8 月 27 日期間嘅星期六及日，挑戰「雪糕當入樽-籃球九宮格」，過一關先得一球，一次得 5個波，所以最多都係得 2球雪糕咋！所以諗定食咩味啦！我覺得當中 Wasabi 味最特別，甜中帶辣好刺激，而話梅味就酸酸鹹鹹好奇怪，最搞笑係五花茶味食落似紅豆味。至於蛋撻味同熊仔餅妙趣算正常，加咗啲粒粒有口感。
▲ 熊仔餅妙趣、蔗汁味、五花茶味同凍檸茶少甜味都係首創味道，點都要試下！
▲ 有啲係雪糕有味係雪葩，都好快溶，要快手食呢！
巨型窩夫影相位
呢個場又嘢食又嘢玩，都唔會諗有太多影相位，不過呢個巨型窩夫入面放滿彩色雪糕 cushion，影出嚟夠晒夏日繽紛呢！成班朋友走入去影相一定好靚！
▲ 見到咁多 cushion，好想玩番場枕頭大戰呢！
雪糕大滿灌
日期：2017 年 7 月 12 日(星期三)至 8 月 27 日 (星期日)
開放時間：下午 12 時至 8 時
地點：領展樂富廣場 A 區 3 樓 9 號橋 (近 UNY)
睇更多拍拖好去處！
FB： 依莉詩生活
IG： ErieDiary
網址：ErieDiary.hk
YouTube：Diary Erie
【延伸閱讀】
