銅鑼灣 SOGO 地庫重開!5大人氣日本過江龍進駐 必食香脆海鮮煎餅 + 鹿兒島彈牙魚餅

銅鑼灣 SOGO 地庫向來多人氣美食,幾年前一件芝士撻足以令人不惜排足兩個鐘食一件。今日 SOGO 地庫裝修後重開,超市引入 40幾間新店,當中仲有 10間日本嚟到嘅過江龍,間間都係人氣之選!睇怕好快又會掀起新一輪排隊潮!我 依莉詩 收到消息梗係第一時間去食食食啦!宜家就等我介紹 5間我覺得最好食嘅畀大家啦!

1) 晴空塔最脆口海鮮餅

一入到去食街就畀香噴噴嘅海鮮餅同靚仔師傅吸引住。師傅好識搞氣氛,一路燒一路用日文叫喊,好有氣勢。越前海鮮俱樂部係東京晴空塔做基地,今次係日本以外首間店舖,你話我哋幾有口福呢!靚仔師傅帶嚟嘅就係用新鮮魷魚、八爪魚、甜蝦、帆立貝等烤製嘅海鮮餅。海產經過 450度高溫壓成,不經油炸,香脆又能保持鮮味,比起食薯片健康多呢!

 

▲ 章魚餅 $30

章魚原隻入粉烤製,同粉比例啱啱好,脆口唔會太多粉,保持到海鮮嘅味道。如果要用葵廣比,雖然係細塊啲,但就係貴精不貴「大」。食完真係想買袋裝番去邊打文邊食啊!

越前海鮮俱樂部

地址:崇光百貨B2樓29號舖

2) 江之島法式鹹批

香港蛋撻出晒名,原來江之島流行食法式蛋批。Quiche Yoroizuka 由 4月係江之島開店後?間紅起嚟,日賣2000個以上,超受歡迎!今次甜品大師鎧塚俊彥師傅就帶咗 3款鹹批同 2款甜批嚟香港,當中朱古力甜批仲係香港限定添㗎!

 

▲ 龍蝦汁蝦肉批 $30

呢個龍蝦汁蝦肉批一砌落去就非常香,入面嘅蛋混合龍蝦汁,鮮甜嫩滑,加上爽口蝦肉,連我對蝦有敏感嘅人都忍唔住食咗大半個呢!

▲ 羅蘭士(野菜、煙肉)批 $25

羅蘭士批入面放滿蕃茄、車打芝士、煙肉、甜椒,味道有少少似 pizza ,但混合大量蛋汁,多了一份軟熟感,食落更飽肚滿足。

▲ 鎧塚厄瓜多爾可可農場朱古力批 $28

朱古力批係香港限定,起初以為係流心嘅,但原來唔係,而且批皮比想像中厚,好彩食落都唔會好乾,中間軟熟,朱古力味香濃,甜度適中,怕食甜嘅都唔怕。

 

Quiche Yoroizuka

地址:崇光百貨B2-15C舖

3) 鹿兒島彈牙魚餅

另一間揀香港做海外第一間分店嘅人氣小食,就係鹿兒島名物「玖子貴」,今次帶嚟 10款人氣薩摩魚餅,包括必食「流心蛋魚餅」、「北海道粟米魚餅」、「明太子醬小丸魚餅」、「鹿兒島安納芋甜番薯魚餅」、「鹿兒島甜蝦芝士魚餅」、「香蔥檸檬鹽魚餅」等等。全部人手即搓即炸,價錢由$23-29不等。雖然即炸,但油份不多,亦因為加入了蓮藕、粟米等蔬菜,增加口感,同港式魚餅完全唔同。

 

▲ 流心蛋魚餅 $29

10款魚餅當中,「流心蛋魚餅」最有驚喜,彈牙魚餅包住半熟流心蛋,一咬爆醬,好滿足。而魚餅加入蓮藕,食落更有口感。

玖子貴

地址:崇光百貨B2-15A舖

4) 重於內涵神戶牛肉批

「相機食先」係常識,但呢個神戶牛肉批就未必影到靚相。牛肉批同店鋪一樣重內涵,Kobe Beef Meat Pie 係 Juchheim 嘅隠藏品牌,而牛肉批外表同普通餅店嘅酥皮批差唔多,但入面係神戶牛肉做,牛味特別濃郁。

▲ 神戸牛肉批 $38() $21()

牛肉批以層層鬆脆酥皮包住免治神戶牛同洋葱粒,雖然口感略嫌遜色,但肉汁滲透酥皮內層,牛味超濃。

Kobe Beef Meat Pie

地址:崇光百貨B2樓14C號舖

 

5) 北海道難忘甜品

Petite Merveille 係北海道函館人氣甜品店,其中一口芝士蛋糕「Mel 芝士蛋糕」更連續 6 年獲得「國際品質評鑑大賞金獎」。今次師傅帶嚟 3款卷蛋糕,分別是朱古力卷蛋糕($189)、抹茶卷蛋糕($189) 和 櫻花卷蛋糕($199),每件都係用日本當地食材,人手製作,所以每款每日只賣 20條咋!

 

▲ 櫻花卷蛋糕 $199

呢款櫻花卷蛋糕就最吸引我,只限 4-5月供應。粉紅色加上一塊櫻花葉,非常夢幻。蛋糕用米粉同麵粉製成,比海綿蛋糕多一點煙韌,啖啖櫻花香,清甜唔膩,同外表一樣,食落非常輕型,好啱濕笠笠嘅春季食。

Petite Merveille

地址:崇光百貨B2-14B舖

 

 

更多美食重返 SOGO

除咗呢 5間特別吸引我,場內仲有「杉養蜂園」、「chagama」、「黑船」等等,全新進駐嘅過江龍。另外,早前大熱嘅BAKE 芝士撻同 Croissant Taiyaki 鯛魚燒亦重返 SOGO,去之前一定要留定肚啦!

▲ Croissant Taiyaki 為新店推出蘋果酥皮鯛魚燒 ($15),蘋果清甜,加上酥皮甜蜜脆口,好似食蘋果批呢!

▲ Paul Lafayet 亦為新店推出限定抹茶脆餅 ($30),回甘嘅抹茶濃郁有致,不過就比較細笠,要食好多件先滿足呢!

▲ GODIVA 亦有師傅即製士多啤梨朱古力,夠晒甜蜜蜜。

入口即溶牛味濃!香港都有得食京都和牛 雅MIYABI

CHOCO + PLF服飾登陸 LINE FRIENDS 銅鑼灣店

各區美食精選!

死場不再!10間平民食肆進駐荃灣新 Food Court – 嫩滑手撕雞腸粉 x 醒胃麻辣串

粉色系呃 like 甜品團!食盡荃灣 3大潮食店 – 玫瑰士多啤梨窩夫 X 山形縣白桃厚班戟

大坑 2大呃 Like 甜品! 粉色棉花糖燒 x 彩虹沖繩鹽刨冰

5萬呎水產市場登陸黃埔!九號水產 4大食店率先睇 – 蟹痴必掃北海道皇帝蟹

旺角 1日 4餐,由朝食到晚!青檸烏冬係劣食?韓系日式吉列牛一定正?

銅鑼灣 SOGO 地庫重開!5大人氣日本過江龍進駐 必食香脆海鮮煎餅 + 鹿兒島彈牙魚餅

元朗 4大人氣食店!必食北海道布丁燒 X 啖啖肉無骨雞翼包

屯門潮食集中地!紅橋 4大不得不吃的小食+主菜+甜品

 

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie



About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。