同閨密去銅鑼灣行街，總係要坐低食個 tea 先完滿。而家除咗食奇蹟之班戟，希慎又有另一選擇，就係由滿記甜品旗艦店變身成嘅 Litt
最低消費 $130 食到乜?
好多時主題餐廳都有最低消費，今次 Little Twin Stars 甜品屋都唔例外，每位最低消費就要 $130，仲要唔包括加一服務費。如果當係食個糖水的話，聽落真係有啲令人卻步，不但以甜品外觀、質素同份量嚟講，當係一個 Tea set 又唔算太貴。以 $138 嘅星星 1人餐就有一份星之糕點、可愛糖水同繽紛飲品，3樣嘅份量都係正常甜品 size，無食正餐去都會夠飽。除咗 1人餐，仲有個 $274 嘅甜蜜2人餐，不過就得一份星之糕點、可愛糖水、 夢幻甜品同兩杯繽紛飲品。如果想影晒 Kiki 同 Lala 就要叫兩個一人餐了。
▲ 夢幻粉星層層蛋糕 ($88)
呢個夢幻甜品要叫 2人餐或者獨立叫先有，不過亦係咁多款入面最靚嘅一款，粉藍色同粉紅色星形蛋白蛋糕一層層疊起，加上雜莓、雪糕同 Little Twin Stars 造型朱古力牌，貌相滿分！食落亦好質，蛋白蛋糕軟綿綿，加上士多啤梨同芒果雪糕都好濃味，值得一試！
▲ 雲上的馬豆糕 ($48)
一件馬豆糕賣成 $48 好似好誇張，但佢以椰汁作雲海，加上幾塊蛋白脆餅做成雲海，仲有 Kiki & Lala 造型朱古力牌同彩色星星朱古力。單單係裝佈已經苦足誠意呢！
▲ Little Twin Stars 糖不甩 ($42)
傳統「糖不甩」變成粉紅同粉藍色已經好夢幻，仲要放係星形碟上真係好靚呢！不過以「糖不甩」嚟講，略嫌太少椰絲啦！
▲ Kiki藍莓豆腐花、Lala草莓西米露 ($48/1)
呢兩款甜品真係要拍埋一齊！Lala草莓西米露上面係粉紅色草莓沙冰，底層係西米露，士多啤梨味好濃呢！而 Kiki藍莓豆腐花上層係藍色雲呢嗱沙冰，底層係豆腐花，不過豆腐花質感有啲怪，硬硬哋，唔多似豆花呢！
▲ Kiki 蜜瓜鮮奶 ($58)
蜜瓜鮮奶上面有層厚厚忌廉，飲落好軟綿綿，仲有 Kiki 馬卡龍同星星曲奇，可愛滿分！
▲ 幻彩星空梳打 ($48)
呢杯以草莓、青檸、蝶豆花營造出漸層效果嘅梳打，睇落好浪漫，少少酸亦可以解走甜品嘅膩感。
▲ 餐紙都印有 Little Twin Star 圖案㗎！
▲ 每位都可以抽一個杯墊，如果儲齊 4款杯墊仲會送 1張特別版杯墊𠻹！似乎多人啲去食，儲齊嘅機會會大啲啊！
攞籌要等幾耐先食到？
食主題餐廳要排隊係常識，特別係新開無耐大家更加會趕住去試！Little Twin Star 甜品屋不設訂座服務，我係開業第一個星期六去，人真係好多，不過好彩比預期無排得咁耐。要注意用餐時段有幾個，每枱用餐時間75分鐘 (以入座起計)。攞飛嘅時間店員會先派一張籌，如果想快啲有得食就可以排隊等後補位，即係之前時段有人提早食完，你就可以入去。所以我哋 2點左右去到，攞到 5點飛，再排隊等後補，3點半就入到場。
唔食都可以打卡？
除咗食物，主題餐廳點都要有啲影相位，今次甜品屋因為係開放式設計，所以影相位都係出面呢！姐係話唔去食一樣可以影到！就好似門口嘅閃閃星大門同旁邊嘅甜品廚房都係影相位呢！
▲ 門口嘅閃閃星大門就有 Kiki 同 Lala 等緊大家，不過要影就要等一等，因為始終都係大門嘛！
▲ 旁邊甜品廚房就係另一個影相位，雖然只係紙板公仔，但場景都好前幻㗎！
▲ 另一邊廂仲有唔少粉色道具呢！
▲ 雖然受開放式嘅限制，但餐廳入面嘅佈置都幾靚，我最like就係上面掛住嘅一盞盞雲形燈，好特別呢！
▲ 入面仲有一個個紙板公仔，每張凳後面仲有粒毛毛星星畀你拆落嚟影相𠻹！
一定要食嘢先買到限定精品？
好多時主題餐廳都會有限定精品畀 fans 食飽之後去掃街，今次都唔例外，有多走 LittleTwin Stars 限定餐具廚具等緊大家。雖然精品車放係店外，不過部份精品要有餐廳收據先可以換領呢！所以想買精品，記得食完先去呀！
▲ 星星襟章 (換購價：$20)
精品種煩唔多，當中最平係呢款襟章，廿蚊有交易。
▲ Little Twin Stars玻璃小碟 (換購價：$196/2）換領日期：2018年2月8日起
當中最靚係 Little Twin Stars 玻璃小碟，透明碟上印有Kiki & Lala獨立圖案，重疊起來時又創造出另一組圖案，極具趣味！
▲ 星星廚具套裝 (換購價：$158/2) (供應期由2017年12月23日起)
做甜品嘅朋友都會有一支「孤寒刮」，呢款有粉紅同粉藍星星圖案嘅矽膠「孤寒刮」一定係你摯愛！
▲ 星星矽膠杯蓋套裝($89/2）
就算唔係食客，一樣有限定精品可以選購。呢款壓花矽膠杯蓋有壓花圖案，好可愛呢！
滿記甜品 x Little Twin Stars「手造甜品屋」主題甜品店
地址：銅鑼灣希慎廣場3樓318-319號舖
日期：2017年12月13日 至 2018年5月6日
營業時間：星期一至日上午11時至晚上11時
備註：不設訂座服務
堂食每位最低消費$130(佔座位計) (不包括加一服務費)
每枱用餐時間75分鐘 (以入座起計)
銅鑼灣美食精選！
蟹痴注意！$288 豪食海鮮自助餐 無限蟹膏蟹腳 + 每人送半隻波士頓龍蝦
大坑 2大呃 Like 甜品！ 粉色棉花糖燒 x 彩虹沖繩鹽刨冰
銅鑼灣 SOGO 地庫重開！5大人氣日本過江龍進駐 必食香脆海鮮煎餅 + 鹿兒島彈牙魚餅
睇更多拍拖好去處！
FB： 依莉詩生活
IG： ErieDiary
網址：ErieDiary.hk
YouTube：Diary Erie