蟹痴注意!$288 豪食海鮮自助餐 無限蟹膏蟹腳 + 每人送半隻波士頓龍蝦

11月又係食蟹嘅季節!暫時未有得食陽澄湖大閘蟹唔緊要,珀麗酒店最近推出主打秋蟹菜式嘅自助餐,用多款蟹嘅蟹肉、蟹粉入饌,整出多種菜式。最重要係 5日前預訂只係 $288,身為蟹癡嘅我 依莉詩 就約咗 Mandy 一齊去食爆膏麵包蟹同肉感雪場蟹腳!

冷盤 refill 快,保持新鮮

食自助餐重點一定係凍蟹腳,一條條又厚又肥嘅蟹肉,我哋都拆完一條又一條。而麵包蟹亦都好多膏,結實又有蟹味。冷盤仲有青口同蝦,始終大家都主攻冷盤,清得快,好彩 refill 都算好快,所以保持到新鮮。

▲ 雪場蟹腳可以話係重點之一,蟹腳又肥又甜,仲好多肉。

▲ 蟹腳成條都係肉,一啲都唔水。

▲ 另一個必食係麵包蟹,蟹膏超多,蟹肉味濃,而且結實。

▲  一舊舊紅卜卜嘅蟹膏,睇到都流口水。

▲ ▲ 面對咁多蟹,凍蝦同青口都要企埋一邊!

熟食選擇唔多,但有多款蟹菜式

食完冷盤都熟食,雖然選擇比較少,不過差唔多每道菜都有蟹嘅元素,絕對滿足到蟹痴嘅要求!橋底炒麵包蟹、蒸亞拉斯加蟹腳、椒鹽軟殼蟹、北海道蟹肉茶碗蒸、蟹肉炒飯、蟹粉天使麵,就連蒜蓉包都加入蟹粉。真係無蟹不歡!有趣嘅係聽到有個伯伯話「樣樣都有海鮮,點食呀?」

▲ 橋底炒麵包蟹

橋底炒蟹絕對係避風塘飲食文化嘅代表之作。麵包蟹配以乾蒜、川椒、秘製XO醬、花椒、蔥等等一同炒香,非常惹味。當一舊舊蟹膏放入口嗰種複雜又刺激嘅味道,真係嘩一聲!

▲ 蒸亞拉斯加蟹腳

亞拉斯加蟹腳配以粉絲、蒜蓉一同清蒸,香甜又鮮味!蟹鉗仲要一早整碎咗,一下就拆得開,大大舊肉,正!

▲ 另外仲有北海道蟹肉茶碗蒸、蟹肉炒飯、蟹粉天使麵,蟹粉蒜蓉包。雖然熟食款式唔算多,但勝在樣樣都有蟹元素!

▲ 蟹做主角,壽司同刺身都幾乎被遺忘。

▲ 其實仲有即燒魚餅、司華力腸同雞翼等等,不過成晚都好似無乜人留意過。

甜品水準OK,任食 MOVENPICK

講到甜品,貌樣似乎失色咗,不過就夠踏實。好似燉蛋白雖然好簡單,但就好重蛋白味好滑好好食。而雪糕仲係 MOVENPICK,有 6種口味可以揀,仲可以加杏仁同朱古力針𠻹!

▲ 朱古力泡芺睇落好粗礦,唔太似精緻嘅酒店甜品。 ▲ 杏仁豆腐同抺茶梳乎厘都不過不失,唔會話太甜。

早book有著數,每人半隻龍蝦

平時出去食蟹,一隻都 $50 起跳,今次可以一次過食咁多款蟹,提早 5日 Book 仲要 $288,食足 3個鐘,真係食幾隻蟹腳已經回本!而且每人仲送每隻凍波士頓龍蝦配芒果莎莎,好抵食呢!

▲ 凍龍蝦彈牙爽口,配埋芒果莎莎好開胃呢!

 

協奏坊西餐廳「蟹之盛宴」海鮮自助晚餐

地點:香港珀麗酒店 及 九龍珀麗酒店

推廣期: 2017年10月1日至12月31日

供應時間: 晚上6時30分至晚上9時30分

 

價格

五天前預訂優惠價
星期一至日、公眾假期及其前夕
成人每位: HK$288、長者及小童每位: HK$188

標準價
星期一至四(公眾假期及特別日子除外)
成人每位: HK$368、長者及小童每位: HK$238
星期五至日、公眾假期及其前夕
成人每位: HK$398、長者及小童每位: HK$268

 

更多聚餐好地方!

旺角放題 $168 任食海膽壽司!神舍佈置打卡 + 免費寫繪馬

即製巨型巴馬臣芝士撈麵!$330 勁食生蠔長腳蟹 x 香噴噴榴鏈班戟

5萬呎水產市場登陸黃埔!九號水產 4大食店率先睇 – 蟹痴必掃北海道皇帝蟹

 

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie

 



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。