大坑 2大呃 Like 甜品! 粉色棉花糖燒 x 彩虹沖繩鹽刨冰

夏天熱辣辣,又成日落大雨,拍拖節目只好留番係商場過周未。旺角銅鑼灣 呢啲 Shopping 熱點一定唔少得,但食嚟食去都係連鎖餐廳都幾悶。不妨行多幾步去有銅鑼灣後花園之稱嘅大坑尋食!今次就等我 依莉詩 帶大家食好 Colourful 嘅甜品,包大家睇到就想食呢!

大坑食街真的沒落了?

唔少人都知大坑逢中秋節都會舞火龍,但就未必記得浣紗街一帶曾經係非常旺嘅食街。因為泊車方便,加上近銅鑼灣,靜中帶旺,有唔少特色美食都選擇係度開店,炳記茶檔、康記粥店、民聲冰室等等都係非常出名嘅小店。不過 2015年之後業主大幅加租後不少食肆結業,吉鋪多,人流亦大不如前,就算星期六日經過都係得小貓三四隻。

夢幻粉色棉花糖 BBQ

雖然大坑多咗好多吉鋪,不過仍然有唔少食店留守。就好似幾年前 hit 過嘅分子雪糕專門店 – Lab Made就係其中一間。當然我今次介紹嘅唔係分子雪糕啦!而係大家 BBQ 最鍾意食嘅燒棉花糖!食朱古力火鍋食得多,咁樣燒棉花糖真係第一次!佢一個餐有花生雪糕脆脆、士多啤梨、藍莓、檸檬撻同餅乾,可以點 3色棉花糖燒嚟食,有得食有得玩。燒得好唔好食就考下你平時燒棉花糖嘅技術了!我就唔小心燒燶咗幾舊啦,哈哈!

▲ 棉花糖燒 $78

呢個 Set 有好多種食法,除咗可以就咁將藍莓同士多啤梨點落流質棉花糖,再燒成外脆內軟外,仲可以整成朱古力棉花糖夾餅,點配搭完全就睇創意啦!而我最 like 就係幾脆皮朱古力雪糕加勁多棉花糖燒!唔單止外脆內軟,仲要外熱內冷,冰火嘅感覺夠晒刺激!

▲ 粉紅、粉藍同白色嘅棉花糖咁夢幻,唔好以為加咁多棉花糖會好甜,原來棉花糖係自家製嘅,所以降低咗甜度,就算大大啖放入口都唔會漏!

▲ 燒少少棉花糖,加埋士多啤梨、藍莓同朱古力醬,放落檸檬撻就變成 DIY水果撻啦!細細個但好豐富呢!

▲ 餅乾加棉花糖再加朱古力醬係咪好特別呢?一咬落去,棉花糖拉絲拉到長一長,記得帶定濕紙巾去食啊!

Lab Made 分子雪糕專門店
地址:香港大坑布朗街6號地下
營業時間: 星期一至五:2pm – 12am;星期六:1pm – 12am;星期日:1pm – 11pm

透心涼日秋刨冰

近年好興食韓式刨冰,不過真正整得好食唔多,有時幾十蚊食到成口冰碎都幾嬲。而呢間由楊秀惠開嘅日系刨冰店主打沖繩刨冰,款款都又大碗又 Colourful,打卡一流!不過店內坐位唔多,主要做立食同外賣生意,要快快趣食,但又怕敏感牙齒,都幾矛盾㗎!

▲ Rainbow $58

店內刨冰以日本專業刨冰機刨成,食落比起綿綿冰更幼滑,入口鬆軟。至於彩虹色係由士多啤梨、菠蘿同波子汽水3 種顏色嘅糖漿整成。雖然食落味道一樣,不過有少少鹹同少少奶味,並唔係一般糖漿嘅死甜,都幾消暑㗎!

▲ 想個刨冰都係七彩,不規則得嚟好靚呢!

越後屋
地址:大坑施弼街27號地下
營業時間:星期二至六:12nn-11pm;星期日:12nn-9pm

用料十足越南粉

食完甜品,經過比呢間間格有啲似日式拉麵店嘅越南餐廳吸引咗。呢間餐廳同平時食開嘅北越口味唔同,南越口味嘅湯底比較濃味,加上一碗教父越南粉就有齊牛尾、牛腩、牛展、牛根、牛柏葉、牛孖根,真係無牛不歡。

▲ 教父越南粉 – 火車頭 $98

呢碗越南粉餸料多,用料十足,充滿肉香,而湯底亦濃郁唔似味精湯,飲落順口舒服,十分有牛味。全邊粉都好滑而且有咬口,好有水準。

▲ 咸青檸薑水,入面有咸青檸同薑汁汽水,清新薄荷,好啱夏天飲呢!

越裸
地址:大坑安庶庇街8號地舖
營業時間:
星期一、三至五:12:30-21:30;星期六至日:11:30-20:30

未必好新鮮,但大坑仍然有好嘢食

租太貴,小店生存已經係事實,大坑要回復幾年前咁旺其實幾難。潮流小食都好難係度開新鋪,不過呢度都仲有唔少食肆留得低,雖然平凡,但用料足,夠用心,大部份都有一定口碑。去開銅鑼灣唔知食乜,可以花十幾分鐘路程尋食呢!

旺角 1日 4餐,由朝食到晚!青檸烏冬係劣食?韓系日式吉列牛一定正?

元朗 4大人氣食店!必食北海道布丁燒 X 啖啖肉無骨雞翼包

 

睇更多拍拖好去處!
FB: 依莉詩生活
IG: ErieDiary
網址:ErieDiary.hk
YouTube:Diary Erie



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。