繼上年生日去迪士尼玩足一日之後，我 依莉詩 都幾乎成年無入過去了！原來而家多咗好多新嘢玩，唔單止有最新嘅「加利布尼市集」，仲有多個愛冒險嘅迪士尼朋友，好似《沖天救兵》卡叔同羅小飛、《魔海奇緣》女英雄慕安娜同大家見面！呢個春夏仲有「猜猜誰‧尋尋蛋」同「迪士尼明星嘉年華列車」嘅活動𠻹！今次就玩得好開心啦！
黑豹現身探險世界
嚟迪士尼最開心就係同迪士尼朋友集郵，最近就多咗一班喜愛冒險嘅迪士尼朋友現身探險世界。唔單止有《魔海奇緣》女英雄慕安娜 （Moana），仲有《沖天救兵》卡叔和羅小飛、《小泰山》巴魯和路易王、《獅子王》拉飛奇和丁滿、《阿拉丁》茉莉公主和精靈及史迪仔與妮露。而最正最型就係超級英雄嘅黑豹喇！
▲ 公主唔一定個個都咁柔弱，好似慕安娜就夠晒勇敢有活力！
▲ 愛冒險嘅卡叔都嚟咗呀！
▲ 趣怪嘅羅小飛有好多獎章呢！
原始氣息的加利布尼市集
冒險世界新增咗一個充滿原野氣息嘅「加利布尼市集」，有6個攤位，包括加利布尼幸運輪、部族投球及市集彈珠等遊戲。每個只需 $50 就有機會贏獨家紀念品。5月旁邊仲會有全新舞台表演「魔海奇緣凱旋慶典」𠻹！
▲ 加利布尼市集佈置得好有原始風情。
▲ 「小䲔過河」要將波平安運送到河另一邊。
▲ 加利布尼幸運輪自然就係碰碰大家運氣。
▲ 部族投球就要考考大家身手，要將繩掛喺指定位置先可以贏獎品。
▲ 遊戲中嘅金幣有隱藏米奇呢！
▲ 大獎係可愛嘅公仔，而安慰獎都有襟章㗎！
▲ 市集仲有特色嘅皮革匙扣，可以刻上自己想要嘅中英文名。
春日繁花打卡位
雖然城堡正進行加建工程，看似少咗一個重要嘅影相位，不過由小鎮大街到城堡前都佈置滿七彩鮮艷嘅花，甚至乎比花展更美呢！花圃間仲有唔少森林動物同迪士尼朋友等大家合照呢！
▲ 花圃間嘅小動物好可愛呢！
▲ 米奇農夫係夢想花園種緊花。
▲ 布魯托正享受春日嘅氣息。
▲ 城堡將會華麗變身，變得更大，融合 13 個迪士尼公主嘅故事。大家都可以一齊加入城堡工程。只要將喺樂園拍攝嘅珍貴照片分享到 Instagram，加上主題標籤 #拼出新城堡 或 #CreateADisneyCastle，或上載到 www.CreateADisneyCastle.com，就可以成為「新城堡馬賽克」嘅其中一部份。
▲ 用手機掃瞄喺現時城堡範圍圍板上嘅 QR Code，就可以了解相關迪士尼公主嘅背景。
復活節尋蛋
每年復活節，迪士尼都會放置過百隻迪士尼朋友及 Marvel 超級英雄為主題嘅趣緻花蛋。當中 StellaLou、黑豹、超能先生、超能太太、冰條俠等都係首次亮相呢！
▲ 一入門口就見到首次亮相嘅 StellaLou！
▲ 花蛋唔一定係地下，屋上面就有阿愁同阿樂。
▲ 幻想世界有愛麗絲嘅花蛋。
▲ ToyStory當然會見到魯蘇！
▲ 仲有三隻三眼仔𠻹！
▲ 明日世界裡面有 BB8 C-3PO R2-D2。
▲ 超能先生、超能太太同冰條俠都係首次出現！
▲ 當然唔少得 Iron Man。
▲ 花蛋 Size 會跟返人物角色大細出現。大家又搵唔搵到蟻俠呢？
星級巡遊 – 明星嘉年華列車
係一般嘅巡遊之間，《優獸大都會》的阿力與朱迪、《愛 麗絲夢遊仙境》的愛麗絲與白兔先生、《富貴貓》的瑪麗、七個小矮人、跳跳虎與豬仔等，有超過 30 位迪士尼明星攜手呈獻「迪士尼明星嘉年華列車」。Duffy、ShellieMay、 Gelatoni 更聯同首次加入車隊行列的 StellaLou 以全新春裝示人。
▲ 大鼻同鋼牙好可愛呢！
▲ 高飛亦換上春日西裝。
Duffy 春日系列產品
入迪士尼最人氣嘅精品相信一定係 Duffy 同佢嘅好朋友！今次佢哋仲換咗春裝，化身兔仔𠻹！無論服裝、配飾、毛公仔、 文具、玩具同徽章，都一應俱全。粉絲們入去 Duffy Store 一定雙眼發光呢！
▲ 復活節版嘅 Duffy 超可愛呢！
▲ 春日造型嘅 StellaLou 都好 Kawaii 㗎！
▲ 園內唔少人都戴住 Duffy 帽，原來可以係帽後面刺繍自己名呢！
▲ 復仇者聯盟3 月尾先上，但各種英雄精品已經佈滿店內。
“We Love Mickey!”大街投影盛演
雖然無咗煙花匯演，但每晚美國小鎮大街兩旁會上演“We Love Mickey!”大街投影盛演。整條小鎮大街都會出面米奇投影，展現米奇演藝生涯中的星光歷程，包括黑白經典造型、繽紛澎湃演出、甚至瘋狂一面，完美綻放米奇的迷人魅力。米奇更會盛裝赴會，壓軸現身，非常精彩！
▲ 整條小鎮大街都會出面米奇投影，五光十色，非常精彩！
迪士尼巨星嘉年華
日期：即日起至 6 月 20 日
更多一日遊路線！
長洲 1.5 日單車美食懶人包！食盡 7大小食 ＋ 張保仔洞探險