情侶放閃必去!精選 10大假日輕鬆好去處 (上集)

好多人都問我,平日都番工都成日行商場,咁放假有咩節目呢?其實我同男朋友都有個特別興趣,就係帶埋腳架四圍自拍,今日就等我依莉詩介紹下 10個精選打卡好去處俾大家啦!所有地方都係搭公共交通工具,又唔便行好遠就去到,最重要就係無乜人,可以點影都得,一於揀個地方同另一半一齊去吧!

1) 屋邨的懷舊情懷 - 南山邨

南山邨係近年拍攝嘅熱點之一,有成 40幾年歷史嘅南山邨到處充滿懷舊味道。而街市上蓋嘅舊式兒童遊樂場,配合南山邨新長型嘅公屋設計,別有一番風味,好容易就影到既有日系風格又有香港風味嘅相片呢!不過因為接近民居,而且非常應聲,所以避免太早或太晚去,拍攝時亦不要太嘈。除咗影相,如果有心發掘,其實呢條屋邨有好多特色同人情味嘅一面,特別係商場嘅小食店同報攤等,都值得去支持一下。

出發最佳時間:落雨後有機會影到天空之鏡嘅效果。

影相位:彩虹橋有兩組,如果想影人細笠啲就去近樓嘅一組,如果想影人大頭一啲就可以去較遠嘅一組,會有不同效果呢!

交通:石硤尾港鐵站 B2 出步行約 5分鐘到達南山邨,再上街市頂層

▲ 自己都是屋邨妹,細個係公園跑跑跳跳成長,爬上呢個鐵架啲童年回憶番晒嚟!

2) 城市中的後山 - 嘉頓山

呢座深水埗同石峽尾之間嘅一座小山丘,叫名窩仔山、喃嘸山或水庫山,但因為係麵包廠旁邊,所以大家都叫佢做嘉頓山。上到去可以睇到整個九龍舊區嘅面貌,無論日景嘅懷舊感,還是夜景嘅萬家燈火,同樣係香港嘅特色。最重要係山路都係樓梯,並唔難行,適合平日疏於運動又想睇景嘅嘅情侶行,坐係度一邊影相,一邊談心都係一個唔錯嘅選擇。出發前仲可以先到嘉頓麵包廠食份懷舊嘅黑森林或者忌廉蛋糕,4點左右再出發上山都得。不過沿路唔會有街燈,所以上山前記得準備電筒同蚊怕水,方便日落後落山使用。

出發最佳時間:一年 365日都適合,不過如果知道第二日會落雨就千奇唔好去,因為一日落就會出現大量飛蟻,有次我哋急急走落山都唔敢開口講嘢呢!

影相位:未到山頂前會有一個只容納到 5-6人左右嘅平地,一般人都會直接行上山頂,不過如果想影到無其他人嘅自拍,可以停留係度一陣,之後先再上山頂。因為呢度會影到日落,所以好早就會有攝影發燒友擔凳仔霸位,而通道比較窄,放腳架自拍會有一定難度,最多都只能影半身或大頭。

交通:深水埗站 D2 出口再沿美荷樓旁邊嘅樓梯步行 6-10分鐘上山

 

▲ 日落後嘅 Magic Hour 配合深水埗嘅燈光,非常迷人。

3) 野餐賞花大草地 - 南昌公園

南昌公園遠離深水埗中心區,就好似城市中嘅一片綠洲,內有20,000平方米嘅大型草坪,亦係香港所有公園之中最大,亦因為有兒童遊樂場、公廁等設施齊備,唔少一家大細都會係草地上野餐,輕輕鬆鬆 hea 一日。而每年 3月公園中央嘅 30棵黃花風鈴木都會盛放,長長嘅黃金道路絕對係影相靚景呢!不過花期都較難掌握,上年我連續去咗兩個星期,一個星期未開花,另一個星期就掉晒落低了。

出發最佳時間:每年 3月都係黃花風鈴木嘅花期,一邊野餐,一邊賞花絕對係一大享受。

影相位:30棵黃花風鈴木中間嘅黃金道路可以影到好多花嘅效果。又或者可以將花辦砌成圖案自私影都得呢!

交通:港鐵南昌站 D1 出口,步行 10-15分鐘

▲ 黃花風鈴木嘅花期較難掌握,萬一落雨仲會掉晒係地,唔少人都會將散落嘅花瓣砌出圖案影相呢!

4) 偽文青單車行 - 白石角情人鎖

沙田城門河到吐露港嘅單車徑算係香港幾完善嘅一條單車徑,而且沙田、大學、大圍、大埔中途都有單車租,有啲甚至唔使行回頭路,可以係沙田租車、大埔還車,非常方便。單車徑嘅路都算平,推車位唔多,如果沙田租仲會有雙人單車同 3輪車租,最啱情侶同一家大細去。而沿路都有唔少靚景,好似創新路附近嘅鐵絲網圍欄就掛咗唔少愛情鎖,同情人踏到一半扮發現到都幾浪漫架!踩到盡頭嘅水陸墟仲可以叫碗豆腐花慢慢食添!

 

出發最佳時間:係大學站食完午餐,2點左右出發,邊影相邊踩,大約 4點可到單車徑盡頭嘅水陸墟。

影相位:途住單車徑其實都幾多影相位,除咗情人鎖外,中段嘅碼頭或者盡頭嘅水陸墟嘅海豚畫都係靚景呢!

交通:港鐵大學站 A出口,公廁後有單車租賃店,租車後,沿單車徑向大埔方向踩大約 20分鐘

▲ 雖然水陸墟地下嘅海豚畫大部份都脫晒色,但牆上嘅都仲好明顯,加埋部單車一齊影就夠晒文青啦!

5) 年月堆砌 - 心形石灘

烏溪沙心形石灘相信大家都聽過,最出名莫過於有一個用無數石仔砌成嘅巨心,不過近年有好多人仿傚,用石仔砌出不同字句,令原本嘅浪漫變到不再單純。還好的是,碼頭旁都有一個巨心,呢度比較少人,可以舒舒服服坐係度。而夜晚 10點後會熄街燈,可以清楚睇到星星呢!我平時都好鍾意同男朋友係度散步架!

出發最佳時間:退潮嘅時間可以清楚見到巨心

影相位:除咗最近海濱嘅心形石,其實碼頭旁都有一個,呢個比較少人知道,如果想影無人嘅自拍就最啱。另外,海濱公園嘅白色暸望台好有歐洲風格,都係一個唔錯嘅影相位。

交通:馬鞍山站 A1 出口穿過馬鞍山廣場,步行 10分鐘就到

▲ 近海濱嘅石灘比較多人,而且仲有好多用石仔砌嘅字,例如「祝福你」等,好像沒有了最初嘅單純。

▲ 除咗石灘,海濱公園嘅白色暸望台好有歐洲風格,一樣可以影到靚相架!

叫得做上集,下集仲有其餘 5個好介紹啊!記得留意啦~

更多情侶放閃必技!

情侶放閃必去!精選 10大假日輕鬆好去處 (上集)

情侶放閃必去!精選 10大假日輕鬆好去處 (下集)

【情侶自拍攻略】學識呢幾招女朋友包滿意!自拍婚紗 10大 拍攝 + 後製 技巧大公開 (上集)

【情侶自拍攻略】學識呢幾招女朋友包滿意!自拍婚紗 10大 拍攝 + 後製 技巧大公開 (下集)

【情侶自拍攻略】 呃like必備!自拍放閃 10大 必備 Pose

【情侶自拍】影出不一樣的放閃相!香港兩大主題樂園影相位逐個捉 (上集)

 

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie



About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。