港版小清境 – 塔門一日遊!食海膽炒飯 + 大草地放風箏

自細住係屯門嘅我 依莉詩 當然知道屯門無牛啦!但塔門就有啦!最近無日無夜咁對住電腦工作,真係想出外輕鬆下,於是就決定出發去探下塔門牛牛,決定係大草地攤下,輕鬆過一 Day!

要講塔門唔少媒體都介紹過,上網亦有好多資料,最出名就係塔門島上,又名弓背山坡嘅大草原,被唔少人叫佢做港版小清境。不過山上嘅並唔係羊咩咩,而係一班以前由務農客家人飼養,後嚟大量繁殖嘅牛牛。雖然好可愛唔怕人,不過就愛雜食,會搶奪遊人嘅食物,所以野餐時要小心睇住自己嘅食物!

第一站:從大學站出發

去塔門唔似長洲、南丫島咁方便,班次較為疏落,所以出發前要小心計劃行程。大家可以到馬料水碼頭或黃石碼頭塔船。黃石碼頭開出比較平,票價為 $9.5,假日就 $14。而馬料水開出,票價為 $18,假日就 $28。

而我今次選擇係馬料水上船,由大學站 A出口沿單車徑行 15分鐘就到。因為單車路旁,所以都幾闊,條路平時踏單車就好近,但要行就好一望無際,真係未出發先興奮!

 

圖片來源:http://www.traway.com.hk/02/index.html

▲ 每日由馬料水開出的船有兩班,分別係 08:30、15:30,而假日12:25 會加開一班。

▲ 因為 08:30 對我嚟講實用太早,決定搭 12:25 船,去到馬料水碼頭已經大排長龍,而一班船只坐百幾 人,幾擔心上唔到船。所以大家要提早到碼頭啊!

▲星期六、星期日及公眾假期船飛每位 $28,同搭快船去長洲差唔多。

第二站:塔門碼頭買手信

經過一小時十五分鐘船,終於嚟到塔門。碼頭唔似咁長洲、南丫島咁熱鬧,不過充滿漁村氣息。附近有幾間食肆同買手信嘅檔口。買魚乾嘅檔口基本上只做落船一轉生意,所以唔好諗住回程先買,因為你只會見到一次,要買就快!

另外,島上基本上得三個公廁,碼頭同天后廟附近各一,如果想係草地 hea 多陣最好先去廁所,唔係就要到漁民村先有㗎啦!

▲ 居民唔算多,大家都比較休閒,所以手信檔都不常開門。

▲ 當地人都好好客,涼果可以免費試食,凍紫薯好有趣呢!

第三站:金黃海膽炒飯

落船已經係中午,大家都肚餓,碼頭有 3間餐廳,食嘅都係塔門最出名嘅海膽炒飯、炸墨魚丸等,而我哋就揀咗海膽炒飯比較出名嘅新惠和。因為係小店關係,炒飯都係喺門口即叫即炒。望住大廚倒入成碗金黃色嘅海膽,三兩下手勢就將白飯炒到金黃色,非常吸引。不過,食慣日式海膽飯嘅朋友可能會失望,因為海膽炒乾後唔會好似刺身咁 Cramy ,反而會似蟹膏一粒粒,要大啖放入口慢慢嘴嚼先感受到海膽嘅甘甜。

▲ 相比起海膽炒飯,我更愛食海膽煎蛋三文治 ($40)。雖然睇落同普通蛋治無分別,不過蛋香帶出海膽嘅鮮甜,非常香口。

▲ 呢度仲有有機菜食添!

第四站:天后廟求好天

食飽飽就有氣力行山,沿街道直行就會面到天后廟。塔門係一個小島, 以前居民多以捕漁為生,所以天后廟對佢哋好重要,呢間塔門天后寶樓係明末清初就已經起好,經歷唔少風吹兩打,亦保佑過唔少漁民平安歸來。

 

▲ 沿樓梯上去就會見到天后寶樓嘅牌坊,係藍天白雲睇落好有氣勢,絕對唔會輸俾其他大寺廟。 ▲ 穿過天后廟沿左邊小徑行 10分鐘左右就會見到大草原。路唔算難行,都係一般行路。

第五站:大草原放風箏

塔門草原係又名弓背山坡,因為係弓起,可以遠跳山下無敵海景,係藍天白雲下真係謀殺唔少菲林。唔少人都會係草地上紮營、野餐、放風箏,可以好好咁享受大自然。不過都要注意,因為會有牛牛出沒,所以都有唔少牛便便㗎!

至於鍾意行山嘅朋友可以係涼亭另一邊山徑出發,攀上最高點茅平山或者其他名勝如「龍頸筋」等,要行晒大約一個鐘。因為今次時間有限,所以都係留係草地  hea 下,吹吹海風好過。

▲ 呢度雖然非漁護署指定營地,不過都有唔少人露營,留宿一宵觀星睇日出。

▲ 塔門位於香港東北方,所以吹北風或東風時都幾大風㗎!如果嚟露營要做足保暖準備。

▲ 亦因為超大風,係呢度放風箏完全零難度,一放手風箏就會自動飛上天,唔使跑嚟跑去,不過就少咗份成功感。

第六站:岸上的疊石小石灘

由觀景台沿小徑往下走,行 5分鐘左右就到山崖底嘅小石灘,都有唔少人落去影相同觀看睇浪。石灘有大石有細石,其實都幾難行,所以都唔建議著裙去 (唔好學我!我都好後悔)。

而塔門另一個著名景點就係「呂字疊石」,大家可以選擇由觀景台右上方小路,行 3分鐘就到。顧名思義,呂字疊石就係因為由2塊大小相若嘅石頭疊成,睇落似「呂」字而命名,都幾得意㗎!

▲ 石灘其實都幾危險,所以不建議大家行太近海邊同玩水,遠少少坐下,影下相就好了。

第七站:食唔停彈牙炸墨丸

往馬料水尾班船係 17:30,所以 5點鐘就要開始回程。呢個時候更係番碼頭食個下午茶。譚仔有「墨硯」米線,塔門就係炸墨丸。3間餐廳都有炸墨丸,而我哋擇咗新有記,雖然 $70幾蚊先得 10幾粒,好鬼貴,但一場嚟到點都要試下吧!

▲ 炸墨丸 $75

墨魚丸入口超級彈牙,炸咗之後又就更香口,令人食唔停呢!

塔門雖然細,短短幾小時嘅行程真係唔多夠喉,秋天好想係到紮營睇星,睇日落呢!

 

更多一日遊路線!

長洲 1.5 日單車美食懶人包!食盡 7大小食 + 張保仔洞探險

港版小清境 – 塔門一日遊!食海膽炒飯 + 大草地放風箏

由黃大仙走到九龍城! 半日遊深度體驗香港傳統文化

情侶放閃必去!精選 10大假日輕鬆好去處 (上集)

情侶放閃必去!精選 10大假日輕鬆好去處 (下集)

 

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie


About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。