長洲 1.5 日單車美食懶人包!食盡 7大小食 + 張保仔洞探險

中學耐唔耐都會同啲 friend 去長洲宿營,打吓牌、講吓鬼故就一個晚上。畢業之後,寧願用多少少錢去澳門、台灣都唔想同人逼。不過上個月餵蚊生日,自己又無假,但想搵個地方輕鬆吓,就決定去玩兩日一夜。原來長洲多咗好多嘢食呢!就等我 依莉詩 分享吓呢 1.5日嘅行程啦!

人煙稠密又多故仔嘅長洲

長洲呢個地方其實都唔使點介紹。係香港咁多個離島入面,長洲可以話係人煙最稠密,又最商業化嘅島嶼。講食嘅大魚蛋、芒果糯米滋、紅豆餅,幾乎人人都知。講觀光嘅張保仔洞、東灣、天后廟,相信無香港人講唔出。仲有好多鬼故、傳說,亦令唔少遊客慕名而來。

 

第一站:滿滿愛情鎖牆

無嚟幾年,估唔到 B&B 渡假旅館由原來只有一棟,發展到有幾棟,仲要將以前嘅七個小矮人變成咗愛情鎖牆。鐵籠內掛滿唔同顏色嘅鎖影相打卡都幾靚㗎!不過鎖牆係 B&B 嘅用地,所以只能掛係旅館售賣嘅鎖頭或者木牌,而且要寫嘢要係店內買水彩盤,商業味自然有啲濃,但眼見都有唔少人即場裝飾自已嘅鎖同木牌呢!

 

愛情鎖牆 Lock of Love

地址: 長洲東灣路12–14號

▲ 愛情鎖最平都要 $30 ,而木牌就按大小收費,而顏料仲要另外購買,所以想浪漫都唔平㗎!

第二站:清甜無殻椰青波波

夏日炎炎,最好就係飲個椰青解渴,但我呢啲懶人通常飲完個椰青就算,懶得整啲肉出嚟食。呢度竟然有得賣泰國直送嘅無殼椰青 ($30),成個白雪雪,好似波波咁,好得意!而且因為無殼,點飲都唔會有渣,仲唔使用匙羹都食到啲肉添!超級方便!

第三站:大大粒芒果糯米糍

雖然長洲糯米糍已經開到去市區,間間都話自己係正宗,不過嚟到長洲點都要食件先算嚟過嘛!當中有兩間我都幾鍾意食,就係允升同天然。薄薄嘅皮包住大大舊芒果,又甜又飽滿都只係 $7 件,食落好滿足!

 

天然甜品 

地址:長洲大興堤路9號海景樓C座地下

▲ 天然嘅甜品都好足料,呢碗芒果湯圓榴槤布甸都係 $28,唔止芒果多,布甸入面有一絲絲榴槤肉。

第四站:深入張保仔洞探險

食飽飽充夠電就出發去張保仔洞!傳說張保仔喺多個離島嘅洞穴收藏寶物,而當中長洲嗰個就最出名。要去有兩個方法,第一個係由長洲碼頭坐街渡到西灣碼頭,而第二個方法就係由長洲碼頭轉右,沿著海徬街,大興堤路,長洲西堤路,贊端路前往,步行大約 30分鐘。而我哋今次揀咗踩單車,大約 11分鐘就到了。

 

長洲張保仔洞

地址:長洲家樂徑

▲ 第一次入張保仔洞,原來洞入面好狹窄,而且好黑同好濕。雖然全長只有 88米,5分鐘就行完,不過凹凸不平又要爬上爬落,一定要帶電筒照明先安全呢!

 

▲ 係黑漆漆嘅洞穴出嚟,睇到嘅風景都特別靚。

第五站:穩世文青 cafe

上去張保仔洞嘅路附近有一間充滿無印風情嘅文青 Cafe ,水泥牆、白窗白門,再加部單車,好捨意咁,真係好想入去嘆個 tea。可惜趕住要還單車,第二日又打風,所以最後都無入到去,只好係門口影張相當去咗吧!

Heima Heima
地址:長洲贊端路25號A地下

第六站:脆卜卜原條無骨池魚

嚟親都係食大魚蛋同芒果糯米滋都幾悶,最近就新開咗一間叫漁樂嘅鋪頭,木板同掛有上旗仔嘅日式裝修,唔知以為係日本鋪頭生,但原來好搞笑又熱情嘅員工都係土生土長長洲人,而且賣嘅都係每日向本地漁民舢舨交來嘅本地海鮮。佢哋將利錢少無肉食嘅細魚仔炸成送酒小食,加埋自家整嘅手工啤酒,真係好有風味。雖然店內無冷氣,但每個客人都包保食得開開心心咁離開。

講番食物質素,我叫咗鮮炸池魚, $40份有 5-6 條魚,炸到脆卜卜,骨脆肉嫩,要有心思係配料上有檸檬皮,蝦米炒嘅香油、蛋黃醬,仲有小黃瓜同青提,令到炸魚食落清新唔油膩。而且每一份員工都好用心咁將佢哋排靚靚,係呢個咁商業化嘅長洲,能夠搵到呢一點點人情味真係好難得。

 

漁樂 YU LOK CC

地址:長洲大新海傍路81B 地下

第七站:經典大魚蛋

相比起漁樂嘅人情味,甘永泰魚蛋就差得遠。唔知係咪出咗名,流水作業式排隊買,本身已經無寫清楚係咩丸咩價錢,如果要問或者俾錢慢少少都會黑面,仲慘過係旺角買肥姐墨魚。

至於大魚蛋 ($10) 味道好似差咗好多,雖然都仲係彈牙,但魚味唔係好夠,同埋少咗啲汁或椒鹽,就好似白烚一樣。真係去 OK 買嗰粒大魚蛋都仲好食過佢。

 

甘永泰魚蛋

地址:長洲新興街106號

第八站:惡搞便便燒

台灣啲雞蛋糕整唔同嘅樣就可以呃到唔少 like,呢個便便燒 ($8) 同樣道理吧!咪睇佢便便造型咁惡搞,其實好有內餡,即叫即整,一啖咬落去熱辣辣紅豆餡爆出嚟,正!

 

反斗奇冰
地址:長洲大新海傍道 75 號地下

第九站:大排檔海鮮小炒

食咗咁多小食,晚餐都係想坐定定係餐海鮮餐。係黃昏晚霞映襯下,坐係海邊食別有一番風味。起初我哋擔心兩個人食得唔多,又怕亂入一間會被劏到一頸血。好彩最後揀咗一間有兩人餐,兩碟海鮮都係百幾蚊,仲送碟菜添!

▲ 蒸帶子好鮮味,不過得 4隻有啲少。

▲ 送嘅蝦醬炒菜都唔錯。

第十站:踢拖掃街食宵夜

到咗夜晚十點左右,長洲碼頭出面就開始有車仔檔出現,腸粉、串燒、煎釀三寶、炸脾、糖水咩懷舊小食都有,想一試吓掃街風味一定要行一轉。不過我已經食得太飽,今次無食了。但記得以前食過嘅蠔仔粥好足料,好好食㗎!

 

第十一站:島上唯一酒店

最後就係番華威酒店休息。好多人都問我點解要揀呢間又貴又殘舊嘅酒店,大家都知啦,長洲啲渡假屋好猛鬼,兩個人真係唔敢去住,但 B&B 又 full booking,咁餵蚊生日,唯有貴啲都照住。

果然殘舊嘅傳聞係真嘅,一入到去大堂就已經有陣酸宿味,自助早餐仲要得啲腸仔蛋,又無浴缸,坦白講,千幾蚊一晚,係市區租間好啲嘅大把選擇!不過又真係估唔到有好多嘢可以免費借用,例如 BBQ 爐、單車、卡 game。最搞笑仲有涼茶送添!

華威酒店

地址:長洲東灣路12–14號

▲ 好彩房入面都算乾淨,仲有個露台可以睇到成個東灣,夜晚吹水睇星幾舒服㗎!

▲ 酒店外有幾個 BBQ 爐,住客可以免費使用。

▲ 櫃位旁邊仲有涼茶可以免費拎,好地道,哈哈!

▲ 估唔到會有 Switch 租添!不過 $100 一晚就有啲貴。

▲ 點解標題係講 1.5日,知咪係好唔好彩,一瞓醒就看 8號風球,要急急腳趕尾班船番市區囉!不過由露台望出去長洲東灣同觀音灣泳灘,真係點睇都唔似打風呢!

▲ 至於個自助早餐⋯⋯大家唔好抱太大期望,因為真係一眼睇晒。不過一聽到尾班船係 11點,已經食龍肉都無味,擔心緊趕唔趕到船了!

港版小清境 – 塔門一日遊!食海膽炒飯 + 大草地放風箏

情侶放閃必去!精選 10大假日輕鬆好去處 (上集)

情侶放閃必去!精選 10大假日輕鬆好去處 (下集)

睇更多拍拖好去處!
FB: 依莉“詩”生活
IG: ErieDiary
網址:ErieDiary.hk
YouTube:Diary Erie



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。