睇完 上集 唔知大家有冇被閃盲，但我都會繼續分享埋其餘 5個拍拖好去處畀大家。頭 5個地點都係鐵路沿線，比較方便，今次呢 5個就要轉多幾程車先到，但就遠離市區，可以感受不一樣嘅香港，兩個人就好似去咗個小旅行咁！
6) 秘密的後花園 － 山頂公園
係凌霄閣對上嘅山頂公園以英國19世紀維多利亞時代為主題，到處都係充滿英式風格嘅涼亭同建築，而且花種繁多，配合大大片嘅草地，係唔少一家大細野餐同拍婚紗相嘅熱點。係草地上一邊影相一邊野餐，hea 下 hea 就一day，真係唔錯架！不過公園嘅路入夜都幾多蚊同幾黑，所以盡量係未天黑之前就好回程啦！
出發最佳時間：春天比較潮濕，山頂好多時都會有迷霧，而秋天比較乾爽，影出來嚟景物亦比較清楚。
影相位：有車嘅人大多數都會選擇較近嘅大草地野餐或者影相，但如果係搭巴士由凌霄閣行上去中途會經過柯士甸山公園，再上會有一個涼亭同一片小草地，好彩嘅話可以獨霸一整個下午。
交通：假日出發的話，小巴同纜車都好多人，可能要等成個鐘先上到車，所以我會建議係中環 5號碼頭搭 15嘅巴士。係山頂廣場落車，由右方嘅柯士甸山道步行 5-10分鐘穿過柯士甸山公園，再行 15-20分鐘。
▲ 呢個四格花園吸引咗唔少人係度拍婚紗嘅地方，想自拍的話最好就排下隊，而且唔好影咁耐呀！
▲ 上落山途中會經過一間藍白外牆嘅守衛室，原來係以前港督嘅山頂別墅部份遺跡，依家已被列為香港法定古蹟，係度影相超有 feel 呢！不過要小心嘅係，想影晒全座建築物，支腳架要方係山路中間，有機會有車經過架！
7) 愉景灣
愉景灣係一個生活節奏比較慢嘅小社區，四周嘅建築都充滿歐陸風情，整個愉景灣都係影相位，特別係三角型白教堂同旁邊嘅船、鐘樓都係必影地標。每晚 8點係碼頭旁邊或者大白灣沙灘都有機會睇到遠處迪士尼嘅煙花表演呢！而每個嘅第二個週日通常會舉辦露天市集，可以慢慢欣賞特色手工藝品或自家製設計產品。最後，愉景灣酒店亦唔算太貴，如非特別日子都係一千蚊左右一晚，兩個人唔想外遊，呢度都係一個假日渡假好選擇。
出發最佳時間：情人節或者聖誕節前都會有特別佈置，而每年情人節當晚大白灣沙灘仲有由蠟燭砌成嘅多個大紅心，氣氛非常浪漫呢！
影相位：無論 D Deck 、大白灣沙灘定 愉景北都有超多影相位。不過提提大家，係教堂前面一帶係禁止未經申請嘅商業攝影，所以要自拍都好，請收起大大件嘅專業器材啦！
交通：係中環 3號碼頭搭愉景灣渡輪，船程大約 25分鐘到達愉景灣碼頭，可以再搭 DB03P 到達愉景北商場。又或者係東涌港鐵站搭 DB01R 到達愉景灣巴士總站，車程約 20分鐘。
▲ 教堂旁邊嘅船雖然唔上得去，但遠睇都好有氣勢架！
8) 迪欣湖
迪欣湖可以話係迪士尼嘅延續，中間嘅湖同噴水池係一大標記，加上藍白色嘅建築物感覺好似去咗外國一樣，湖邊嘅草地可以野餐，仲可以租船仔同單車踏，係一個影相之餘，又有娛樂嘅好去處,可以 hea 足一日。不過提提大家，最果想租船仔最好 2點前過去，唔係就要等好耐先有架啦！如果唔想拎住咁多嘢，可以係 7仔租個儲物櫃，連煩惱都一齊放低呢！
出發最佳時間：每年 11月中只有一棵嘅美人樹都會開花，變成粉紅色，就好似櫻花一樣咁醉人。
影相位：迪欣湖入口嘅藍白建築物同公廁都係好多人排隊嘅影相位。但其實湖邊嘅風景都好靚架!
交通：可以由迪士尼站行 15分鐘 或者 係迪士尼站搭 R8 巴士
▲ 湖邊配合柳樹又有另一番風味。
▲湖邊嘅白色水泡反而有點希臘風呢！
9) 機場維修區
其中一個睇日落嘅勝地就係機場維修區，因為近海邊，又係機場跑道尾，每隔大約 10分鐘就會有飛機升降，可以近距離拍攝到飛機係頭頂劃過同降落，配埋日落，非常有意境呢！
出發最佳時間：嚟得基本上都係為咗睇日落，所以出發前最好上天文台睇清楚日落時間，再預早個半鐘出發。
影相位：坦白講，其實景就唔多，都係影下日落，飛機，草地同馬路。影得有冇意境就要靠你哋發揮啦。
交通：港鐵東涌站附近巴士總站轉乘 S52 巴士可直接到機場維修區，車程大約 25-30分鐘，步行十分鐘左右就會到海邊長提。
▲ 企係石堆上用日落做背景可做出剪影效果呢！
10) 下白泥
下白泥呢個地方對我來說又愛又恨，因為比較近，所以由中學開始我時不時都會去睇日落。景色雖然好靚，但對於無車一族來說，回程要順利比較睇到耶穌光更難得。亦係考慮身邊另一半解難能力嘅好時機。事關日落後小巴班次唔係次次都足夠接走所有人，而某啲網絡商又收得唔好，的士又唔肯上去，所以走唔走到就真係要靠運氣了！
出發最佳時間：因為冬天比較容易受霧霾影響，所以春天至夏天去比較容易睇到靚日落。而夏天大約 6-7點先日落，所以去到 4-5點去到元朗仲可以食碗牛丸再出發都唔遲。
影相位：因為只係向海嘅濕地，所以以影日落為主。如果潮退時可以利用旁邊嘅河做一個天一合一嘅效果，又或者用對出嘅蠔排營造氣勢，但整體上影相位不多。
交通：可以選擇元朗轉小巴去，又或者經菠蘿山沿小峽谷行兩小時去到。不過如果無車回程比較麻煩，因為小巴班次唔多，建議日落後數分鐘就好去排隊搭小巴，如果多人排要即刻上山去前一個站。否則就要行兩個鐘出流浮山，或者企係小巴站望有的士願意上嚟了！
▲ 蠔排配合日落，景色非常迷人。
叫得做下集，上集仲有其餘 5個好介紹啊！記得留意啦～
更多情侶放閃必技！
【情侶自拍攻略】學識呢幾招女朋友包滿意！自拍婚紗 10大 拍攝 + 後製 技巧大公開 (上集)
【情侶自拍攻略】學識呢幾招女朋友包滿意！自拍婚紗 10大 拍攝 + 後製 技巧大公開 (下集)
【情侶自拍攻略】 呃like必備！自拍放閃 10大 必備 Pose
【情侶自拍】影出不一樣的放閃相！香港兩大主題樂園影相位逐個捉 (上集)
睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie