放 Facebook 也好，IG 也好，講到自拍放閃，單單只係大頭自拍已經滿足唔到女仕們嘅要求了！人哋邊個邊個張張相到影到長腿大眼，呢個仲可以自然到好似真係有攝影師同自己影咁。試問今時今日一個稱職嘅男朋友又點可以唔識影相？
特別去到外地旅行，女朋友就更想拍下更多回憶。咁出發前到底要帶啲咩呢？又有咩要準備？放閃豐富經驗嘅 依莉詩 我，決定將心得大公開，包大家一學上手！
如何選擇一部啱用嘅相機？
工欲善其事，必先利其器。雖然宜家大部份手機影相質素都唔錯，就好似 LG V20 有超強廣角鏡、HUAWEI P9 Plus 又有超突出嘅景深效果、美圖 T8 又有自然美肌效果，但如果係昏暗環境，手機始終唔夠用。加上想係女朋友面前表現得更專業，相機就一定唔少得！
談到相機，要用作旅行自拍，最緊要係輕， 180度反茫，可以連接手機作搖控 同 有美肌功能，而我一直都有兩部相機用係唔同情況。Sony A5000 係我日常工作機，貪佢細細部，又有自拍同即時美肌功能，係大部份情況都好夠用，但講到去旅行同搵靚景自拍的話，對相片的執著就會出晒嚟，Canon 70D 就有更仔細嘅畫質，特別夜景就更出色。
▲ 咁到底要揀單反定無反相機呢？事實上，近年無反相機的質素已經追得上單反。而最近我就因為跌壞咗 Sony 支鏡，新入手咗 Canon M6，貪佢輕得嚟加個轉換環可以用得番 70D 嘅鏡頭。加上最近多咗拍片，佢有得插咪同外置閃光燈，所以就買咗了。
1) 善用廣角鏡，一秒變長腿
講番拍攝技巧先！唔講都知，要瘦面就要高炒 45角自拍，但想長腿就要善用廣角鏡令兩邊變形嘅特性，低炒影全身。而人物最好方係整個畫面嘅二分一至三分一，咁條腿就變到又瘦又長了！不過就切忌打橫影，同埋人物要置中，唔係影都女朋友又肥又矮就自求多福了！
▲ 用 19mm 超廣角鏡頭低炒就可以輕易拍出又瘦又長嘅美腿。
▲ 雖然橫到拍攝可以影到更多景，但記得人要置中，唔係就會影出肥手臂！
2) 用腳架計時連拍數張，拍出自然交流
兩個人去旅行，影合照除咗搵人幫手，三腳架同自拍神棍就係最好拍檔，不過普通腳架都幾重，拎出街都幾唔方便，而最近我就愛上咗用 Xpower 鋁合金多用途藍牙 9合1 自拍套裝 ，貪佢輕輕地可以放手袋，又可以組合成腳架或自拍棍，最高可伸到 91.5 cm，如果放手機或者無反相機都夠穩陣。
咪以為有腳架就可以大影特影，如果校計時拍攝，影每一張都行嚟行去，既辛苦又難投入。其實宜家大部份相機都有連接手機功能，可以用手機控制，咁就方便得多。如果怕手機連接得唔好成日斷，都可以買個遙控，校計數模式，每次影幾張，影出嚟嘅效果就可以更自然。
▲ 一支穩陣又輕嘅三腳架非常重要，不過點都有啲必量。呢個就係我去東京旅行嘅隨行攝影師啦！裝備真係好誇張呢！難為了 餵蚊 孭足全程啊！
▲ 雖然手機都可以搖控相機拍攝，不過 Canon 嘅 App 沒有 Sony 做得咁穩定，所以我就買咗平價嘅 YONGNUO 外置遙控，有得校隔幾多秒影幾多張相，仲用得 B 快門，絕對係好幫手！
▲ 而呢支 Xpower 鋁合金多用途藍牙 9合1 自拍套裝 係我嘅新寵，雖然係三腳存咁穩陣，不過放手機或者無反相機都夠用，最緊要係夠輕同可以放手袋。
▲ 由遠至近慢慢行到鏡頭前，連續影幾張相，番到去實揀到張最自然嘅相。
▲ 連續影仲可以影到跳起嘅動作，令自拍更生動。
▲ 因為無人望住，表情亦都可以更自然流露。
3) 利用前景，拍出層次
構圖亦係相當重要嘅一環，如果下下影大頭根本唔知去過邊度。特別係去旅行，風景梗係更重要啦！除咗人要細，景要多之外，適當咁運用前景，就更容易令自己融入環境入面，一睇就知唔係 Key 上去嘛！
至於前景係咩？我諗大部份人都會諗起利用水氹，拍出天空之鏡嘅效果。另外，亦可以用花作前景，拍出置身花海嘅感覺。
▲ 早排興去下白泥、西環、中大天人合一搵天空之鏡。其實天空之鏡唔使四圍搵，只要地下有攤水，張相機放得有咁貼得咁貼地面就可以影到。不過因為裝咗腳架都會有一定高度，除非你想犧牲部相機，否則都難有天地一線嘅效果。
▲ 運用前景，改變對焦亦可以營造唔同嘅氣氛。
▲ 用花做前景，以水平角度影，就算並唔係喺花嘅正中間，都可以有置身花海嘅感覺。
▲ 用花作前景、城堡作後景，亦可以係有趣嘅構圖。
4) 逆光時，運用 LED 燈補光
逆光相梗係靚啦！但唔識影，就算有 HDR ，個人都隨時變舊炭。特別係浪漫嘅聖誕節，要將燈飾同女朋友二合為一就更難。影半身都仲可以用內置閃光燈，但全身就一定唔夠力，要用到外置閃光燈。
雖然外置閃光燈宜家已經非常準確，用 TTL模式好容影就影到唔錯嘅相，但對新手來說都係比較難估計，要影多幾張先試得啱。反而我會建議大家用 LED 燈補光，因為可以即時睇到效果，又可以校色溫，無閃光燈咁死實。
▲ 呢支南冠出品嘅 LED 燈補光，百幾人仔有交易，絕對係新手必備！
▲ 外置閃光燈即使加咗柔光罩，打燈都比較生硬，而且要試多幾張先成功，用於自拍會比較麻煩。
▲ 而用 LED 燈補光可以校色調，可以更方便營造氣氛。
5) 準備小道具，動作更自然
唔少人對鏡頭都有恐懼，唔知擺咩表情好。其實可以準備一啲小道具，例如即影即有相、手機等，又或者就地取材，搵啲樹葉之類，都可以令動作更自然。
▲ 加塊樹葉就唔怕得兩個大頭咁悶啦！
▲ 落雨嘅時候，一把透明遮既可以擋雨，又唔怕影響構圖，去日本記得去便利店買番把啊！
▲ 小道具都可以用作講故事嘅一部份㗎！
講咗咁多，大家係咪已經有啲頭緒呢？其實自拍最緊要係啲咩？並唔係放上社交網結放閃，最緊要係保留兩個人嘅回憶，所以辛苦少少都值得嘅！呢集講咗咁多影相技巧，下集會同大家分享後製心得，希望大家都同我哋一樣可以享受同伴侶自拍嘅過程啦！
更多情侶放閃必技！
【情侶自拍攻略】學識呢幾招女朋友包滿意！自拍婚紗 10大 拍攝 + 後製 技巧大公開 (上集)
【情侶自拍攻略】學識呢幾招女朋友包滿意！自拍婚紗 10大 拍攝 + 後製 技巧大公開 (下集)
【情侶自拍攻略】 呃like必備！自拍放閃 10大 必備 Pose
【情侶自拍】影出不一樣的放閃相！香港兩大主題樂園影相位逐個捉 (上集)
睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie
【延伸閱讀】
