玩 Facebook 同 Instagram 都一段時間，不經不覺對食物相同大頭自拍已經零反應，呃 like 愈嚟愈難，女朋友嘅要求亦愈嚟愈高，成日投訴影得佢唔靚，到底可以點呢？
經過上幾次嘅【情侶自拍攻略】同 【10大放閃好去處】 之後，相信大家都掌握咗基本嘅情侶自拍技巧，不過有時對住鏡頭真係唔知擺咩姿勢好呢！今次就等我 依莉詩 畀啲 pose 大家參考下啦！
1) 拖手仔
唔想一開始就閃親大家，就由最基本嘅拖手仔開始啦！當然拖手嘅方法都有好多種，可以單手拖，又可以雙手拖。前面影又得，回頭望亦得。最重要係感覺到兩人之間嘅連繫，比較簡單嘅做法就係企定定係相片中間，兩個人分開少少，突出到中間嘅手。
2) 深情對望
對望其實幾好玩，自拍好多時都會校計時2-5秒，呢個時候大家望實對方，開頭會引唔住笑呢！怕太尷尬的話可以試下中間加一啲小物件，例如一齊食雪糕，飲凍飲之類。試多幾次就會發現眼神真係可以傳情㗎！平時相處唔會凝望對方咁耐，望望下感情都會好啲呢！
3) 遙望遠方
拍拖唔會時時刻刻都「眼中只有你」，其實大部份時間都係一齊望某啲景物，所以呢個拍法會比較自然，可以試下用手指向某一方向，引人睇相中景物或焦點。例如日落、星星等。另外，可以望向相片外，令人心思思想估望緊去邊，亦會有種展望未來嘅感覺。
4) 伸手抱起
唔少女仔都有被公主抱嘅幻想。如果男嘅自問都夠力不妨試下抱起佳人吧！不過無論幾重，男嘅都要扮都好輕鬆先得，唔係就會間接表示女嘅好肥㗎啦！而女嘅要盡重展開手腳，倒如攤開手或者前後腳，唔係兩個人就會好似一舊嘢咁，畫面唔夠豐富。要提提嘅係，最好著過膝中長裙比較好，唔係會好易走光。
5) 心動壁咚
睇得少女漫畫多，壁咚係必有劇情，相信唔少女仔都會心跳加速呢！揀幅靚靚哋嘅牆就可以做到，非常簡單。不過就要睇男女嘅身高差，如果係「最萌身高差」就要用凳仔或者石級幫手了！
6) 緊緊擁抱
情侶之間攬抱好平常，可以雙擁亦可以從後擁抱，不過無論點抱都好，擁緊之餘，頭部都要有少少分開。唔係就會成舊嘢咁，無咗表情同焦點。同樣，對方嘅手可以用作掩住某啲唔想俾人發現嘅部份，就好似大肚腩、肥手臂等等。不過就切忌男方從後攬嘅同時，放手係女仔個肚度，咁會好易令人誤會呢！
7) 甜蜜錫錫
錫錫當然係最親蜜嘅表現，但 Kiss 都有好多種，影相反而唔需要法式濕吻咁甜蜜。因為太肉緊嘅話面部表情會扭曲，所以錫都唔好用太力錫，蜻蜓點水就好。當然，除咗嘴對嘴外，仲可以錫額頭、面珠、手等等。一樣可以好甜蜜啊！
8) 故事特寫
有時唔一定影全身或者大頭，影其中一部份特寫，可以增強故事感，配合小小道同景深效果可以有另一番感覺呢！就好似只係影拍住嘅手、心型手、地下嘅影等等，低調之餘，令睇相嘅人都會有種代入感。
9) 神秘剪影
當影日落或者係窗外等正逆光嘅時間，人像通常都會影到變左舊炭炭。要做炭不如做得更徹底吧！索性再校細少少光圈，突出輪廓同背景，營造剪影效果。不過就住兩個人頭同身都要有分開嘅部份，要清楚睇到雙方輪廓，同埋剪影部份盡量唔好佔超過相嘅一半，盡量以背景為主。
10) 誇張表情
嫌上面講嘅都太悶？其實可以 freestyle 啲，將表情同動作誇大，增加趣味相片嘅趣味性。呢個就要等大家慢慢發掘啦！
今次介紹嘅 pose 未必好創新，唔會話好似啲 ig 相咁藉得跟風。不過最普通嘅構圖同動作，有時反而係最歷久常新，最起碼幾年之後睇番都唔會覺得老土或者MK嘛。
更多情侶放閃必技！
【情侶自拍攻略】學識呢幾招女朋友包滿意！自拍婚紗 10大 拍攝 + 後製 技巧大公開 (上集)
【情侶自拍攻略】學識呢幾招女朋友包滿意！自拍婚紗 10大 拍攝 + 後製 技巧大公開 (下集)
【情侶自拍攻略】 呃like必備！自拍放閃 10大 必備 Pose
【情侶自拍】影出不一樣的放閃相！香港兩大主題樂園影相位逐個捉 (上集)
睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie
【延伸閱讀】
