要放閃可以去到幾盡？上集 教咗各位稱職嘅男朋友從裝備、構圖到拍攝一刻，點影得相片自然又吸精後，今集我 依莉詩 打算教下大家幾個新手必學嘅後製技巧。
雖然話宜家用手機 App 修圖好方便，按個掣就可以美肌加濾鏡，仲可以即時放上網，方便得多。不過如果係比較細緻同自然嘅修圖，又或者大批量嘅後製，我都係比較建議用 Adobe 嘅 Lightroom 同 Photoshop 去完成。
▲ 雖然用手機修圖比較簡單，亦足夠應付放上社交平台嘅需要，不過如果想將相片儲落嚟以後曬相或者整紀念品的話，解像度可能因為被手機 App 壓縮，而唔足夠其他用途，到時又要搵番張原相出嚟再執過就更麻煩了！
6) 拍攝 RAW 檔方便後製
既然有需要做後製嘅準備，拍攝嘅時候要考慮係咪要同時保存 RAW 檔。無錯 RAW 檔嘅 size 比較大，如果旅行影相或者一天拍大量相片的話，可能要帶好多張 SD 卡先夠用，而且 RAW 檔唔可以直接過落手機後製，係比較麻煩。因為我每次都會影好多相，我習慣唔會全部相都影 RAW 檔，只會係影逆光或者夜間拍攝時同時儲存。
始終RAW 檔能夠將原始嘅相片資訊完整地保存，比起有破壞性壓縮嘅 JPG檔，後期調較光暗、對比、顏色、飽和度等都會比較出色。特別係係極端地處理光暗位嘅時候，RAW 檔無論係推光或調深，層次都能更突出，唔似 JPG 會出現死白或者奇怪嘅顏色。
▲雖然宜家大部份相機都有 HDR（高動態範圍）功能，相片會自動被調光，不過係逆光時亦未必做得很好，就需要後製將陰影適當地調光。若果只拍 JPG 檔，會因為動態範圍不，調光時會造成大量雜訊。
▲ 若果拍攝時太光，想調暗的話， JPG 檔亦可能會出現奇怪顏色同出現層次不足嘅問題。
7) 去除路人成相中焦點
雖然係自拍，但如果可以攝入更多嘅背景，對相片構圖或是故事性都更強，但用腳架拍攝，好難避免有路人甲出現。未必個個都想刪除路人甲，但對相片有「潔癖」嘅我，有個路人係相好篤眼篤鼻！
方法 1：先影空白背景再剪貼
Set 好腳架後，我都會習慣影一張無人嘅環境相方便剪貼，就算好難完全無人，都需要多影幾張。之後再埋位影相，咁就算當中出現幾多路人都唔怕了。後製時就可以將清境相嘅部份貼係路人出現嘅地方就會自然得多。要注意的是，如果相機使用自動模式，係夕陽時分，有機會每張相片白平衡同光暗都唔同，呢個方法就未必用得著。
▲ 先將找一個沒有路人嘅位置利用「矩形畫面選取工具」選取並複製到有路人嘅位置，再按「影像」＞「調整」＞「亮度/對比」調到可以融入相片中，最後用模糊咗嘅「橡皮擦工具」擦走邊緣，路人就會完全消失係相片中。
方法 2：「內容感知」估出原來背景
遇著一啲死都唔走嘅路人，又或者遠方嘅垃圾之類，可以用 CS5 開始新增嘅「內容感知」功能，利用 PS 嘅運算，迅速移除。不過呢個方法會有少許瑕疵，所以唔建議用係大面積嘅地方，但只係放上網的話，都已經好夠用。
▲ 利用「矩形畫面選取工具」選取路人甲，再按 Delete，選擇「內容感知」，PS 就會自動估計原來嘅環境，路人就會消失了。
方法 3：模糊背景令人物更明確
若果路人真係太多，背景又太複雜，正常係拍攝時就應該用大光圈鏡頭營造淺景深，以突出主體。但拍攝時無考慮呢點，後製將景深增強亦係可行方法。
▲ 先用「磁性套索工具」將主體圈住，再複製多一個圖層，然後選擇原來嘅圖層，按「濾鏡」＞「模糊」＞「高斯模糊」，選擇合適嘅模糊度，就可以令做出景深效果了。
8) 污點修復 – 去暗瘡、眼袋
對女仔嚟講，美肌係非常非常重要，去暗瘡、去眼袋、瘦面、大眼，缺一不可。呢個時候就需要用到「污點修復筆刷」，將一點點嘅小瑕疵修補好。另外，PS CC 新增嘅「臉部感知液化」亦幫咗唔少忙，只要輕輕拉左右就可以大眼、瘦面、高鼻、改嘴角，同用手機 App 美肌一樣簡單呢！
▲ 選擇「污點修復筆刷工具」，調整合適嘅筆刷大小，再點係暗瘡、雀斑上就會一點點消失，而眼袋就可以先用「套索工具」複製一個圖層，再用「污點修復筆刷工具」消減眼袋，最後將新圖層嘅透明度調至40%，效果就會更自然。
9) 修身大改造 – 液化瘦腿，修手臂
女朋友未必個個都係美女，樣都仲可以靠化裝同美肌，但身形就要後製了！用「液化」功能就可以瘦手臂、變長腿，想做到點玲瓏浮凸都得。要做到 22寸小蠻腰毫無難度。不過修嘅時候切忌太興奮，都要注意背景會唔會被扭曲。如果背景含大量線條，最好先複製主體成另一圖層再液化，而缺少嘅部份就需要用清境相填補。
▲ 選用「濾鏡」＞「液化」＞「向前彎曲」，再選擇合同修改部份相略嘅筆刷大小，向要瘦嘅部份推就可以推出理想曲線。
10) 濾鏡營造氣氛
光暗OK、構圖OK、樣OK，最後就係相片氣氛。雖然加要用 PS 加濾鏡並唔似手機 App 咁簡單，需要好多步聚同技巧，不過都可以用以下幾個方法簡化程序。
方法 1：用 Lightroom 自己調色
用 PS 調色或者會覺得複雜，可以試下用 Lightroom 大批處理整輯相片，讓風格一致。就好似很起嚟舒服嘅日系、高對比嘅Lomo 風，都可以簡單由改變色溫、曝光、對比、亮部、陰影等完成。
▲ 日系風格重點在於優雅同抽離，除咗要揀一張有大面積留白嘅相，調色方面需要調低對比、過曝、偏青色嘅亮部以及暖橘嘅暗部。
方法 2：記錄動作成批改變風格
Lightroom 方便調色，但要做黑角、光暈等複雜效果還是要靠 PS。如果要大批處理相片，可以係儲存動作待下次用番。只要係「動作」面板中按下「開始記錄」，再執行想記錄嘅操作同指令，最後按一下「停止播放/記錄」，就可以係任何一張相播放一連串已記錄嘅工作，可以更快捷同一致地處理同一輯相。
▲ 對新手來說，要係 PS 多步驟地進行調色，做黑角、光暈、負片等可能好難，但可以係網上借助各大師分享嘅「動作」，用係自己嘅相中。就好似 75個攝影師必備的Photoshop Action 文章內就有多個「動作」可以用了。
方法 3：下載第三方濾鏡
除咗自製濾鏡，下載第三方濾鏡，都係唔錯嘅選擇，按一下就用到濾鏡，零技巧。
▲ Google 收購 Nik software 之後，提供咗 7款免費專業級濾鏡外掛。
▲ 只要下載外掛，開啟 PS 就會出現，濾鏡視窗。簡單選擇就可以應用不同濾鏡。
▲ 每個濾鏡都可以再揀色調同強度，對新手執相有好大幫助。
雖然上面所講嘅後製技巧都好簡單，不過要改得自然，改完好似無改咁就要一點點耐性，逐張逐點執啦！
更多情侶放閃必技！
【情侶自拍攻略】學識呢幾招女朋友包滿意！自拍婚紗 10大 拍攝 + 後製 技巧大公開 (上集)
【情侶自拍攻略】學識呢幾招女朋友包滿意！自拍婚紗 10大 拍攝 + 後製 技巧大公開 (下集)
【情侶自拍攻略】 呃like必備！自拍放閃 10大 必備 Pose
【情侶自拍】影出不一樣的放閃相！香港兩大主題樂園影相位逐個捉 (上集)
睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie