哈哈～依莉詩 呢排太懶⋯⋯拖吓一個禮拜又一個禮拜～結果個活動都完咗先嚟出片！不過點都好啦！都要將咁開心嘅一日記低先得！話說上年同大仁一家去 白石燒烤水上樂園 因為中途出咗啲意外 (被餵蚊狠狠踢咗一腳)，玩得唔夠盡興，所以今年我哋再約埋癲返日！今次小欖燒烤場唔單止有充氣滑梯，仲加咗 B Duck 做主題，地方又大啲，人又少啲，玩得開心好多呢！
B Duck 主題夠繽紛
水上樂園多數都以鮮艷充氣裝置為主，呢個水上樂園梗係唔例外，而且仲用咗醒目 B.Duck 做主題，每樣嘢都好colourful呢！特別係巨型 B.Duck 坐喺粉紅鶴上面，好有夏天Feel，打卡一流！
▲ 成個水上樂園都好繽紛，好有活力。
▲ 巨型B.Duck 隔離仲有好多水泡畀人拎嚟影相。
▲ 低炒隻 B.Duck 好型！
任瀡4條充氣滑梯 大家都好守秩序
因為水上樂園定位係畀小朋友玩，4條滑梯都唔算太高，不過當中有兩條都幾刺激，瀡完落嚟都仲會滑一段路，唔係即刻落水池，感覺正好多呢！而且人數唔多，玩嘅人都好有秩序，大家都一個跟一個瀡，唔會爭先恐後，可以盡情玩！
▲ 滑梯有唔同刺激度，大人小朋友都啱玩！
▲ 呢條瀡完唔會直落水池，可以滑到好遠～
水池啱小朋友玩 但部份水質不夠清徹
除咗滑梯仲有好幾個水池畀小朋友玩，入面有好多波波同鴨仔，大部份水池都幾乾淨，每段都會做清潔，但部份水質就有待改善。
▲ 香蕉船搖呀搖～
▲ 好慘～畀小朋友蝦！嗚嗚⋯⋯
▲最尾仲有掟水彈大賽𠻹！
食物種類唔多 不限時任燒
玩完水上樂園就係時候去BBQ！小欖BBQ場都幾大，近海嘅位都幾通風，不過帳幕下面就有啲焗，所以如果唔落雨，最好就係外面燒呢！食物款式唔算多，無乜貴價食材，但不限時全日任燒任食，可以成班人玩番日都唔錯丫！
▲ 玩咗咁耐都肚餓，個個第一時間都燒丸同腸！
▲ BBQ場旁邊有個私人沙灘，可以好好玩沙。
小欖ｘB Duck沙灘派對 – 水上樂園
地點：小欖燒烤樂園
日期：2018年 6月 23日至 9月 9日 (星期六、日)
詳情：https://bbqbeach.com.hk/duck_beach_party.html
更多一日遊路線！
長洲 1.5 日單車美食懶人包！食盡 7大小食 ＋ 張保仔洞探險