香港生活空間咁少，拍拖除咗出街行商場真係無乜地方去，有時想有個寧靜空間靜靜哋兩個人Hea吓都唔容易。最近我 依莉詩 搵到個好地方，$135 可以坐成日，無論傾計、食嘢、工作、自修都得，好有返到大學時期嘅感覺！
休閒談心超放鬆地帶
喺人來人往，極繁忙嘅香港，除咗行街、食飯、睇戲，真係諗唔都啲咩節目。有時只係諗去邊都身心疲累，真係好想有個地方可以放鬆心情，好好hea吓！奈何有幾多人真係有自己嘅私竇，可以坐定定兩個人傾吓計。
而呢個 MyBASE 位於油麻地嘅休閒工作空間分咗 3層，有多個不同區域，當中嘅超放鬆地帶有落地玻璃、景觀開揚，最正係有梳化，可以除埋鞋，俾人一個極放鬆嘅體驗。倆口子坐係到一個下晝，咩都唔做都可以係一個好節目！
▲ 就算樓上Cafe都要限住時間走，但呢度坐足一日都係百幾蚊，仲要有落地玻璃同陽光照射，好有係屋企嘅感覺！
▲ MyBASE 其實銅鑼灣都有一間店，不過就主打 Co-working Space 多啲，而油麻地店呢度以日系設計，5樓無咁多間隔，以散客為主，最少只係Hea 30分鐘都得。
▲ 7樓仲有個露天陽台，做嘢、溫書溫到攰可以出嚟呼吸吓清新空氣。
放鬆嘅地方有，認真工作嘅地方一樣有。好似我呢啲文字工作者，除咗返工，星期六日都要寫文、剪片，喺屋企有時真係好難專心。呢度絕對係一個好地方，就好似返咗大學時候咁，可以俾我一邊陪住男朋友，一邊各自專心工作。
▲ 呢度有好多唔同嘅枱凳，大家都無既定位置，可以自由選擇鍾意坐嘅位置投入工作。更好嘅係，每個位置都有足夠嘅插頭同拖板，電腦去到邊可以插到邊。
▲ 日系嘅小木屋有一點點嘅私人空間，大家可以係度傾 Project，話唔定會諗到好橋！
▲ 5樓地方十分寬敞，而且有空間感。
▲ 只要 check-in 咗就可以喺同一日自由出入，因為有好多位，所以做到攰落街兜個圈，食個Lunch都唔洗擔心好似去圖書館自修室或者 Starbucks 咁，走開咗就無咗自己個位。
靜音自修室
唔單止學生溫習要長期作戰，我哋呢啲 Blogger 同 Freelancer 都好需要創作空間。7樓嘅超級自閉位光線充足，有獨立枱燈、拖板，而且環境寧靜，絕對可以專心工作，投入自己嘅世界。除咗全日收費，呢度更有月費優惠，啱晒一班長期作戰嘅人士。
自助零食咖啡站
無論做嘢定休息，一杯咖啡，一啲小食都係一種生活態度。呢度嘅咖啡小食區，有齊水機、咖啡、茶、盒裝、罐裝飲品同各種小食等，一律免費供應。如果真係肚餓，仲可以買輕食上嚟邊做邊食𠻹！
▲ 小食選擇雖然唔多，但就足夠俾大家叉叉電！
▲ 咖啡區有梳化，大家可以坐係度歎住咖啡吹水。
My BASE – 旺角店 Mong Kok BASE
地址：旺角彌敦道 562號 5-7 樓全層
營業時間：星期一至日 10:30-22:30
收費：
- 半小時：$20 (平日、周末)
- 3小時：$98（平日）、$108（周末）
- 全日：$125（平日）、$135（周末）
專業設備自拍館
除咗5樓同7樓嘅 MyBASE 外，6樓喺自拍館 Phocus。自拍空間內配備單鏡反光相機、專業影樓級背景紙、影樓級閃燈、三點打燈技術、iMac 電腦同 42 吋大電視。大家可以任用入面嘅器材同道具，換唔同嘅衫同布景紙，瘋狂自拍！而價格仲同 5 年前舊店一樣， 1-2 人每節 $278，其後每位每節收費 $88，仲送30 分鐘喺 MyBASE 免費享用咖啡小食同 Wifi，等大家可以即時睇返相𠻹！
▲ 曾以 19 歲之齡創立「逃出香港」嘅 Michelle 喺大學時期創立全港首間自拍館 Phocus，後嚟因為專注學業而短暫離開，今次決定捲土重來呢！
▲ 自拍空間內嘅花牆好正呢！
PHOCUS
地址：旺角彌敦道 562號 5-7 樓全層
營業時間：星期一至日 10:30-22:30
收費：每節 $278 (1-2 人)，其後每位每節收費 $88
更多一日遊路線！
長洲 1.5 日單車美食懶人包！食盡 7大小食 ＋ 張保仔洞探險