雖然今年冬天無點凍過，但春天已經不知不覺嚟到啦！天氣咁好，戶外活動當然唔少得。如果想露營又唔知點入手，今次我 依莉詩 就有好介紹！就係 3月23-24日，無論新手定達人都歡迎嘅盛大露營Party「BE A CAMPER！春分露營體驗祭」。除咗露營之外，仲有手作坊、分享會、山野聚餐、buskung 表演等一連串活動，一大班人盡情 chill 返晚！
感受露營氣氛 由天光玩到天黑
對於露營嘅印象，相信唔少人都覺得污糟蹋塌，又多蚊又要體力勞動，所以我早排就率先去視察現場，發現原來而家嘅 Camping 已經唔係咁㗎啦！今次「BE A CAMPER! 春分露營體驗祭」主辦單位「Camperism」揀咗喺長洲西灣嘅「西園 – 特色露營歷奇樂園」舉行。環境唔單止舒服，一連串嘅活動仲好 chill，好歎𠻹！兩日一夜嘅戶外露營體驗祭有戶外市集、工作坊、海外露營達人分享、特色餐飲同兒童戶外體驗等等，而且結集咗唔少本地同亞洲戶外露營品牌，好似日本品牌「Chums」及「Belmont」、台灣品牌「Black Design」、中國品牌「自由之魂」等等，鍾意露營嘅朋友可以一次過買齊想要嘅露營用品。
▲ 「BE A CAMPER! 春分露營體驗祭」有日營門票及露營門票 3 類，可以揀想玩幾耐都得！不過要注意嘅係，門票只包1 杯麥子啤酒或特飲，要參加工作坊或者享用山野料理都要自費。另外，過夜都要自備最大 3米X3米 嘅帳篷，或留意「Camperism專頁」稍後有詳細說明帳篷租借服務。
1) 日營門票(1-day Pass)
成人 HKD$150
小童^ HKD$75
2) 日營門票(2-day Pass)
成人 HKD$250
小童^ HKD$125
3) 露營門票(2D1N)
成人 HKD$350
小童^ HKD$175
^十二歲或以上以成人票計算，未滿三歲不收費。
山野料理
讀書時露營都係食杯麵同BBQ，估唔到今時今日露營已經升晒 Lv！今次有達人「宇宙火食」教路點整山野料理，自己劈柴自己炊三文魚，完全係兩個層次。一班人聚埋享受美食，好似去咗外國郊外咁，有種滿滿嘅假日幸福感！
▲ 劈柴真係第一次，仲要第一次就整親手指𠻹！哈哈！
▲ 要將三文魚炊熟，就係要靠呢個火箭爐。睇落好有歐陸風情呢！
▲ 原條三文魚連皮釘喺木板，再灑鹽同酒，以柴火慢慢燻熟，成件事真係好原始！
▲ 三文魚外香內嫩，又滑又多汁，心機同味道都係一流！如果露營體驗祭當日仲有，一定要食多次！
▲ 呢個用天然酵母做嘅酸麵包係長洲特產，要一個月前訂，而且唔會外銷，配手撕雞醬、蕃茄醬同牛肝菌醬食就好滋味！
▲ 甜品有 Chocolate Brownie，食之前棉花糖用火槍燒一燒，非常邪惡！
▲ 記得，為咗響應環保，今次活動餐飲唔會提供任何餐具，所以要自備餐具（如碗、杯、叉匙等），或者可以租用「We Use」可循環再用餐具，盡力減廢。
露營達人分享 手作市集 X 工作坊
露營體驗祭除咗美食，仲有一連串嘅活動可以參加，唔止有非洲鼓班，仲有環保工作坊、紮染班、現場表演同戶外手作市集等。當中更請嚟重量級露營達人「長野修平」先生同營友交流，親身教授手作餐具工作坊同利用自然物料創作手工藝品𠻹！
▲ 非洲導師教授認真非洲鼓，大家都拍得好 high！當然此起彼落嘅鼓聲亦令露營更有氣氛！
▲ 當日亦會有一啲用大自然物料製作掛飾嘅環保工作坊可以參加。
▲ 有興趣參加紮染班的話，記得帶定啲白色棉質衣物、毛巾等，齊齊放入大染缸呀！
▲ 染出嚟嘅花紋係咪好特別呢？
長洲私人營地 環境乾淨衛生
雖然露營體驗祭當日，長洲西園農莊嘅營唔會開放，不過都介紹下啦！如果大家露營體驗祭去唔到，平時都可以考慮吓嚟渡假嘛！好似我哋呢啲露營新手，怕帶一袋二袋物資麻煩，嚟呢度真係可以兩手fing fing 去Glamping！喺長洲西園有 4款營帳可以租借：印第安營、南非營、觀星圓拱屋、蒙古包，合共40個營，各具特色。營內有燈、牀同被鋪，部份營內仲有獨立洗手間、水冷空調同風扇等設備，非常貼心。
除咗露營，西園農莊仲有好多玩樂設施可以參加，例如越野平衡車、草地障礙弓防箭、森林弓防箭、泡泡足球、沿繩垂降體驗、馬騮上樹、手工藝工作坊、野外製作叫化雞、幼童滑步車、非洲擊鼓互動工作坊、營火會、脆脆雞蛋仔DIY、遙控機動船及風帆船等。玩足兩日一夜都唔會悶！
▲ 觀星圓拱營係一個私人太空館，躺在營內可以透過透明幕睇滿天繁星，啱晒二人世界！
▲ 營帳內設備齊全，有齊冷氣、蚊帳、燈、床等設備，仲有獨立廁所，不過收費同酒店房差唔多，算係特別嘅體驗。
▲ 南非營比較平實，每個營有床、風扇、燈等設備，可以住最多 9個人，仲有陽台、野餐枱，一大班人可以喺草木圍繞下享受自然氣息。
▲ 印第安營帳幕上畫了七彩特色圖案，影相呃like就啱晒，而且係 4款營中最平，適合高階玩Glamping嘅朋友。
▲ 起初擔心露營就無得沖涼，好彩呢度有24小時冷熱水浴室，而且廁所都好乾淨，仲有24小時飲用冷熱水供應。新手都可以放心過夜！
▲ 去西園都幾方便，長洲碼頭轉坐街渡大概5分鐘就到西灣碼頭，再行3分鐘就到西園大門口。如果夜晚想去長洲市區食宵夜，都只係行 15至20分鐘就到，一定唔怕餓親！
BE A CAMPER! 春分露營體驗祭
日期：2019 年 3 月 23 日至 24 日(星期六及日)
時間：上午 10 時至下午 6 時
地址：長洲西灣，西園 – 特色露營歷奇樂園
活動查詢：https://rebrand.ly/camperism
購票：https://rebrand.ly/beacamper-book
PS: 早鳥門票!! 2月28日或之前購票, 輸入指定早鳥優惠碼「beacamper2019」全部門票8折 (早鳥優惠數量限定，額滿即止)
更多一日遊路線！
長洲 1.5 日單車美食懶人包！食盡 7大小食 ＋ 張保仔洞探險