星期六日想拍拖輕鬆吓，但香港同澳門高質少少嘅酒店都成2千蚊，仲未計車費同食玩，隨時仲貴過去台灣4日3夜。對於無假又想出去過夜嘅情侶嚟講，上深圳或者都係一個唔錯嘅選擇！今次我 依莉詩 就去咗龍華新區嘅觀瀾湖，唔使2千蚊就有得食住玩，扮文青打卡做手作，體驗打高爾夫球同溜冰，仲有得食多國菜、飲芝士奶蓋，玩足2日1夜都唔怕悶！
觀瀾湖2日1夜玩餐飽
而家唔少人放假都會上深圳玩，貪少人啲地方又大啲，而今次去嘅觀瀾湖喺龍華新區，比較近皇崗口岸，搭30分鐘專車就可以到達園區。雖然無福田區咁多新商場，不過觀瀾湖景區好大，跨越深圳同東莞，有免費Shuttle bus 接駁往來唔同景點。除咗兩間酒店外，仲有手藝工作坊、觀瀾湖新城、生態體育園同高爾夫球場等，只係留喺觀瀾湖景區內， 2日1夜都可能玩唔晒！
第一站 – 會所食多國菜
小旅行唔使趕船趕飛機，自然唔想神咁早起身。我哋 10點左右由柯士甸出發，搭直通巴士用45分鐘到皇崗，再搭30分鐘專車就到達觀瀾湖景區。Check in 完啱啱好 12點，去山景閣食個 lunch。通常上深圳都係食中國菜，一係點心，一係打邊爐，起初都擔心食外國菜會唔啱食，好彩呢度嘅多國菜都幾啱口味。我哋點咗韓式牛肉飯、肉骨茶、海南雞飯 同 沙嗲雜錦串燒，味道同喺香港食差啱多，啲雞仲好有雞味，好有驚喜！
▲ 韓式牛肉飯用咗澳洲肥牛，薄切後連同洋葱、醬汁一齊煎，香口又軟腍，食埋泡菜仲好開胃𠻹！
▲ 肉骨茶比較似馬來西亞嘅肉骨茶，由多種藥材、豬肉同妃子煲成，有淡淡藥材甘味，非常暖身。
▲ 海南雞飯睇落好普通，不過食落幾有驚喜，清遠雞以薑葱湯浸泡 30分鐘，再用冰水過冰河。唔止肉質嫩滑，好有雞味，雞皮更不油不膩，好爽口，加上青檸汁代替醋調味，感覺清新。
▲ 沙嗲雜錦串燒有雞、牛、豬同菠蘿串，唔太辣，有淡淡椰香，好有東南亞嘅 party 風味！
山景閣
位置：觀瀾湖深圳會所一樓
第二站 – 即場上堂學 DIY 手作
食飽就梗係去玩，我呢啲偽文青就急不及待去手藝工場做下手作仔。會所門口就有A線穿梭巴士直接去，非常方便。手藝工場一棟就有齊最 hit 嘅手作工藝，皮革、紮染、紙藝、木工、陶瓷、金工，就連燒玻璃都有。三個人以下仲可以 walk in 入去，唔做 Book 都有導師即時教你整手工藝品。比起香港要預約上興趣班自由得多，而且設備齊全，連燒爐、印模機都有，整出嚟嘅手作自然更有水準啦！
買酒店套票會包其中一項傳統手工藝項目，有活字印刷（5張）、團花剪紙（5張）、馬克杯墊（1份）、陶瓷串珠（20顆）、拼豆豆（1個）、橡皮章（1塊），當然做嘅手作都比較簡單。如果想做進階版嘅手作都唔算貴，一個皮製卡片套都係 RMB158，平過喺香港買材料包自己整。啱晒情侶嚟 DIY 禮物送畀對方。
手作坊 1：陶藝
中學美術堂未整過，今次終於可以體驗下整陶瓷嘅滋味。新手可以試下整杯或者碗，大約 1個鐘就可以完成塑形。為咗節省時間，我哋都唔使等佢風乾同入爐。塑形後導師會代勞，做後期嘅工序，我哋只要喺寫好地址，兩星期左右就會順豐到付到香港，畀大約 $40 ，靚靚嘅成品就會送到府上。
▲ 第一次接觸陶藝，好有《人鬼情未了》feel～雖然搞到一手都係，不過整到一個正正常常嘅杯都已經好有成功感！
▲ 情侶嚟到，整對對杯都幾 Sweet 㗎！
手作坊2：皮革
唔少情侶都會整皮革製品畀另一半做禮物，今次一齊整就更加有意義！呢度嘅皮藝課程唔止有passport 套、銀包、手環、卡片套，連鞋同手袋嘅高級課程都有。當然愈複雜嘅皮革製品要花嘅時間就愈耐，如果嚟玩1日，做卡片套或者銀包就比較簡單。今次我哋整嘅「柴犬」卡片套用咗 1個鐘就完成，可愛又實用！
▲ 揀好自己鍾意嘅皮，導師會用印模機 cut 好個形，之後就開始動手完成各個工序。
▲ 當中比較難處理嘅鑲鈕同刻字會由導師代勞，咁就包唔會失手！
▲ 全程導師都講廣東話，而且仲好搞笑𠻹！喺我哋討論呢個係「狗」定「熊」，還是「狗熊」嘅時候，佢就好正經咁同我哋講，呢個係「柴犬」卡片套！你哋又覺得似咩呢？
手作坊3：紮染 + 布藝
除咗陶瓷同皮革，仲有連小朋友都啱玩嘅紮染班。我哋經過嘅時候就咁啱有班學生嚟上堂，導師好認真咁教佢哋藍色染料點整，同埋點摺條手巾嚟染唔同嘅圖案。此外，仲有拼布同做衫等較複雜嘅課程可以嘗試，一站式由染布到車衣都學到，隨時可以自己 DIY 一件衫呢！
▲ 用摺疊、衣夾、橡筋等唔同技巧就可以染出獨一無二嘅花紋。
▲ 染完布，如果有時間仲可以學埋點縫製公仔同衫𠻹！
手作坊4：玻璃
玻璃工場真係好少有，呢度真係有個燒爐可以學吹玻璃。可惜今次時間有限，唯有砌住馬克杯墊先啦！
手作坊5：金工
如果想親手整對情侶對戒，或者整耳環、頸鏈畀另一半，呢度一樣有金工堂可以上。揀好想整咩款，導師會教你相應嘅技巧同工具，將金屬打造成獨一無二嘅形狀，過程都幾好玩㗎！
手作坊6：木材
至於木材製品更加係環保與工藝嘅結合，導師利用咗唔少上年颱風「山竹」吹冧嘅樹木嚟做裝飾品，真係好有心思。最估唔到，就連大型傢俬都可以係呢度學整𠻹！
藝術品商店
自問無問藝術天份，未必想自己動手做，手藝工場最低層都有個大型展區，售賣各種著名工藝大師嘅作品。不過價格就唔講得笑，Window Shopping 下，吸收下文藝氣息都唔錯嘅！
▲ 自己整嘅陶瓷同大師級嘅作品真係無得比，不過價值各有不同嘅。
▲ 同樣係紮染，但呢度每一件都係手作藝人匠心獨運之作，要好好欣賞。
手藝工場
開放時間：10：30-19：30
三個家庭以上需提前預約（預約電話：李老師0755-23774419）
第三站 – 花花文青 cafe 打卡
▲ 大書架加上吊燈，好有書卷味！
▲ Cafe 座位多，非常闊落，加上人流唔多，最啱飲杯嘢，影下相，hea 一下。
蔓花園
位置：觀瀾湖新城購物中心旁觀瀾湖藝工場
第四站 – 特大溜冰自私玩
坐咗咁耐，係時候活動下，觀瀾湖新城 MH Mall 就有得唱K、睇戲、溜冰同打保齡。雖然呢啲香港都有，但就比較低消費，好似溜冰咁，60至70元一局就可以玩足 5個鐘（第一場：10:00-15:30；第二場：16:00-22:00），而且呢個冰堡國際花樣溜冰場仲要勁大，人流又小。無論初學者喺旁邊慢慢爬，定係高手係場中穿梭都一樣咁自在。
位置：觀瀾湖新城L3/L320
開放時間：星期一至四，週末及假日－上午10時至晚上10時；星期五－上午10時至晚上8時
第五站 – 露天 cafe 食燒春雞
講到晚餐，唔少人上深圳都會食海底撈、探魚，幾乎無辣不歡。既然觀瀾湖新城 MH Mall 有多間唔同風格嘅餐廳，今次一於換換口味，試下西餐。Patio Café 喺一間行英倫風嘅音樂餐廳，有室內同室外坐位，不時有樂隊現場表演。坐係露台望向四周，好休閒舒意！而餐廳嘅食物水準都唔錯，特別係燒春雞嘅雞皮燒得特別香脆，肉質嫩滑，一點都唔嚡口 (似乎喺大陸食雞特別有雞味)！
▲ 燒春雞選用12周嘅春雞以多種香料醃製一日一夜，再用180度烤焗以成。雖然唔算大隻，但就嫩滑有雞味，表皮燒得香脆之餘，肉汁鎖喺雞肉內，入味又Juice！
▲ 餐廳嘅招牌菜巴迪奧漢堡都唔簡單，勁厚嘅牛肉餅塗上惹味燒汁，再配芝士、蕃茄、酸瓜、洋葱、煙肉多種配料，層次豐富，非常滿足！
▲ 食完肉，都要食下菜平衡下，呢個養生沙律有超過 5種新鮮蔬菜，牛油果、芒果、士多啤梨等，配埋唔同嘅堅果，口感清新。
位置：深圳市龍華新區觀瀾高爾夫大道 1 號鄉村俱樂部
營業時間：上午8時至凌晨12時
菲律賓樂隊現場表演時間：逢星期二至日 晚上7時至10時45分
第六站 – 期間限定燈海 浪漫打卡
食飽飽，我哋去咗旁邊嘅生態體育園散下步。公園有各種遊樂場，例如旋轉木馬、摩天輪、太空漫步、海盜船、槍林彈雨、滑行龍、碰碰車等，可以畀大人細路消磨大半日。公園不時都有唔同主題展覽，好似今次就好好彩有「魔法森林燈光展」，每個角落都佈置咗 LED燈飾，有魔法樹、馬車、蘑菇、天使，配合埋真實嘅摩天輪，喺呢度散步，真係好有去日本燈海嘅氣氛，超級夢幻！
▲「魔法森林燈光展」嘅場景都約多，而且無乜人，感覺仲正過上次去名古屋嘅「名花之里」呢！
▲ 燈海下散發住濃濃嘅節日氣氛呢！
▲ 可惜「魔法森林燈光展」去到農曆年就結束，大家可能要等到下年先有得再睇燈海，不過展覽緊接嘅櫻花展好似都唔錯呢，大家都可以考慮下去欣賞呀！
位置：生態體育園
開放時間：平日－上午11時到下午6時；周末及假日－上午9時到下午6時
收費﹕每項收費人民幣10元至30元不等 (適逢生態體育園主題展期間，遊樂暢玩雙人套票項目需加收門票費)
第七站 – 芝士奶蓋
玩咗成日，一路都心思思想飲杯芝士奶蓋。除咗喜茶之外，觀瀾湖新城 MH Mall 入面都仲有好多茶飲選擇。今次就試咗台蓋，3cm 嘅奶蓋比一般飲嘅濃厚，茶底清甜，飲完真係有幸福感！如果鍾意飲水果茶，呢度都有 813 Baesan ，而鍾意珍珠奶茶都可以試下御可貢茶，變奏版珍珠奶茶，由黑糖製成啫喱，非常特別。想打卡都可以飲鹿角巷蝶豆花冰沙，天然顏色漸層，絕對 IG-able！
多間茶飲
位置：觀瀾湖新城 MH Mall
第八站 – 酒店房空間感十足
盡情玩咗一日，自然想沖過靚涼瞓返覺。觀瀾湖深圳同東莞都有酒店，雖然東莞酒店比較大，不過為咗方便，我哋都係 book 咗深圳酒店。原來豪華大床房都比想像中大，樓底高，空間感十足，而且巧妙運用玻璃、鏡等設計，將浴室同廳連成一體，令整體感覺更加開揚。而浴室更大得誇張，浴缸、淋浴間同廁所分開，仲有兩個洗手盤𠻹！整體都幾乾淨，一入房仲聞到香茅味嘅香薰，好似話用嚟驅蚊，而露台仲對住高爾夫球場，相當寧靜，真正有渡假嘅感覺！
▲ 房間夠晒大，兩個人住都可以有私人空間。
▲ 露台對著高爾夫球場，有唔同高矮嘅植物，一片綠油油，令人十分放鬆。
▲ 房間設計巧妙運用玻璃、鏡等設計，將浴室同廳連成一體，令整體感覺更加開揚。
▲ 浴室整體都幾乾淨，浴缸、淋浴間同廁所分開，仲有兩個洗手盤𠻹！
▲ 酒店主打東南亞風情，房間都圍繞住中間嘅園林同泳池，唔怕住到尾房之餘，仲好有渡假屋嘅感覺，一出房門就係花園。
第九站 – 自助早餐食物款式多
瞓醒行去會所嗰邊嘅山景閣食自助早餐，食物種類比想像中多。記得以前返大陸食嘅自助早餐都係酸奶、餃子同粥，好彩呢度嘅嘢食都啱口味，廚師仲會即場煎奄列同湯麵，都算高質。酒店房間配套設施都十分齊全，check out 之前記得玩埋羽毛球、乒乓球，或者壁球先走呀！
▲ 麵包嘅款式都多，而且幾鬆軟。
▲ 冷盤都正正常常，唔會話有古怪嘅款式。
山景閣
位置：觀瀾湖深圳會所一樓
第十站 – 高爾夫球揮捍體驗
食飽就到咗成個 Trip 嘅重頭戲！既然觀瀾湖最出名係打高爾夫球，又點可以唔體驗下。觀瀾湖高爾夫球會有 12大球場，總共 216個洞，被「世界吉尼斯記錄組織」認定為世界第一大高爾夫球會，場地大到要坐高爾夫球車出入先得。落得場揮桿嘅都非富則貴，不過想體驗有錢人嘅玩意，都唔係冇辦法，有部份酒店套票包咗揮桿體驗，含1條球道，1支球桿，練習球100粒。係綠草如茵嘅環境下揮桿，其實都幾寫意㗎！
▲ 一大片嘅草地真係好養眼，如果可以喺度野餐就好啦 (誤)！
▲ 單單員係參觀「世界杯球場」尾 9個洞都用咗成個鐘，你話個球場幾大。
▲ 想體驗記得準備好一套非牛仔類服飾，例如有領高爾夫裝，平底高爾夫或運動鞋。唔好好似我哋咁，著錯衫就會好易受傷㗎啦！
▲ 原來打高爾夫球要好講技巧同姿勢，就連球桿都分咗好多種呢！
▲ 學咗成個鐘，終於都可以揮到標準嘅一球，真係好有成功感！
▲ 去會所嘅途中會經過「星光大道」，原來有唔少國際巨星同球星都留低過腳毛㗎！
▲ 嘩！～姚明隻手掌大我兩倍有多！
第十一站 – 即片片皮鴨兩食
酒店套票包咗 $500餐飲現金券，如果唔食自助晚餐，可以揀去駿豪軒食 lunch。駿豪軒主要食中菜，坐得舒適，枱同枱之間有距離，可以安心傾計。而且價格都合理，原隻片皮鴨，一鴨兩食都係$350人仔左右，隨時平過係香港食。
▲ 片皮鴨係香港食得多，呢度嘅水準都唔差。原隻片皮鴨由待應即場片皮，用蝦片吸走多餘油份，睇落蠟蠟令，好吸引！鴨皮相當脆口，用蝴蝶包同薄餅皮夾住食好滋味！
▲ 啲肉加咗松子仁炒鴨鬆，用生菜包住食又係另一番風味！
▲ 布袋豆腐係自家製，豆味濃郁，用石鍋上，熱辣辣，撈飯一流！
▲ 呢度嘅餸唔止食得，仲好睇得！好似錦繡芙蓉山桃膠就用洋蔥割開成蓮花座，蛋白、海鮮同桃膠炒到好似賽螃蟹咁，口感有層次。
▲ 平時食中式包都係豆沙、蓮蓉、奶皇，呢個熊貓包唔止造型可愛，仲係燕麥餡，少甜更健康。
駿豪軒
位置：觀瀾高爾夫球大道1號觀瀾湖度假酒店二樓
營業時間：周日至周五 ( 11:00 ~ 15:00 / 17:30 ~ 22:00 )；周六及公眾假期 ( 11:00 ~ 22:30 )
抵玩套票連接駁巴士
今次嚟觀瀾湖嘅體驗都唔錯，多嘢玩之餘又唔似長隆、華僑城咁困獸鬥，食嘢、打卡、運動、手作都有，可以話動靜佳宜。加上而家推出嘅套票有齊酒店、交通接送、各種玩樂設施，比自己訂房抵好多，2千蚊都唔使就玩過夠，真心抵玩！
▲ 觀瀾湖度假酒店地點唔太方便，好在有shuttle bus 直達。我哋喺柯士甸搭45分鐘直通巴士到皇崗口岸，過關後左轉到皇崗口岸17號鋪，坐穿梭巴士E線，大約45分鐘就到深圳酒店。
▲ 酒店亦有多架免費接駁巴士穿梭景區，A車係去程，B車係回程，每20分鐘一班，而假日仲會加開特別班次H車 (去) 同 M車 (回) ，想去邊個位都非常方便。
2天1晚觀瀾湖雙人悅享套餐 $1,458
1、觀瀾湖度假酒店高級豪華（山景）客房壹晚
2、豪華自助早餐
3、500元餐飲現金券或雙人60分鐘休閑舒緩水療體驗（需提前1天預約）
5、遊樂暢玩雙人套票（觀瀾湖體育園項目僅限日場遊玩，開放時間：09:00-18:00）
*推廣期由2018年07月01日至2019年04月30日
想知有咩平靚正優惠套票？即睇：觀瀾湖度假套餐 (深圳/東莞)
更多一日遊路線！
鴨脷洲漁村風情半日遊！食盡老香港情懷 – 船河、大排檔、糕點小食
長洲 1.5 日單車美食懶人包！食盡 7大小食 ＋ 張保仔洞探險