隔咗 3年無去過旅行，啲 yen 又咁平，第 1 站梗係返鄉下啦！幾經辛苦畀我搶到 Hong Kong Express $208 嘅平機票，2個人計晒所有嘢都係五千幾蚊，仲要喺情人節去，過埋生日先返，真係好完美！
今次想同大家分享下呢 11日嘅行程，由名古屋出發，玩盡京都、大阪、白川鄉同飛驒高山，唔止有呢幾年先開嘅新景點，當地超人氣嘅餐廳，仲有一啲中伏經歷。無論好耐無去過日本，或者即將出發嘅你，希望都可以畀到大家一啲 idea 啦！
京都篇行程
第一篇我會先講下頭 3日喺京都嘅行程，當中會有啲重點推介嘅活動同餐廳，亦有一啲會輕輕帶過 (你懂的⋯⋯)
Day 1 – 中部国際空港 → 近鉄百貨店Pass’e → 山本屋総本家 名鉄店 → 京都新阪急酒店
Day 2 – 五条夢館 → 伏見稻荷大社 → 五木茶屋 伏見稲荷店 →清水寺 → 京都駅拉麵小路 → 京都新阪急酒店
Day 3 – 保津川遊船→ 嵐山大街 → 雲ノ茶 → 竹林之道 → 渡月橋 → 出發去大阪
出發前做足準備！登記 Visit Japan 快速通關
都一段時間無飛過，有好多細節都唔記得咗，所以想提提大家一啲出發前嘅要點，唔好好似我咁傻，差啲 miss 咗班機！！！
1. 旅遊保險
旅遊保險呢樣嘢以前真係唔多重要，求其買最平就算，反正都好少機會 claim。不過而家雖然話「復常」，但都係有一定風險搞到上唔到機，或者行程要取消。好似 2月嗰排就成日有機突然取消，搞到我出發前幾日都仲提心吊膽，所以買旅遊保險嗰陣真係要睇清楚包唔包行程延誤嘅損失，始終出發前已經畀晒酒店錢，如果有咩閃失，都幾甘㗎嘛！
▲ 買旅遊保險除咗睇傷亡同行季唔見咗賠幾多，而家要注意埋行程延誤包唔包呀！
2. 電話卡
第2樣就係買電話卡，唔駛講都知今時今日上網真係好重要，隨時都要打卡、up story！平時大家或者會去鴨記買旅遊 SIM卡，但如果你嘅電話支援 e-SIM，反而仲平仲方便！
▲ 今次我就中咗伏，鴨記嗰張唔係收 docomo，好多地方都上唔到網或者勁慢！
▲ 如果去嘅日數唔多可以試下登記完美行（WAmazing），可以去日本多個機場領取免費SIM卡，入面有使用 500MB 數據流量，有效期為15天，仲話係用 NTT docomo 嘅 4G/LTE，唔夠用可以喺 App 加購 500MB、1GB、1.5GB流量，聽落好似幾方便！
3. Online check in
出發前要提早兩個鐘去機場寄行李應該都仲記得。如果想方便，最好喺出發前48小時至起飛前75分鐘喺網上預辦登機，咁去到機場就唔駛點排隊，直接去自助機撳機票，快好多㗎！
▲ 唉～呢個真係要提大家！！！登機閘口會喺起飛前20分鐘關閉！！！話說我哋見到個閘口係 19號，見標示寫行 5-15分鐘就到，所以大安旨意慢慢食早餐，點知 19號閘口唔係直行就到！原來而家多咗一邊停機嘅地方，有啲閘口喺要轉上天橋，又落天橋，行好遠先到，個 number 根本就係誤導人，都唔係同一條路就唔好順 number 啦！結果明明早兩個半鐘到機場，但最後一個上飛機，真係十級唔好意思！！！所以大家記得，如果係 10幾號嘅閘口，要再預多啲時間行過去呀！
4. 登記快速通關
以前去日本，空姐都會派啲黃色紙仔你填，而家就方便好多，只要喺出發前至少６小時上 Visit Japan Web ，填好基本資料同上載疫苗注射記錄同申報海關資料，到機場直接 show QR code 畀佢哋睇就得，過關畀以前快好多呢！
▲ 記得預早幾日上 Visit Japan Web 登記快速通關呀！
5. 當地交通卡
自由行最麻煩就係要自己搭車搵路，一張 Suica 或 PASMO 基本上必須嘅！如果你之前有，但對上一次去都可能幾年前，可能要先喺 App 入面查詢餘額，或者 check check 有冇失效。不過今次我決定喺 Apple Watch 直接買張新嘅，因為伸隻手就拍卡真係勁方便，仲可以直接用 citi bank 外幣戶口網上增值，唔收手續費，就好似平時八達通增值咁就得！減少咗好多因為唔夠錢，四圍搵精算機增值嘅麻煩！
Apple Watch 安裝及轉移 Suica／PASMO 教學
▲ Suica 或 PASMO 儲值金額使用期限都係最後一次使用日起算嘅 10 年內， 例如你在 2019 年 1 月 1 日最後一次使用該卡片，咁有效期限就到 2029 年 1 月 1 日為止，如果入面仲有好錢，就要去服務櫃檯辦理拎返了！
6. Book 定 酒店、餐廳、門票
除咗 book 機票、酒店，其實而家好多日本景點嘅門票或者餐廳都可以喺 KKday 或者 Klook 嗰到 book 到，雖然用港幣結算，好似無用 yen 咗抵，但就方便好多，唔駛好似以前 book 和服體驗咁，要經幾次 email 先 book 到。去到景點門口，基本上用 QR code 就入到場，唔駛再排隊買飛，簡單好多！
▲ 今次我哋遲咗無抽到白川鄉點燈嘅位，但 join 到 KKday 嘅巴士團，雖然貴咗少少，但真心好正！唔駛畀導遊費，又無水人買嘢，基本上都係自由活動時間，去咁多日自由行，偶然兩日 join 當地團真係輕鬆好多㗎！
▲ 講咗咁多出發前準備嘅嘢～終於起程啦！Let’s Go！
京都第1站：京都駅歎精緻和風早餐
去京都一定要歎茶，京都駅一上電梯就有一間由京都茶葉老鋪「福壽園」打造嘅新式 Café。除咗有傳統宇治茶之外，仲有花草茶、焙茶同多款精緻甜點，唔止食物貌相好靚，日式木系裝修仲好舒服，坐喺窗邊靜心眺望京都塔亦相當療癒！呢間鋪頭開得早，早餐仲有多款茶漬飯套餐揀，一朝早歎杯暖笠笠嘅綠茶，再食個三文魚茶漬飯，全日都元氣滿滿！當然我見佢仲有好多 tea set，每件都好靚好想試，可惜時間有限，唯有下次啦！
▲ 花朵夾餅入面收埋好多三文魚碎，撈飯食一流！
茶寮FUKUCHA
■地址： 京都市下京區烏丸通鹽小路下 東鹽小路町901 京都車站大樓 中央口二樓
■營業時間 ：8：30～21：00（最後點餐20：30）
京都第2站：五条夢館 和服袴體驗
和服其實著過好幾次，不過今次就想體驗一下，而家日本女仔畢業嗰陣著嘅行燈袴 ，比起一般和服貴少少，喺 KKday book 要 $437， 仲唔連 set 頭，不過真係好靚，點都要試一次！袴其實喺和服加多條長褶裙，可以配黑短靴，係昭和初期嘅女學生服，滿滿嘅文青氣息！
夢館其實幾年前去過一次，五条呢間就第一次去，衫嘅選擇都幾多，而且袴都有我鍾意嘅刺繡款，不過就好似少咗啲最近流行嘅蕾絲和服款式。如果想著大正浪漫風嘅和服，呢度就未必啱。另外，唔知喺之前少遊客所以唔夠人手，今次嘅體驗差咗好多。記得之前就算唔係1對1，都會1對2，有人同你一齊揀衫，比意見你點襯腰條嘅色同圖案先啱你，但今次好似帶咗你入到去就自己揀，揀完就自己搵路去換衫，除咗著嗰刻有人幫手，全程好似無人理咁，感覺今次就係租衫，無咗嗰種文化嘅體驗。
▲ 袴可以襯黑短靴，行路方便好多，可以多好多地方影靚相！
京都和服體驗夢館五条店
■地址：京都市下京区塩竈町353（五条通北側・高倉通東側）
■交通：
・從JR「京都駅」搭乘計程車約5分鐘。
・地下鉄「五条駅」1號出口，出站直走約3分鐘。
・京阪電車「清水五条駅」3號出口，過五条大橋直走約8分鐘。
京都第3站：漫遊伏見稻荷大社
租得套袴都係想去啲和風啲嘅景點影下靚，伏見稻荷同清水寺就係最好嘅選擇！由五条夢館步行 8分鐘，到清水五条駅 (京阪本線)，搭 11分鐘就到伏見稲荷駅。伏見稻荷有商店街大社同鳥居，唔計食嘢時間，行兩個鐘左右就好足夠。
伏見稻荷大社喺西元711年建成，主要供奉以宇迦之御魂大神為首嘅諸位稻荷神，掌管穀物同食物，除咗祈求取農作豐收，亦有祈求生意興隆、交通安全、學業進步等，而神使就係好可愛嘅狐狸，傳說佢哋會幫農家抓捕破壞農作物嘅野兔、田鼠等。門口就有兩隻狐狸鑄像，嘴咬住稻穗，象徵豐收，大家去到可以留意下！樓門同大社外拜殿等建築都以鮮紅為主色，非常有氣勢，而千本鳥居由好多好多鳥居組成，好似一條長長嘅隧道，絕對係必到嘅朝聖地！
▲ 商店街好多狐狸造型嘅紀念品同小食，超可愛！
▲ 鳥居造型嘅繪馬好特別！
▲ 千本鳥居人太多，加上有啲暗，影相真係有啲難，不過神社附近都有唔少靚景可以影相。
伏見稻荷大社
■地址：京都府京都市伏見区深草藪之内町68
■交通：搭乘京阪電車於「伏見稻荷站」下車、搭乘JR奈良線於「稻荷站」下車
京都第4站：五木茶屋食盡多款迷你丼
京都嵐山嘅老字號名店「五木茶屋」喺伏見稻荷開咗分店，可以喺鳥居旁邊，一次品嚐到 5種京都御膳，每個丼飯都係迷你版，相當精緻，用料都好吸引，有黑毛和牛、鯛魚、豆皮、蠔等等，小朋友先做選擇，嚟呢度可以全部都要！
▲ 因為唔記得 book 位，我哋12:30 去到，店員叫我哋 13:30 先再去，好嘢係值得等待嘅！
▲ 5個迷你丼飯加埋星鰻涮涮鍋都係 ¥ 4,000 (含稅)，非常高質！
▲ 黃金玉子丼看似好簡單，就係鰹魚高湯加上生蛋，但食落非常濕潤，好滑好香甜，比起用蘭王撈飯更高一個層次！
▲ 紅鯛魚以特製的柚子芝麻醬醃漬，嫩滑鮮甜，用紫菜夾埋青瓜一齊食，非常清新！
▲ 燒黑毛和牛丼係 5碗入面最大碗嘅，和牛輕輕燒咗，香口而嫩滑，入口閘溶！
▲ 牡蠣三文魚籽丼飯底由高湯煮成，而牡蠣肥美飽滿，加埋三文魚籽一齊成，口感十足！
▲ 豆皮和牛羹濃厚淡滑，牛味同豆味濃郁，好有幸福感！
▲ 星鰻涮涮鍋就係迷你邊爐，每樣都有少少，相當精緻！
▲ 雖然景觀無嵐山本店咁正，但望出窗邊就係鳥居，感覺都好舒服。
五木茶屋
■地址：京都府京都市伏見区深草開土町２０
■營業時間 ：10:30-18:00 L.O(19:00close)
■訂位：https://itsukichaya.com/ (只收現金)
京都第5站：最著名古老寺院 – 清水寺
無去過清水寺基本上等於無去過京都，無論自由行定跟團都一定會去。之前有去過睇紅葉，今次就係落雪，唔同季節都好靚，畀人好唔同嘅感覺！清水寺始建於778年，係京都最古老嘅寺院，更加係世界文化遺產之一。本堂上年整修完工，鷹架全數拆除，屋頂多咗裝飾金光閃閃，但仍然維持歷史感，煥然一新！除咗本堂，仲有多個建築都好值得去欣賞，例如：仁王門、三重塔、地主神社同音羽瀑布。
▲ 清水寺真係人山人海， 相影到靚相都要花啲心思取景。
清水寺
■地址：京都市東山區清水1丁目294
■交通：巴士207、83、85、87、88至「清水道」下車後步行10分鐘
京都第6站：2小時保津川遊船河 急流超刺激
因為每年 1月-2月嵐山小火車都會停駛維修，所以今次試下坐保津川遊船去嵐山。小船由龜岡出發，接著再穿越 16km 嘅山間峽谷，到鴨川匯合後流入澱川，最後喺嵐山上船。整個旅程大約 2個鐘，沿途嘅大自然風景好似水墨畫一樣，一年四季各有千秋，春天有櫻花、秋天有紅葉、冬天有雪景，好似置身仙境一樣。雖然唔可以停留嚟影靚相，但就可以張風景印喺心入面，好難忘！
▲ 其實當我見到隻船，又得幾度，仲落緊雪，仲要知道坐 2個鐘頭，真係有啲淆底，不過啲穿過啲峽谷，又有啲急流，加上船夫勁搞笑嘅講解，就好似去咗個加長版嘅「森林河流之旅」，都幾值得去一次！
▲ 船夫會用細長嘅竹桿、舵同槳嚟操縱船航行嘅方向，不時仲會搞下氣氛，我仲成為被選中嘅細路，有得做咗一陣船夫槳舵，2個鐘原來可以好快過！
▲ 中間會遇到好幾次急流，真係有離心力㗎！好刺激！！！
▲ 活動會受天氣影響，出發當日最好去上官網睇睇航行狀況！
保津川遊船
■地址：京都府亀岡市保津町下中島2保津川下り
■交通：
・JR京都轉搭嵯峨野線至 JR 龜岡站，步行 8 分至乘船場（約 30 分）
・搭乘特羅克小火車至龜岡站轉搭巴士至「保津川下り乗船場」下車
・阪急梅田站搭乘京都線至桂站，再轉搭巴士至「保津川下り乗船場」下車
京都第8站：人氣甜品店 – 雲ノ茶
嵐山除咗「%」人氣打卡店之外，抹茶控一定要去呢間以「雲朵」做概念嘅和風 cafe！雲ノ茶kumonocha 嘅抹茶甜點同飲品都好 IGable！嵐山店嘅裝修同其他分店一樣，走現代時尚與傳統日式氛圍，本來應該幾舒服，應該可以好 chill chill！可惜實在太多人，好多人排隊等緊你個坐，所以只好快快打完卡，草草食完完就走。
▲ 雲ノ套餐（¥1,180）當中嘅雲ノ抹茶拿鐵由宇治抹茶製成，抹茶香醇濃郁，微苦帶回甘，上面仲有奶泡畫成嘅可愛雲朵，好得意呢！
▲ 雲ノ慕斯整到好似舊雲咁，非常療癒，薄薄嘅白朱古力入面喺一層抹茶慕斯，中間包住紅豆餡，加上底層嘅海綿蛋糕，宇治金時幾時都係絕配！
雲ノ茶 kumonocha
■地址：京都市右京区嵯峨天龍寺造路町20-13
■營業時間 ：10:00～18:00
京都第9站：打卡勝地 – 嵐山竹林之道
嵐山最標誌性嘅景點一定係竹林同渡月橋，大約400公尺長嘅步道，左右兩旁都種滿大片高聳嘅綠竹，連天都睇唔到嘅壓逼感，好似畀大自然包圍一樣，就算有好多遊人，但只要仰望，就有一種平靜安寧嘅感覺。
▲ 竹林一整年都保持綠色，無論咩季節去都一樣可以欣賞到竹嘅美麗姿態。
▲ 嵐山站隔離有好多用和服布製成嘅竹，影出嚟都幾靚㗎！
▲ 竹林同渡月橋嘅距離唔係好遠， 行過去就到㗎啦！
嵐山竹林
■地址：京都府亀岡市保津町下中島2保津川下り
■交通：JR 嵯峨野線的嵯峨-嵐山站只有 10 分鐘步行路程
今次再去京都無特別去排好多個景點，輕輕鬆鬆享受個旅程，一邊欣賞風景，腦海不段重播阿 jer 嘅《坐看雲起時》，真係別有一番感覺呢！
～回頭望 渡月橋 化作細塵 散落桂川裡還是山 願你親身跨越 靈肉的疆界還是水 願你感恩生命 活著是偉大～
更多一日遊路線！
屯門後花園偽日本打卡路線！藍地水塘+龍門居夜市｜周末好去處｜一日拍拖行程
鴨脷洲漁村風情半日遊！食盡老香港情懷 – 船河、大排檔、糕點小食
長洲 1.5 日單車美食懶人包！食盡 7大小食 ＋ 張保仔洞探險