最近身邊愈嚟愈多朋上深圳飲喜茶，去Cafe扮文青，搞到我 依莉詩 都心思思想上去睇下深圳係咪真係咁好玩！由朋友帶路之下，去咗幾個新商場，我開始明白點解咁吸引，最大原因係啲路寬啲，又無拖喼黨，可以放慢節奏輕鬆吓！而今次就同 庶民食の楽 去咗啱啱有地鐵開通嘅歡樂海岸，睇我最愛嘅 Minions！
1:1 還原電影實景
去到深圳，Minions 當然要入鄉隨俗，改咗名叫「小黃人」，而「壞蛋掌門人」都改叫「神偷奶爸」，不過無論點變，都無阻大家打卡睇展覽嘅心情！4,000 呎嘅《神偷奶爸大視界》Minions 視覺展分咗 3層、7大互動體驗展區，當中包括：環狀劇院(Theater)、實驗室通道(Hallway)、格魯實驗室(Gru』s Lab)、壞蛋區(Villains)、女孩房間(Girls Room)、Minions 特區(Minions Zone)與 Pop-up store (Retail)，將多個電影經典場景同道具以 1：1重現眼前，真係勁多影相位！
▲ 因為我係平日去，所以真係無乜人，就連展館出面都可以無限任影，好爽！
首次開放 Gru邪惡實驗室
喺外圍影完一輪，正式入展區，一開始會睇一條結合咗3集《壞蛋獎門人》嘅短片，等 fans 慢慢回味！之後就可以進入Minions嘅基地 – Gru 實驗室！呢個實驗室展示咗好多 Minions 嘅研究成果，「臭屁蛋」、「急凍槍」等等邪惡武器都勁搞笑呢！
▲ 犀利哥條腿真係又瘦又長！
▲ 「急凍槍」要小心用先得㗎！唔係就會連同伴都 freeze 埋㗎啦！
4人惡人登場
之後出場嘅係 4大反派角色 Scarlet Overkill、Vector Perkins、EL Macho 同 Balthazar Brett。佢哋個個都企定定等你合照呢！
▲ Balthazar Brett 好似貓至咁型！
Agnes最愛獨角馬睡房
見完一眾惡人，轉一轉心情，去犀利哥乖女 Agnes 嘅房間兜返轉，充滿溫馨嘅房間，中間有最愛嘅獨角馬，少女心大爆發！另一邊仲可以幫 Minions 填顏色，填完投放上大螢幕，將自己嘅畫作成為大螢幕部份。
▲ Agnes 嘅房間隱藏咗好多Minions同獨角馬，你又搵唔搵到呢？
任影長長香蕉隧道
通過二樓之前，要穿過一條長長嘅香蕉隧道，黃色嘅牆埋伏好多黑色嘅Minions影，好似一隻隻煤炭屎鬼，好趣怪！配合埋燈光，就好似一個影樓咁，可以大影特影！
▲ 唔知係咪因為展覽要入場費，成條香蕉時光隧道真係可以無人到可以慢慢享用！
▲ 影出嚟嘅相好有雜誌風格！
認識 Minions 進化史
Minions fans 都知佢哋生存咗好多萬年，跟過好多個主人，經歷過唔同嘅人類文明。而二樓就可以睇到 Minions 嘅進化史！由細菌時代到埃及文明，再由疆屍時期到 King Bob年代，每一個造型都好正呢！
▲ 原來金字塔係倒轉起嘅XDXD哈哈！
▲ 而家最常見嘅工人褲 Look 就係由呢個時期開始。
▲ 快啲同 King Bob 行禮！
黃甘甘香蕉波波池
差唔多到最後一站，就係超黃嘅香蕉波波池！雖然開頭都擔心玩波波池會唔會好污髒，不過眼見計埋自己都係得幾個人，就放心跳落去啦！
▲ 咁大個波波池自己享用，平時真係好難做到！
▲ Minions 都爭住要玩波波池！
▲ 最後梗係要去埋 pop-up store ，將超過 500 件周邊產品帶返屋企啦！
神偷奶爸大視界
日期 ：2018年 12月 8日 至 2019年 3月 8日
地點：深圳歡樂海岸 ·OCT創展中心 ( 深圳市南山區白石路東8號 )
交通：深圳地鐵深圳灣公園站落車
票價：
平日成人 RMB 128
假日 RMB 158
小童RMB 88
家庭套票 RMB 328
2018 聖誕好去處
【聖誕好去處】葵芳超浪漫5大打卡位！24呎高水晶聖誕樹+霓虹燈玫瑰牆+粉紅Cafe
更多一日遊路線！
長洲 1.5 日單車美食懶人包！食盡 7大小食 ＋ 張保仔洞探險