荔枝角的飄雪聖誕！置身迷你冰屋 + 欣賞奇異光影表演

想過一個白色聖誕，就算去外遊都未必咁好彩，但自從有噴雪機呢樣發明之後，要睇雪就隨時都得！今日我依莉詩就去咗 D2 Place 天台，過一個飄雪晚上。規模細細哋，但都幾浪漫㗎！

城市中漫天飄雪

去過 D2 Place 天台嘅朋友都知地方唔大，但每次嘅佈置都落足心思。今年聖誕就用咗 4部噴雪機營造《The White Planet白雪天地》，係高樓大廈中打造另類氣候，就好似入咗水晶球一樣，特別夢幻！而且雪量好夠，夜晚配合埋特別燈光效果，影出嚟都幾逼真㗎！不過飄雪唔係日日都有，只係逢星期六、日及 2017 年 12 月 22 日至 2018 年 1 月 1 日 (連續 11 日無休) ，下午 3 時至晚上 9 時 (每節 25 分鐘) 先有，要去就 Mark 低時間啦！

▲ 漫天飄雪下，配合松樹同高樓大廈背景，影出嚟嘅相都幾特別㗎！

4間迷你冰屋配白色假草場景

除咗飄雪，天台仲鋪滿白色假草營造雪地效果，加埋 4間迷你冰屋，係一個好大發揮嘅影相場景呢！不過，亦因為屋仔太細，連小朋友都瓹唔入呢！要影到靚相的話，建議盡量用近鏡，避過人群之餘，唔好令環境睇落太空礦。

▲ 冰屋只有半個成人嘅高度，所以遠睇整個天台都幾空礦。

人流管制確保質素

D2 Place 天台地方唔大，為咗確保大家玩同打卡質素。今年就有人流管制，每節限 150人同時入場，每節25分鐘，咁就唔怕只係影到人啦！如果唔想等咁耐，只要係商場消費滿$300 就可以得到「雪國奇幻之旅護照」，有 2個名額優先自由選擇場次入場！

▲ 拎住「雪國奇幻之旅護照」仲可以去商場內有多個「Checkpoints」收集特色印章留念。

同場加映：《The Undiscovered World》光影表演

香港無得睇 TeamLab，不過都有個《光．影．香港夜》活動，而 D2 Place 二期地下 The Garage 就有其中一個表演 – 《The Undiscovered World》。透過 LED燈飾、投射及互動光影技術，將房間鋪滿奇形怪狀嘅發光植物、巨型生命樹同守護精靈等等，非常奇幻。睇完 5分鐘嘅表演，仲會有 5分鐘時間畀大家影相，影出嚟嘅相唔差得過 TeamLab 嘅藝術感㗎！

《The White Planet白雪天地》

日期：即日至2018年1月1日

時間：中午12時至晚上9時

地點：天台花園 @ D2 Place ONE (沿10樓樓梯直上)

《The Undiscovered World隱藏光影國度》

日期：即日至 2018 年 1 月 1 日 (逢星期二暫停開放,12 月 26 日除外)

時間：中午 12 時至晚上 9 時 (每節 10 分鐘)

地點：D2 Place 二期 The Garage (G/F)

聖誕展覽特集