【台北】依莉詩千里會部長!Kumamon 熊好來逗陣展 超多影相位

話說上上個月同媽媽去咗台北玩幾日,咁啱部長 Kumamon 又去咗喎。咁梗係要會一會佢啦!呢個展覽係松山文創區搞,係 6月吉卜力展同一個位,所以未入去就知好大。依家就同大家睇下有咩影相位啦!

Part 1:到觀光案內所認識熊本縣

唔使講都知熊本熊 Kumamon 係九州熊本縣嘅「營業部長」同「幸福部長」,所以展覽第一部份設計成「觀光案內所」,透過牆上圖文同小冊子介紹熊本縣文化背景同旅遊景點,等大家做好準備「出遊」。

▲ 展場入口已經見到熊本熊彎腰迎接大家呢!

 ▲ 入口右邊就係「觀光案內所」,就好似日本車站見到嘅咁,有地圖同小冊子派發,不同的就是有熊本熊坐穩,感覺即刻唔死板。

▲ 另一邊牆上由部長介紹熊本縣,原來熊本叫做火之國呢!

Part2:步入熊本縣同部長浸溫泉

第一部份係有少少悶,行前少少見到個露天風呂就開始到戲肉,係時候準備相機了!步入熊本縣知名嘅黑川溫泉,熊本熊教完我哋浸溫泉 5步曲,之後就可以同佢一齊浸啦!再穿過全世界最大破火山口「阿蘇」、松島橋、銀杏大道同下町通等等,同熊本熊影相同時,就好似快速遊了熊本縣一圈呢!

▲ 光脫脫嘅熊本熊 (本來就無衫著) 邀請我一齊浸溫泉啊!真係紅都面晒!

浸完溫泉一身鬆晒,部長就帶我參觀天門橋、中之橋同阿蘇火山等熊本知名景點逐個打卡。因為我星期一朝早去,無乜人參觀,想點影就點影呢!

▲ 去到神社仲可以拎空白繪馬寫上願望呢!旁邊嘅部長會為大家誠心祈求啊!

 

▲ 騎緊馬嘅部長好有型呢!

▲ 觀光完就係到商店街 Shopping 時間,新鮮水果同拉麵都係熊本縣好出名㗎呢!

▲ 部長呆呆地等待大家 Shopping 嘅樣超可愛呢!

▲ 齋影相當然滿足唔到大家,跟住嘅互動區就好玩多了!可以企係古裝看板同 Kumamon 係熊本城前影相,係咪有少少唔同呢!

▲ 仲可以即場用平板影相,進入投影內嘅熊本城添,著上武士裝嘅自己好搞笑呢!

▲ 嘩!~好大隻軟綿綿嘅 Kumamon 比我任攬任抱啊!

 

Part3:部長飛到台灣展開環島之旅

遊完熊本縣,部長決定去台灣吸收一下台灣文化,體驗鄉村生活。穿過車站,熊本熊化身成總舖師參加台灣傳統廟會,仲有幾個攤位遊戲俾大家玩添!一個展覽,一次過感受兩國文化真係唔錯呢!

▲ 車站成為咗日本同台灣兩個區嘅過渡,既有心思又唔生硬,設計者好有心思呢!

▲ 不過部長就等車等到打哈欠啦!

▲ 要環島遊當然要租架電單車風馳電掣啦,部長都急不及待出發了!

▲ 途中仲識到新朋友一齊飛車添!

▲ 去到廟會,第一樣就係入廟拜神!

▲ 旁邊有好多水果擺呢!

▲ 仲有音樂表演,非常熱鬧。

快啲嚟,買番個客家柿子啦!

▲ 另一邊熊本熊變身大廚,賣緊⋯⋯蒸籠?可能太好賣,蒸籠入面咩都冇。

▲ 廟會當然唔少得攤位遊戲啦!呢度就有多個無獎免費攤位俾大家挑戰啦!

▲ 射波波係夜市必玩呢!

▲ 用腳玩嘅彈珠台又見過未呢?超難玩的啊!

▲ 由台北去到墾丁,陽光與海灘,部長似乎非常享受呢個假期呢!

▲ 臨走前,記得去黑板留個言啊!

熊粉必賣熊本熊精品

睇完精品一定唔少得限定店,係香港商場展好少見到咁大咁齊嘅限家店呢!公仔、書包、蚊怕水咩種類都有,最重要係定價計埋匯率後,平過係香港買。熊粉要襯機會大掃特掃啦!

▲呢個迷你行李喼好得意啊!

▲ 紙巾盒係香港限定店未見過呢!

▲ 著住祭典衫嘅熊本熊好可愛呢!

▲ 我發現台灣好多展覽去到尾都會有整 Label 貼紙相機,平平哋整嚟留悠都唔錯!

▲ 十蚊雞有得影即影即有,比香港平好多呢!

▲ 明明個展開咗第二日就去,但到今日先得閒寫,要去就快啦!得番一個月咋!

Kumamon【熊好來逗陣展】
日期:2016年 12月 17日 至 2017年 3月 12日
地點:松山文創園區二號倉庫(台北市信義區光復南路133號)
門票:全票 NT280、學生票 NT250、愛心票 NT140、幼童票 NT180



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。