展開 Slash 人生後,發覺不是想像中自由

走出自己嘅 Comfort zone 不經不覺已經個幾月,好多人對我呢個豁出去嘅舉動都好疑惑,唔少人關心我現在到底做緊咩。其實一時間都好難解釋我嘅工作,一個網店管理員、一個網站編輯、一個撰稿員,還是一個 Blogger ?突然之間由一個小小記者,變成一個 Slash 族。

為工作燃燒生命,不如為自己努力

唔少人都覺得 Slash 族係「炒散」或者「廢青」,但當我踏上呢條路,再認識身邊不同朋友嘅時候先發覺,佢哋都好有自己嘅理想同人生目標,並唔甘於為一份工作,燃燒自己嘅生命。做 Slash 族某程度都係因為自己嘅理想未必足夠維持生計,所以要用更多嘅方法去實現自己嘅夢。就好似最近認識一個媒體平台Journesis 嘅創辦人,佢哋希望可以建立一個平台,等記者可以唔需要依賴媒體都可以自由發聲,而又可以令記者本身維持生計。理念雖然好遙遠,為咗呢個理念亦接了很多 Freelance 工作,但就敢於嘗試、奮鬥。

更自由還是更緊張

唔少人都覺得做 Freelance 會自由好多,可以賺到更收入同更方便控制時間。但最近先發覺其實係一種好深嘅生活哲學。工作狂嘅我,以前一份全職將我嘅生活一次過排滿,以為轉咗工更自由更多時間,但就係因為所有時間都係自己控制,反而一時之間填得太多工作,變得更夜瞓,食飯更唔定時,令整個人變得更緊張。看來要真正做到工作生活平衡,都係要先學懂放鬆。

好天收埋落雨柴,要搵錢又要慳錢

除咗時間控制,另一樣我深深感受到嘅就係儲錢同慳錢嘅重要。眼見多了時間接 Freelance 工作,有了額外收入,於是呢個月我日日同朋友出去食飯,好快就出現財困了,因為 Freelance 工作唔會即時收到錢。原來「好天收埋落雨柴」並唔係無道理,以前個個月都準時出糧,去記招有交通費,午餐帶飯,每個月支出有限,依家都要重新適應。每個工作都要計算付出嘅時間係咪合理,亦要計算所得嘅收入係咪覆蓋到額外開支,搵錢要搵得省時,洗錢亦要洗得更精明。

前途自決,先要不斷增值

當然對於好多講求收入穩定嘅人好難理解,認為搵個「鐵飯碗」,有錢先有夢。但如果去到最後,再無能力改變嘅時候,就只能向現實委協。既然遲早都要向社會低頭,點解唔襯後生,無家庭經濟負擔嘅時候,為自己豁出去。記得前老闆喺我臨走前同我講過,「你依家無嘢可以輸,去做自己想做嘅嘢」。無錯!唔試過又點知會唔會成功呢?

不過要追夢都要不斷增值自己,嚟緊一連四天的會展舉辦嘅教育及職業博覽就以「創新科技」(23/2)、「藝術」(24/2) 、「機電工程」同「創業」(26/2) 為主題。當中青協更配合彈性就業趨勢,推出多個創業及職業導向課程,例如咖啡店、花店、甜品店、琴行等。另外,4日共有近 100 場活動, 包括各類升學、海外工作假期等講座等,當中更包括陳志雲、Youtuber香格拉、仲有Ben Sir 歐陽偉豪。無論學生定求職人士,對前景依然迷茫嘅你,要去了解下啦!

 

教育及職業博覽 2017

日期:2017年 2月 23日 至 2月 26日

地點:香港會議展覽中心



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。