Oisa 魚籽滿到瀉!北海道直送魚生丼飯大滿足

新年啱啱過又係時候搵朋友食開年飯,今次就同幾個行家衝入呢間新開無耐嘅丼飯大鬧一番。好似話貪店員會一邊大叫打氣一邊幫你裝滿碗三文魚籽丼,夠晒氣氛,又好意頭咁話!果然望到碗滿到瀉嘅魚籽真係好興奮呢!

有 Gimmick 夠新鮮,但偏貴

呢幾個月完全吹起丼飯熱,基本上標上日本直送同鋪滿飯面就一定大賣。呢間位於太古嘅北海丼都唔例外,食材由札幌市中央卸売市場挑選後,即日運送抵港,保證新鮮。而最大嘅 Gimmick 就係師傅會係你面前一邊大叫 Osia!為丼飯注入力量,一邊放魚籽到飯面,營造滿到瀉嘅效果。無論視覺同氣氛都一流,全店嘅人都望住你,就好似成為生日會主角一樣咁受注目。不過呢度每碗丼飯索價二百多元都偏貴,至於份量就因應唔同丼用唔同碗裝,好似魚籽丼就用碗口較窄嘅碗營造滿瀉效果,而迷你丼就用較淺嘅細碗裝,以減少飯量,明顯係花心思設計過嘅。

 

▲ 三文魚籽丼 $228

Gimmick 嘅嘢有時可以去到好盡,成碗都係魚籽已經夠浮誇,仲要師傅係你面前邊大喊 Oisa!邊重手加上約 4 至 5 匙三文魚籽,全場望住你,少啲勇氣都唔得。至於味道方面就由阿仁提供,佢話粒粒魚籽都幾新鮮,咬開一刻鹹鮮爆汁,非常滿足。不過一口、二口⋯⋯之後好似愈食愈鹹,同個口寡寡地,亦開始好膩。望住佢個樣由好興奮食到唔願食,深深明白相機食先要幾大代價⋯⋯二百幾蚊剩係食魚籽同飯。

▲ 迷你北角丼 $268

而一向花心嘅我就好聰明咁揀咗食迷你北角丼,貪佢樣樣有啲,啱我呢啲又想試又細食嘅人。三碗飯都好迷你,好似兒童餐。一碗放咗海膽同帆立貝,海膽鮮甜軟滑、帆立貝厚肉有質感,另一碗有三文魚同魚籽,而最後一碗有蝦同蟹鉗、蟹肉,蟹鉗有海水味唔乾,值得一提的是,每碗飯都配有中華沙律、沙甸魚乾、冰頭漬等作點綴令口感同味道都帶到令一層次。

▲ 特上魚生丼  $218

特上魚生丼由三文魚、赤身、油甘、魷魚、炙過的鯖魚、熟蝦、蟹鉗同燒玉子砌成,色彩繽紛,而且加上芝麻及紫菜碎吊味,味道層次豐富。

▲ 北海蟹丼 $188

另一個朋友就揀咗北海蟹丼,其實就好似迷你丼其中一碗咁,不過就係大版。

▲ 北海道三文魚親子丼 $168

如果鍾意食三文魚籽的話,其實揀呢個北海道三文魚親子丼已經好足夠,魚籽份量適中唔膩,仲有兩片肥美三文魚。唔係為拍片,性價比一定比魚籽丼高。

▲ 蕨餅伴糖漬栗子 $48

咪睇我食咗三碗飯,完美嘅一餐當然要有甜品。呢個蕨餅伴糖漬栗子係今次三個甜品中,覺得最好食,沾滿抹茶粉同黃豆粉嘅蕨餅煙韌有口感,配合爽口栗子同甜蜜蜜嘅紅豆,非常豐富。

▲ 抹茶寒天伴雪糕 $42

而抹茶寒天伴雪糕就比較普通,抹茶寒天亦比較淡味,不過不失。

▲ 北海道牛乳芝士蛋糕 $48

北海道牛乳芝士蛋糕有啲似木糠布甸,食落粉粉的帶少少軟滑。略嫌奶味較重,蓋過了芝士味。

北海丼

地址:太古城中心 3樓 313號舖

電話 :2577 0828



About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。