講到美食，香港係一個天堂，咩新潮，咩國家嘅美食都有。最近我 依莉詩 就打算做啲長少少嘅特輯，一於食盡港九新界十八區。介紹嘅第一個區當然係自己最熟悉嘅屯門啦！相信屯門人都知道紅橋係最多小店美食集中地，由松記、豬大王到雲貴風，都係三五知己晚飯宵夜聚腳地。上年開始呢區先後更有三間日式長龍店陸續進駐，真係日日龍尾都無消失過！今次就等我介紹紅橋其中 4間比較有特色嘅店比大家參考下啦！
屯門潮食集中地
因為輕鐵站都算密，所以好多地方都會以附近輕鐵站稱呼某啲地方，不過「紅橋」就比較特別，介乎景峰同豐澤輕鐵站中間，兩邊落車都要行 10分鐘先到。大家反而用附近一條紅、白兩色嘅天橋稱呼，所以「紅橋」係真有其「橋」㗎！
因為同 Vcity、卓爾廣場等商場隔咗條屯門河，並無新市鎮嘅繁華，紅橋附近都係一啲比較矮嘅建築同舊式商場，租平，所以聚集咗唔少小本經營的店舖。當然少不了潮流美食啦！
1) 排長龍章魚燒，多明太子走紅薑
講到呢間屯の大阪章魚燒由開鋪頭一個月已經變成人氣店。經過各大傳媒追捧佢又大粒又多料之後就日日排長龍。由初初排一個鐘都依家開咗成年都要排半個鐘先有得食。
店內主要賣 4款章魚燒，原味、蟹子、明太子同多蔥。上面滿滿嘅料的確幾吸引，而最特別係章魚燒入面無紅薑，對我呢啲唔鍾意紅薑陣味嘅人就好啱。不過，開業初期的確係幾大粒，只係後價格調整，又將章魚燒整細粒咗，所以性價比唔算高啦！
▲ 明太子章魚燒 $28/6粒
至於味道，章魚燒外皮唔太脆，內裏都算多醬，夠飽滿。沙律醬同明太子都幾多，係屯門係難得既水準。但至於值唔值得排咁長龍食佢呢？其實市區有更多更平更好食嘅選擇，我就比較鍾意食旺角間日船，或者葵涌廣場間真。章魚無雙。
▲談到呢間店之前比人批評手腳慢，無禮貌，其實我係絕對同意！最好笑係店主 Chris 仲要喺香港01 訪問回應話啲客人「
屯の大阪章魚燒
地址：屯門青菱徑9號華利大廈商場地下11號舖
2) 小店日式人情味，沾麵湯底濃郁
近年興食沾麵，不過屯門有得食沾麵的地方唔多，赤橋拉麵算係屯門區內數一數二地出色。赤姐係紅，間嘢係紅橋，所以叫赤橋拉麵，呢個店名改得好有趣。鋪頭雖然唔係好大，得幾張二或四人枱，坐得有啲逼，不過裝修好有日本風格，凳由汽水箱砌成，好搞鬼。至於麵食由日本師傅主理，有別於元朗姊妹店「彩」，赤橋拉麵除左有沾麵仲有湯拉麵四款湯底分別係：魚介豚骨、黑油豚骨、海老豚骨、辛肉味噌，味濃有層次，值得一去再去。
▲ 魚介沾麵 $78
魚介湯底由魚介麵豉、鰹魚、小魚乾熬製，濃稠度較湯麵底高，重點係加咗柚子皮，多了一份清新感。而麵條由粗粒小麥製成，彈牙幼滑，配合湯底食真的不錯。不過就唔係其他沾麵店，食完麵唔會有熱石同加水，等你當湯飲。
▲ 天氣熱，怕客人等得耐，出面放咗好多把扇畀客人用，仲要畫左公仔，好有心思。
▲可能驚你唔知點食，每張枱都有張手繪說明，上面隻貓貓畫得好得意啊！
▲店內雖然好細，大家都係快食快走，不過中間有個櫃仔擺漫畫，唔知係咪有人會拎嚟睇呢？最搞笑係啲凳，由汽水箱砌成，肥啲都坐唔到。
赤橋拉麵
地址：屯門青菱徑9號華利大廈地下5號舖
營業時間：12nn-3:30pm；6pm-10pm
3) 創意特色菜，小食到甜品都有趣
相比之前兩間人氣店，飯糖比較少人報導。味道方面未必人人啱口味，亦無特別到一定要衝去打卡嘅外表，不過佢嘅menu就唔係度度食到，由小食，主菜到甜品都突顯出廚房對創意嘅追求。係要夾，而唔係亂咁搭！
▲ 忌廉磨菇原隻香草雞脾焗飯 $68
雞脾飯食得多，但兩隻大雞鎚放係焗飯上就第一次見。雞脾熱辣辣，外皮脆卜卜，肉嫩入味，而忌廉汁唔多唔少，唔膩啱啱好。
▲ 忌廉紅菜頭慢煮豬柳意大利飯 $88
紅卜卜嘅飯真係好奇怪，原來係紅菜頭，非常有營養，不過陣味就唔係人人接受到。而塊豬柳就好高質，外脆內軟，好多肉汁，好好味呢！
▲ 香吻 $12 (跟餐)
跟排興蝶豆花飲品，要樣靚好簡單，但要整到好飲就無幾多間。呢杯香吻加咗特質嘅蘋果糖，清香不帶死甜，甜度適中，睇得又飲得。
▲ 紫色樂園 $12 (跟餐)
不過呢杯紫薯鮮奶就有啲失望，因為完全無打過奶泡，就係水狀嘅一樣紫色鮮奶。唯一讚嘅係，飲得出佢真係用鮮奶沖嘅。
▲ 間野雖然細細地，但環境都幾清新，坐得算舒服，同朋友坐下hea下都唔錯。
W飯糖 W Kitchen
地址 : 屯門青翠徑9號多寶大廈地下33號舖
營業時間：12nn – 11pm
4) 梳乎班戟夠深度，比市區店更好食
自從係 K11食過一次梳乎班戟之後我就愛上咗嗰種軟棉棉嘅空氣感，亦四圍搵更好食嘅梳乎班戟。而呢間班戟館就做得好有水準，甚至比荔枝角千呎cafe或者旺角黑布街一帶做得更出色，係難得用心嘅高質西式甜品店。
不過因為即叫即製，由點餐到有食物就要 30-40分鐘，而店內環境好逼，只有四張枱。如果店內坐滿，就可能要等個幾兩個鐘先有得食。
▲ 熱戀 $75
梳乎班戟要鬆軟有空氣感係基本，最難得係佢好有蛋味，加上上面有半個浸過糖水嘅梨同焦糖雪糕，好夾。對男仔嚟講，最緊張係比呢個價錢，似係有嘢食落肚嘛！你知啦，梳乎班戟好似食空氣㗎嘛！
▲ 京都丹波黑豆紫薯窩夫 $65
起初對佢無乜期望，但呢個窩夫出奇地好食，紫薯有紫薯味，窩夫又有蛋味，配埋雪糕就唔會乾。
圖片來源：Facebook@班戟館
▲本來我係想食呢個「巨人班戟」，可惜逢星期五限定，我呢度早出晚歸嘅打工仔又點有機會食丫！
▲ 想食好嘢真係要耐心地等，店內就係得一個員工一腳踢。就算食飽想走都埋唔到單呢！出面仲要有好多人排緊隊，哈哈哈…
班戟館 Crepe N Cream
地址：井財街9號錦發大廈地下20B號鋪
營業時間：星期二-星期日:20:00-01:00
區外人是否需要潮聖？
今次介紹的有 3間都係長龍店，住屯門嘅放假想懶下，唔出市區，又想食啲高質少少，性價比高嘅潮食，去紅橋食就好正常。但區外人又係咪值得搭成個鐘車入嚟再排一個鐘食一間呢？其實有啲難講，唔似元朗咁多選擇，屯門小店部份店紅嘅原因可以只係「屯門區最好食」，但其實如果開係市區只係一般質素。
仲有，要提提大家，食還食，市區嘅朋友記得預番時間搭車返屋企呀！無論西鐵定巴士，出市區嘅尾班車 11點幾就開出，要睇住時間啊！雖然可以搭通宵車，不過紅 van 去到旺角，N260 去到美孚，要再去遠啲就自求多福了！
各區美食精選！
地膽帶路！土瓜灣街頭小食 – 足料花膠魚肚粥 + 濃香米香腸粉
地膽推介！$150 掃盡 5大紅磡街頭小食 – 混醬班戟麵條 + 超大粒手製芋圓
死場不再！10間平民食肆進駐荃灣新 Food Court – 嫩滑手撕雞腸粉 x 醒胃麻辣串
粉色系呃 like 甜品團！食盡荃灣 3大潮食店 – 玫瑰士多啤梨窩夫 X 山形縣白桃厚班戟
大坑 2大呃 Like 甜品！ 粉色棉花糖燒 x 彩虹沖繩鹽刨冰
5萬呎水產市場登陸黃埔！九號水產 4大食店率先睇 – 蟹痴必掃北海道皇帝蟹
旺角 1日 4餐，由朝食到晚！青檸烏冬係劣食？韓系日式吉列牛一定正？
銅鑼灣 SOGO 地庫重開！5大人氣日本過江龍進駐 必食香脆海鮮煎餅 + 鹿兒島彈牙魚餅
睇更多拍拖好去處！
FB： 依莉“詩”生活
IG： ErieDiary
網址：ErieDiary.hk
YouTube：Diary Erie