旺角 1日 4餐，由朝食到晚！青檸烏冬係劣食？韓系日式吉列牛一定正？

介紹完屯門同元朗有咩好食，今次嚟到無論你同我都一定去過嘅旺角！呢個龍蛇混雜嘅地方，就連食肆都一樣種類繁多。無論潮食、美食定劣食都多不勝數。女人街嘅平價港式日本菜、黑白布街嘅新式甜品鋪、登打士街嘅樓上 Cafe 或是兆萬嘅劣質放題，要我介紹相信只係班門弄斧，所以我依莉詩只想同大家分享一下今次係旺角一日之內食咗啲乜。當中有值得一去再去，亦有可一不可再嘅餐廳啊！

1) 夏日開胃之選 – 激酸青檸烏冬

旺角咩價位嘅日本菜都有，拉麵、刺身、丼飯、放題樣樣齊，今次 Lunch 就去咗間既唔係人氣食店，又唔係特別平嘅東京築地拉麵。唔單止個名普通，就連位置都好穩秘，雖然係雅蘭中心，不過要係山東街落地庫先搵到，可以話平時行過咗都唔覺。不過入到去其實別有洞天，舖內裝修好有居酒屋嘅感覺，出菜位置做成涼亭，牆上仲掛滿日式街道畫，好似去咗日本食拉麵咁。至於 menu ，店名有拉麵兩個字，主要梗係食拉麵，不過俾我見到樣幾得意嘅嘢，就係青檸冷稻亨烏冬，咁有趣點都要試下吧！

▲青檸冷稻亨烏冬 $38

雖然無 Menu 幅相咁誇張，成碗鋪滿青檸，不過都有 7-8 片青檸係面，真係睇到都酸。當然想嘅主要都係烏冬，因為有冰同青檸配合超扁身嘅烏冬入口冰凍帶酸，非常清新開胃，加上木魚花少少口感，好啱夏天食。不過份量就唔多夠，建議同時點啲小食就無咁齋。

▲ 月見豚丼 $43

月見豚丼聽個名好似好靚，其實「月見」日文就係賞月，用係食材上面，好多時就係一隻生蛋或半生熟蛋放係飯面。呢個飯就係幾塊炭燒豬肉上面加隻生蛋。味道不錯，豬肉都幾厚塊，加上生蛋就更滑，份量方面偏少，女仔食就啱啱好。

東京築地拉麵 Tokyo Tsukiji

地址：旺角彌敦道 639 號雅蘭中心地庫 B102號舖

營業時間：星期一至日 11:30-23:00

2) 街頭小食回歸基本步 – 彈牙魚蛋

甚麼雕魚燒雪糕、爆炸糖奶昔、豆腐雪糕係廣華醫院對面食街都紅極一時，不過街頭小食都係原始嘅好！以前豆花妹鋪位上年轉咗手，開咗間「彈彈旦」專賣魚蛋。特色就係用初榨椰子油炸即炸魚蛋加多種醬料，令香港街頭小食提升到另一層次。

之所以用初榨椰子油而非千年油係因為老闆選用咗媽媽嘅緬甸配方，不但比普通健康，而且特別香，唔會有一層油係表面，炸得乾爽，彈牙。

▲ 白魚蛋 $20/12粒

雖然比平時篤魚蛋貴，最平白魚蛋 $20/12粒，不過魚蛋香口Q彈，加上車打芝士醬+芝士粉，味道超濃！平時好少番啅嘅我，三日就食咗兩次啦！

▲ 大彈旦＄25/4粒

炸魚蛋用上日本天婦羅炸粉漿，即叫即炸，非常有誠意。每粒都外脆內軟，夠晒彈牙，加上避風塘、紫菜、芝士味粉，令魚蛋更惹味。

彈彈旦

地址：旺角廣華街1號仁安大廈地下14D號舖

營業時間：星期一至日 11:00-23:00

3) 性價比高 – 平民梳乎班戟

一向鍾意食梳乎班戟嘅我，又點會唔試呢間全港最平嘅 $29梳乎厘班戟。雖然 I Love You Dessert Bar ，只有4個位可以堂食，不過定價就比市面平一半有多。但唔好以為價錢平就質素差，大廚原來大有來頭，不但係米芝蓮餐廳學過師，仲得到過多個國際甜品大賽獎項。而班戟亦無將貨就價，用上日本蛋，每份都即叫即整，食落一樣梳乎！