依莉詩 in ETV精選胃食四處尋

元朗 4大人氣食店！必食北海道布丁燒 X 啖啖肉無骨雞翼包

上次講過屯門有乜好嘢食，相隔一個月，我依莉詩決定走入出名多美食嘅元朗，繼續食盡港九新界十八區！點解第二站要揀元朗區？因為對於中學時期嘅我已經留低唔少腳毛。B仔涼粉、甜心鮮果園炒冰、泛后甜品更加係宵夜直落必到嘅吹水地。今次就等我介紹下其中 4間比較有新嘅特色店比大家參考下啦！

元朗多條食街，食物種類多

元朗美食多就係人都知，除咗連鎖店外，亦係各地美食同地道美食嘅集中地。因為當中唔少都係小本經營的店舖，所以種類特別多，重覆率低。想飽肚嘅有豬扒飯、車仔麵、丼飯、沾麵⋯⋯想食小食又有烤菇、燒賣、串燒⋯⋯甜品又有奶凍、炒冰、朱古力酥。

由元朗大馬路兩旁到西鐵綫元朗站一帶就有多條食街。當中以又新街美食最出名，B仔涼粉、新順興潮州滷味都係唔少人摯愛。而大坑渠旁嘅肥姐蠔餅、小糖鈕甜品都吸引唔少人專程嚟食。雞地一帶更加聚集不少新興潮食。

1) 布丁、芝士蛋糕二合一，同時滿足兩個願望

講番今次最想介紹嘅新品先！呢間日式甜品店「小確幸」，四月開業以嚟日日排長龍，當中每日限量 250個嘅「布丁燒」更係香港第一次出現嘅北海道札幌名物，係兩位港人店主特意到台灣跟日本餅師學做嘅！

布丁燒結合咗芝士蛋糕同雞蛋布丁，加上焦糖漿，三層各有層次，互相補足。而蛋糕表面更烙印上日本象徵幸福嘅貓頭鷹圖案。除咗原味四葉芝士布丁燒，仲有若竹抹茶布丁燒同法國 Valrhona 朱古力布丁燒，店主對每一款布丁燒用料都好講究，所用嘅芝士都係唔同牌子同濃淡配合各種味道，而雞蛋亦係歐洲蛋。我哋當日，店主就因為唔夠歐洲蛋，寧願減產都不願轉用其他，可見佢哋對食材嘅執著。

▲ 四葉芝士布丁燒 $38

原味布丁燒上層係用歐洲蛋做嘅雞蛋布丁造成，蛋味濃郁，軟滑震騰騰，而下層芝士蛋糕用上四葉芝士及3.6 北海道牛奶，有淡淡芝士味，雖然無 New York cheesecake 咁濃味，不過能夠平衡蛋味，再搭配輕甜不膩嘅焦糖漿。

▲ 布丁燒兩層分明，倒轉後焦糖散怖整個布丁燒，每一啖就好似簡單的幸福，非常配合店名 – 「小確幸」。

▲ 牆上黑板畫了布丁燒嘅食法，要先將布丁燒輕搖，等焦糖滲入布丁，再倒轉放係碟上，咁就可以倒出平平滑滑嘅布丁了！

▲ 由布丁燒由店主全人手製作，要將密度不同嘅焦糖液、布丁同芝士蛋糕漿同時蒸焗，放涼後再印上貓頭鷹圖案，最後先放入雪櫃雪凍，每個都要用上 1日時間製成，所以每日都係限量發售呢！

▲ 布丁燒每日限量 250個，每日 12點同 6點各出 125個，要食到就要好早去排隊。我 5點 5 個字去排都已經排第 14個。每人限買 4個，差少少就買唔到啦！如果賣唔到都可以試另外 5款樽裝布丁，有牛奶、芒果、綠茶、紫薯及榴槤口味，每款$28。

▲ 店內有 6個位可以即場食，裝修好休閒，不過比較窄，大部份人都會外賣。布丁燒食落的確有陣陣幸福感，但唔知會唔會成為下一個芝士撻同半熟蛋糕，愈嚟愈多模仿令布丁燒慢慢變質呢？

小確幸

地址：元朗馬田路50號朗景臺地下12號舖
營業時間：12:00nn – 9:00pm

2) 為懶人而設無骨雞翼，即叫即食夠香脆

另一間最近成為人氣店嘅係「好包」，主打無骨雞翼包一推出就已經好出名，啱晒愛食雞翼，但又懶嘅人。一個包有三隻人手拆骨雞翼，啖啖肉，4款口味有甜有鹹，包括：香蒜椒鹽（$35）、蜂蜜（$35）、香草醬（$38）及青咖喱（$38），都係即叫即做，確保每個都熱辣辣、脆卜卜。另外，亦有秘製慢煮豬腩肉包（$42），豬腩肉經過 8小時慢煮，配合青蘋果薄片，絕對係心機小食！

▲ 蜂蜜無骨雞翼包 $35

雞翼包用上自家製意大利包，塗滿牛油後烘得非常香脆，滲入雞油就更香口，而雞翼塗上蜂蜜，甜味突出，不過可能比較脆口，反而食唔到雞皮嘅脆口。

好包 Couple & The Bao
地址：元朗西菁街 2 號興旺樓地下 1C 號舖
營業時間：星期二至日 12:30pm-8:30pm（星期一休息）

3) 不一樣的炒滑蛋，內餡燒汁鰻魚有層次

炒蛋係人都識煮，但要炒到好似澳牛嘅咁滑就唔係間間得，而呢間「龍鳳店」唔單止有靚炒蛋，仲要夾埋麵包同燒汁鰻魚，化成鰻魚蛋治。山泥傾瀉塌咁款嘅蛋治即叫即整，熱辣辣，賣相非常吸引！唔少人都會佢專程嚟到，一食再食！果然美食不一定要花款，最簡單嘅材料，只要做得好食，一樣有市場。

▲ 龍鳳鰻魚蛋治 $35/ 份（半份 $25）

堆到高一高嘅炒蛋，炒至6、7 成熟，係碟盪盪下，非常嫩滑，中間夾住白麵包同肥美鰻魚，鰻魚嘅燒汁配合蛋香，相當有層次，一啖一啖食唔停。

▲ 燒過嘅鰻魚夾埋滑蛋一齊食，鹹甜味調和，口感飽滿，我一個都可以食晒成份！

▲ 腸粉 $7

因為蛋治係即叫即整，都要等幾耐下，有人好飽餓，等唔切，竟然叫咗碟腸粉食住先。$7腸粉都幾大碟，無話特別好食，同平時嘅膠粉差唔多。

▲大部份人都是渣車嚟或者街坊買外賣，而店鋪位唔多，得店內 4個位同店外兩個位。

龍鳳店

地址：元朗水車館街 66 號錦榮大廈地下 3B 號舖
營業時間：11am – 8pm

4) 由蟹鉗食到蟹籽，海鮮丼賣相精緻

早排好 hit 食丼飯，間間都話係築地開嚟香港。雖然呢間「丼家」名氣無咁大，不過就幾足料同抵食。丼飯仲砌得好靚，好似分兩層嘅「究極丼」，有齊三文魚、吞拿魚、油甘魚、劍魚腩、帶子、甜蝦、八爪魚、三文魚籽、蟹籽、蟹柳同甜蛋……都只係 $198，而且加 $18 可以轉定食，有前菜小食、麵豉湯和沙律，沙律仲要有少量魚生，四彩繽紛，打卡一流。

▲ 蟹皇丼 $88

「究極丼」我就食唔晒，更吸引我嘅係「蟹皇丼」，一個飯有齊蟹鉗、蟹腳、蟹肉同蟹膏，仲有仿蟹棒！
燒蟹鉗、蟹腳雖然燒得乾身咗少少，不過肉質都幾彈牙，有海水味。而蟹肉鮮甜，有咬口。最驚喜係底層幾乎啖啖蟹膏撈飯，味道非常濃郁，飯都食多幾啖，絕對係蟹癡必食！

▲ 特選壽司盛配稻庭鳥冬 $78

呢個 set 有 8件壽司咁多，雖然用料唔算特別，不過八爪魚同北寄貝都掃上柚木汁，而甜蝦上有少少黑松露，平凡中帶點不平凡。至於海膽壽司估計用了韓國海膽，雖然睇落未係最新鮮，不過都非常鮮甜。雖然跟餐嘅味噌湯、烏冬、中華沙律同反卷幾乎可以完全忽略，不過呢個價剩係食呢幾件壽司都唔算貴了！

丼家
地址：元朗鳳攸北街2-6號永富閣地下14B號舖
營業時間：11:30am-3:30pm、6pm-11pm