10間散水餅/下午茶甜點/訂製蛋糕推介｜多間 IG人氣餅店匯聚元朗 YOHO mall/尖沙咀美麗華一次過再晒返屋企！

要買散水餅或者嫁女餅，唔想送連鎖店嘅西餅咁普通？但 IG shop 嘅甜品品質參差不差，訂完先發覺中伏，同事可能會笑你無眼光！最近發現元朗 YOHO 同尖沙咀美麗華有間實體店，集合咗接近 20間人氣嘅持牌甜品網店嘅手工蛋糕，咁大家就唔使提前多日預訂、特登去工廠區取貨，或者等團購，試咗好唔好食先大量訂啦！

IG 人氣餅店 1) 悅晨製菓

朱古力唔一定係冬天嘅專利，夏天食一件薄荷朱古力嘅甜品絕對有滿滿嘅幸福感！悅晨製菓嘅薄荷朱古力系列甜點就超級受歡迎，當中嘅薄荷朱古力鏡面蛋糕裡面藏有濃郁嘅薄荷燉蛋，滑得嚟冰涼大爆發，迷你版用嘅做散水餅，大版用嚟慶祝生日都唔錯㗎！

傳送門：https://www.instagram.com/soleiletlune_hk/

▲ 呢款薄荷朱古力棉花糖唔會太甜，反而涼透嘅薄荷味加上棉花糖食落又軟又輕，唔覺就會食多幾粒！

IG 人氣餅店 2) Napoh 拿破崙專賣店

雖然 Napoh 出名滿滿吉士嘅拿破崙蛋糕，不過作為散水餅，呢款法式焦糖醬燉蛋獨立包裝，派畀同事就更方便！燉蛋用少甜配方，嫩滑輕甜，而且無落生蛋，食落就更安心。另外仲有伯爵茶同 Tiramisu 可以揀，總有一款啱同事口味！

傳送門：https://www.instagram.com/na.poh/

▲ 焦糖醬燉蛋嘅質感比較濃厚，連埋底部嘅焦糖食另有一番風味！

IG 人氣餅店 3) 20table

20table 嘅蛋糕走簡約風，當中 MINI STRAWBERRY CHEESE CREAM CAKE 由兩層原味戚風蛋糕，夾住芝士忌廉同新鮮士多啤梨，外面鋪滿原味忌廉，加上一粒紅卜卜嘅士多啤梨，迷你蛋糕細細哋好可愛，人少少一兩個人食就啱晒！另外，仲有黑芝麻忌廉豆乳布甸蛋糕，濃濃嘅黑芝麻味配上滑溜溜嘅自家豆乳布甸，食落好輕，無負擔！

傳送門：https://www.instagram.com/20_table/

▲呢款 mini 士多啤梨芝士忌廉蛋糕細細哋，走日系簡約風，真係好可愛呢！

IG 人氣餅店 4) Romanova Bakery

蜂蜜同蛋糕嘅配搭大家都食過，唔知你又食過呢款俄羅斯嘅蜂蜜千層蛋糕未呢？Romanova Bakery 主打多款俄羅斯蛋糕，當中 Square honey cake 嘅製作步驟比較煩複，需要逐層烘烤，所以香港比較少見，同事生日不妨買嚟試下吖！

傳送門：https://www.instagram.com/romanovabakery/

▲ 唔好睇佢個樣好似好乾好厚實咁，但其實食落蛋糕又軟又濕潤，仲有淡淡嘅蜂蜜同酒香𠻹！

IG 人氣餅店 5) Tiffany’s Community Bakery

Tiffany’s Community Bakery 有千層蛋糕、戚風三文治、soft cookies 比大家揀，而且每款都有唔同口味。千層蛋糕就有鐵觀音、小山園抹茶、朱古力同紫薯；戚風三文治就有玄米茶柚子同抹茶草莓麻薯口味；而 Soft Cookies 仲有近期好 hit 嘅麻薯做餡，鬆軟嘅抹茶或焙茶曲奇中有著 Q彈口質，食落好飽滿幸福！

傳送門：https://www.instagram.com/tiffanyscommunitybakery/

▲ 黑芝麻千層蛋糕中間黑芝麻奶凍同黑芝麻醬層層疊加，食到沙沙地嘅口感之餘，仲有好勁濃黑芝麻香味，芝麻控值得一試！

IG 人氣餅店 6) 𝐌𝐫 𝐖𝐡𝐢𝐭𝐞 𝐁𝐚𝐤𝐞𝐫𝐲

𝐌𝐫 𝐖𝐡𝐢𝐭𝐞 𝐁𝐚𝐤𝐞𝐫𝐲 嘅蛋糕好有酒店水準，每日新鮮製造，每款嘅配搭都好特別，而且有唔同層次，仲有唔同大小同口味揀，迷你 size 真係好啱做散水餅！當中熱情芒果朱古力鏡面慕絲由70%嘅巧克力慕絲同芒果熱情果蓉嘅配搭，酸味同甜味互相中和，口感同層次都格外豐富；西西里檸檬杏仁撻將檸檬嘅清新同杏仁嘅香郁結合，清新滋味，軀散心中一切嘅鬱悶；酥皮草莓忌廉泡芙外層擠上豐厚的雲尼拿籽意大利軟芝士忌廉，再加上可愛嘅鮮草莓果漿作點綴，睇得又食得！

傳送門：https://www.instagram.com/mrwhitebakery/

▲ 4款迷你甜點入面甜酸各異，總有一款啱同事口味！

IG 人氣餅店 7) 焙你快樂

卷蛋很似平凡，但好食嘅卷蛋可以令人有快樂嘅感覺！焙你快樂賣嘅係新興嘅日式卷蛋，蛋糕部份比較濕潤輕巧，而中間滿滿嘅忌廉很似簡單，但用料講究其中焙茶奶蓋味用嘅係山政小山園焙茶；抹茶味就同丸久小山園抹茶；另外，仲有70% Valrhona可可香蕉、Twinings伯爵茶等，味道相當濃郁。

▲ 焙茶卷蛋中間唔止有濃濃嘅山政小山園焙茶味，上面仲有厚身嘅芝士奶蓋，食落有滿滿幸福感！

▲ 除咗日式卷蛋，焙你快樂仲有近年好受歡迎嘅巴斯克蛋糕，面頭燒焦嘅香氣配上內裡半熟嘅流心芝士，質感好濃厚細滑！

傳送門：https://www.instagram.com/bakeyouhappier/

IG 人氣餅店 8) Smachno Patisserie

Smachno 係烏克蘭文「美味」嘅意思，呢間蛋糕店主打唔同口味嘅件裝 honey cake 同迷你個裝蛋糕，無論係分畀同事食定一班人開 patty 切蛋糕都有得揀。口味有雜莓、薄荷朱古力、開心果、咖啡等，每款都有好多層，睇落有啲似千層蛋糕，不過食落就比較濕潤，口感差別不大，唔會好清楚分到每層嘅味道。

傳送門：https://www.instagram.com/smachno_patisserie_hk/

▲ Smachno 招牌係 Mixed berries honey cake，雜莓帶微酸，唔會太甜，非常開胃！

IG 人氣餅店 9) 法國小屋

法國小屋同其他介紹嘅網店唔同，件裝蛋糕比較少，主打嘅係預訂滿月蛋糕、結婚蛋糕、生日蛋糕。蛋糕底係鬆軟嘅海綿蛋糕同鮮忌廉，有14款夾心選擇，無落牛油同防腐劑，加埋上面用朱古力畫嘅卡通公仔牌，好有懷舊餅店感覺！佢哋 IG 有好多成品可以參考，懷舊嘅叮噹、美少女戰士，到近期人氣嘅鬼滅同 LinaBell 都有，畫得都幾似㗎！最快今日落單，第二日取不加收任何費用！

傳送門：https://www.instagram.com/le.cafe.des.delices/

▲ 切餅方面就有唔同口味嘅巴斯克蛋糕，當中小山園抹茶 Tiramisu 巴斯克食落好大細滑，又有濃濃嘅抹茶味，加埋少少咖啡味，唔會太苦，有少少回甘，好似飲咗杯好濃嘅 green tea latte 咁！

IG 人氣餅店 10) The Little Pieces

The Little Pieces 嘅錶花蛋糕真係好靚，想買結婚蛋糕或者母親節蛋糕都可以考慮吓！佢仲有錶花杯子蛋糕同寵物蛋糕賣，開 wedding parrty 就啱晒，人同狗狗都照顧周到！

傳送門：https://www.instagram.com/thelittlepieces_hk/

▲ 大甲芋泥麻糬蛋糕用咗台灣直送嘅大甲芋頭、煙韌嘅鮮奶麻糬同烤雞蛋布丁製成，再用上小蝴蝶裝飾，仙氣十足，好打卡able！

▲ 杯子蛋糕嘅唧花都係人手一筆一筆地勾劃出嚟，每個都唔同，低糖配方嘅清蛋糕食落滿滿幸福滋味！

一次過試齊 20間人氣 IG Shop 手工甜品

CO:NFECT係一個新式甜品零售店，好似甜品網店嘅「格仔鋪」咁，寄賣咗 20幾間人氣 IG shop 嘅蛋糕卷、杯子蛋糕、窩夫、曲奇、布甸、花果茶、件裝同原個蛋糕，種類超多！因為進駐嘅 IG shop 都經過創辦人 Vika 篩選，每間店都有相當嘅人氣同品質保證，而且甜品類型都好少重複，絕對係甜品控嘅天堂！當然，店內唔止有現貨，亦有可以網上訂購，再取貨。試過先一次過訂散水餅，咁就一定唔怕中伏啦！