白色情人節限定!歎住海景食拉麵 X 白朱古力忌廉包

女朋友想今個白色情人節食日本嘢,又要睇到海景!?唔一定要捱貴餐廳,或者食譚仔嘅~今次我 依莉詩 帶大家食真正嘅日本過江龍!一般拉麵店嘅價錢,就可以邊享受維港夜景,邊食蝦湯拉麵談心,最後再叫埋限定白朱古力忌廉包,咁就夠晒完美!

無敵維港夜景

尖沙咀嘅日本過江龍拉麵有好多間,一蘭、一燈、一風堂、風月堂,就咁數到數到唔少,但點解白色情人節要揀呢間呢?梗係為咗個海景啦!一幻拉麵嘅海港城分店有一排位對正尖沙咀碼頭,出面係大大個維港景。每晚 8點仲可以坐定定睇埋「幻彩詠香江」𠻹!雖然話個燈光 show 無咩特別,但一般拉麵店嘅價錢,有呢個 item,又滿足到女朋友對浪漫嘅要求,掂啦!

▲ 一幻嘅位都幾多,除咗海景位同普通Bar 枱,仲有二人一室嘅卡位,兩個人可以靜靜傾計。

濃郁醬油蝦湯拉麵

唔做多講,「一幻拉麵」香稠濃郁嘅甜蝦湯係札幌名物,去過日本旅行都應該見過佢嘅外賣裝。而我今次就揀咗濃厚豚骨醬油蝦湯粗麵,湯底好濃郁,麵都幾彈牙,最特別係上面嘅紅薑天婦羅,連唔食紅薑嘅我都覺得唔錯呢!

▲ 同一般日本拉麵店一樣,湯同配料都可以自己揀。記得要埋紅薑天婦羅呀!脆脆哋真係好特別㗎!

▲ 濃郁醬油蝦湯拉麵 $88 (唔包個忌廉包㗎!)

期間限定 – 白色情人忌廉包

既然慶祝白色情人節,又點可以無甜品?今次一幻就同廣島人氣甜品店「八天堂」合作,推出咗期間限定嘅「白色情人奶油包」。軟熟嘅日本麵包包住香滑濃郁嘅北海道白朱古力奶油。啖落去,滿滿嘅白朱古力奶油喺口爆發出嚟,勁滿足!

 

▲ 白色情人奶油包 $22 (供應期由 2019 年 3 月 1 日至 31 日)

▲ 滿滿嘅白朱古力奶油喺口爆發出嚟,勁滿足呢!

一幻拉麵
地址 : 九龍尖沙咀海港城海運大廈地下 OTG59 號舖
營業時間 : 每日早上 11 時 30 分至晚上 11 時

 

各區美食精選!
佐敦美食精選!街坊都食嘅懷舊點心糕品+台灣人氣黑糖珍珠奶
旺角慢煮快食新體驗!6間中日泰美食登陸彌敦道 700號|北海道拉麵X清邁咖喱麵
地膽帶路!土瓜灣街頭小食 – 足料花膠魚肚粥 + 濃香米香腸粉
地膽推介!$150 掃盡 5大紅磡街頭小食 – 混醬班戟麵條 + 超大粒手製芋圓
死場不再!10間平民食肆進駐荃灣新 Food Court – 嫩滑手撕雞腸粉 x 醒胃麻辣串
粉色系呃 like 甜品團!食盡荃灣 3大潮食店 – 玫瑰士多啤梨窩夫 X 山形縣白桃厚班戟
大坑 2大呃 Like 甜品! 粉色棉花糖燒 x 彩虹沖繩鹽刨冰
5萬呎水產市場登陸黃埔!九號水產 4大食店率先睇 – 蟹痴必掃北海道皇帝蟹
旺角 1日 4餐,由朝食到晚!青檸烏冬係劣食?韓系日式吉列牛一定正?
銅鑼灣 SOGO 地庫重開!5大人氣日本過江龍進駐 必食香脆海鮮煎餅 + 鹿兒島彈牙魚餅
元朗 4大人氣食店!必食北海道布丁燒 X 啖啖肉無骨雞翼包
屯門潮食集中地!紅橋 4大不得不吃的小食+主菜+甜品

 

睇更多拍拖好去處!
FB page: 依莉“詩”生活
美食 IG: ErieDiary
打卡 IG:ErieDiaryhk
網址:ErieDiary.hk
YouTube:ErieDiary


About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。