【韓國必食】7間首爾燒鰻魚店推介！鰻魚放題 + 隱世小店 + 烤盲鰻

燒鰻魚好多時只會諗到去日本食，但原來韓國對燒鰻魚都好講究，唔單止係美食，更係養生保健嘅補品！就算同樣喺首爾食燒鰻魚，今次我依莉詩介紹嘅 7間燒鰻魚餐廳都有唔同食法，下次去首爾不妨一試呢！

▲ 韓國燒鰻魚嘅肉質札實，注重魚原有嘅鮮味，同日式燒鰻魚各有千秋。

1. 風川鰻魚 풍천장어

「風川鰻魚」外貌睇落可能平平無奇，但呢度嘅燒鰻魚非常有名！餐廳以家庭式風格佈置，仲由阿豬媽幫你燒好鰻魚，再切塊成一口大小，非常親切！燒鰻魚嘅大醬湯湯頭以鰻魚內臟悶製而成，一口鰻魚一口湯簡直係一場鰻魚盛宴！鰻魚用炭火慢烤，將鰻魚嘅油脂都鎖喺魚身，邊燒邊能聞到魚香，放進入口鰻魚嘅油香更充斥著口腔，絕對值得一試！

地址： Mapo-gu, Yeonnam-dong, Donggyo-ro, 27 39

2. 鰻魚思想 장어생각

談到首爾燒鰻魚，不得不提「鰻魚思想」呢間有首爾燒鰻魚同牛肉放題！餐廳拍攝過多個韓國電視台同韓國綜藝 Running Man 等節目，在當地人氣非常高。牛肉、鰻魚任食套餐中可以揀辛辣或原味鰻魚，仲提供鴨胸肉、拌飯﹑冷麵﹑蒸蛋同大醬湯等隨便食，自己想燒幾多，食幾多都自己話事！

地址： 1018-9 Mujeon-dong, Tongyeong-si, Gyeongsangnam-do

3. 故鄉風川鰻魚店 고향풍천장어

「故鄉風川鰻魚店」係一間只有該區地膽先知嘅隱世小店。餐廳嘅入口神秘，喺不起眼嘅內街，客人都係靠一傳十、十傳百嘅口碑帶來，可見有品質保證！店內食嘅係韓國國產鰻魚，即叫即抓，新鮮生猛。加上以鰻魚頭、魚骨同醬油熬製而成嘅自家秘醬，可見店主落足工夫。鹽燒同醬燒兩種煮法逼出鰻魚皮下肥美嘅油脂，令鰻魚內裡滑嫩、外皮香脆可口，散發出首爾燒鰻魚嘅魔力！

地址： 134 Supyo-ro, Nakwon-dong, Jongno-gu

4. 五百年鰻魚 오백년 장어

「五百年鰻魚」十分著重細節，上菜前會先送上一碗偏酸微甜嘅泡菜湯，令人食慾大增。之後店員會喺面前即席燒鰻魚。睇到鰻魚由微粉紅色變得焦脆金黃，簡頭流晒口水！鰻魚皮烤出一點微焦，帶來豐富嘅口感同啖啖油香，令人回味，難怪成為熱門燒鰻魚餐廳之一。

地址： 661-12 Deungchon-dong, Gangseo-gu

5. 梧桐島炭烤野生海鰻 싱싱오동도 산아나고 산꼼장어 숯불구이

「梧桐島炭烤野生海鰻」係鰻魚專門店，除咗主打嘅首爾燒鰻魚外，另有鰻魚刺身、涼拌生鰻魚片。作為韓國餐廳，店員當然會先送上滿桌開胃前菜，款式多樣，各類醃菜、泡菜飯饌、紫蘇葉同坊間少有嘅海鞘醬等數都數唔晒。只係前菜，已經好滿足，再來主菜燒鰻魚，真係食到超飽！

地址： 3-4 Seocho-daero, Bangbae-dong, Seocho-gu

6. 王子鰻魚 왕자장어

雖然「王子鰻魚」餐牌上選擇唔多，但店家就將功夫同心思都花喺食物上，包括鰻魚刺身、魚醬飯以及冬季限定嘅生蠔，當然不能錯過燒鰻魚啦！呢度嘅海鰻預先已切好一件件，配搭麻油、醋和泡菜包著紫蘇葉吃，尤其滋味。鍾意食辣嘅朋友仲可以放青陽辣椒、青蔥、蒜頭同洋蔥包住食。炸王子鰻魚骨都係店內必試嘅佐酒小食，香口脆卜卜，真係好食到食唔停！

地址： 35-4 Eonju-ro 164-gil, Sinsa-dong, Gangnam-gu