只睇不賣!? 玩具展、嬰兒用品展、文具展及國際授權展 6大亮點率先睇

每年 1月灣仔都會舉行四合一嘅巨型展覽。今年當然唔例外,由聽日開始,一連四日,玩具展、國際授權展、嬰兒用品展同文具展都會一次過開鑼。來自世界各地嘅玩具產品都會紛紛展出,對玩具迷嚟講可以話係大事件,可惜只供業內人士進場,進場參觀亦唔可以影相。我依莉詩今日就以 Blogger 身份係開展前率先為大家掀開神秘面紗!

1) Nanoblock 只睇不賣

細細粒嘅 nanoblock (1E-E26) 世界各地向來都有大量愛好者,現時亦推出了多達 800款套裝。今次展覽中,一面 nanoblock 牆氣勢何其壯觀,每一格都有一個已砌好嘅汽車、動物、地標、著名建築物、動漫卡通等作品,細緻可愛,一睇就愛不釋手。可惜…負責人表示展品就算都最後一日都唔會出售。

▲ 呢隻 15年 6月推出嘅初音由超過 230粒 nanoblock 砌成,要 ko 佢應該要好幾個鐘。
▲ 上年 Pokemon Go 咁 hit ,nanoblock 都出咗唔少小精靈,就連噴火龍同背背龍都有呢!

2) 近距離欣賞 1:6 超時空要塞戰機機艙

《超時空要塞》對動漫迷嚟講一定非常熟悉,天童玩具就嘗試將韋基利(VF-1J)戰鬥機艙以 1:6 大小重現眼前,精細嘅機艙設計有40 組LED 燈同呼吸燈,裏面仲有一個真正嘅 LCD 顯示屏,可以用 SD卡自行決定播放嘅影片。

▲ 呢隻韋基利(VF-1J)戰鬥機艙唔單止睇得,底座仲係藍牙 3.1 喇叭,非常實用。不過索價近萬元,價值不菲呢!

3) 絕版扭蛋排排企

除咗最新最潮嘅玩具,現場仲有多部扭蛋機,入面嘅都係絕版扭蛋,款款都好吸引呢!可惜全部機都已經鎖上,只可遠觀…

▲ 他媽哥池嘅扭蛋排排企,每隻都可愛。

 ▲ 想當年涼宮春日不知幾 hit,但依家變成咗絕版。唉~老了…

4) 玩具結合手機大趨勢

上年玩具展最多嘅就係結合手機嘅玩具同無人機,今年嘅技術變得更加成熟。就好似 AR Application Ltd. (1C-F24) 嘅智能卡,用手機 scan 之後會變出立體會郁嘅動畫,今年仲可以即時上色同用 VR 眼鏡睇添!相信實體玩具配合相關 Apps 嘅玩具仍然會係大趨勢。

▲ 用手機 scan 智能卡唔單止會變出立體動畫,仲可以放入 VR眼鏡睇添!

▲ 可以簡單編程嘅機械人亦係近年大熱玩具,上海智位(1C-F26) 嘅機器人設計到好似螞蟻,擁有擬神經元運動系統,可以做出仿生自主運動,從而同小朋友作出類似寵物嘅互動。

5) 世界各地卡通大集匯

玩具之外,卡通都係小朋友最愛,國際授權展就可以搵到超過 900個著名品牌同授權項目,唔單止有熟悉嘅 Sanrio Characters、多啦A夢、熊本熊等等,仲有好多世界各地嘅卡通人物呢!

▲ 一次過見到咁多卡通人物,當中有唔少明日之星架!

▲ 難得重遇一年前做過訪問嘅 Squly 同 負責人 Cyril ,梗係要同佢影番張相啦!

▲ 呵呵~我竟然高過 Mr. Tall!

6) 潮媽最愛 BB產品

一開始提及過有四個展覽,嬰兒用品展就展出咗多種智能家居同新設計嬰兒用品,潮媽見到一定瘋狂!

▲ Binatone Electronics International Ltd ( 3F-D04 ) 展出咗 Motorola 最新嘅嬰兒看護系列,父母不但可以透過 7″ Tablet 隨時觀察 BB 一舉一動,監視器仲會記錄 BB 睡眠模式,等父母了解 BB 嘅睡眠質素。

▲ 依家啲 B車夠晒多元化,呢款 Hybrid International Company Limited( 3G-A27 ) 嘅 egg 兒童手推車外型時尚,仲可以摺埋,方便收藏。

玩具展 x 嬰兒用品展 x 文具展 x 國際授權展
日期:  2017年 1月 9日 – 12日
時間:  上午 9時 30分 至 下午 6時 30分 (12日將於下午5時結束)
地點:  香港會議展覽中心Hall 1 & Hall 3


About 依莉詩

網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。