暗黑料理敢唔敢試?銀魂 Cafe 登陸荃灣沙嗲王

荃灣 Youme cafe 耐唔耐就會轉主題,繼幾個月前嘅小櫻 Cafe 之後,宜家就改成銀魂 Cafe。平時去主題餐廳就為打卡,今次就⋯⋯事關土方搞亂檔,話咩要加蛋黄醬先係注入靈魂嘅料理,結果⋯⋯啲食物個樣,我諗真係忠粉先會明!

紙板為主,影相位不算吸引

今次佈置以銀魂將軍暗殺篇為主題。一如以往,餐廳佈置都係以牆紙同紙板公仔為主,影相位唔算吸引,不過大部份銀魂嘅角色都有出現。而最特別係門口嘅銀時同神樂中間有副懸空嘅眼鏡,原來係存在感勁低嘅新八,唔留意都唔知呢!

▲ 大部份銀魂嘅角色都印係牆紙上呢!

▲ 電視上顯示住「糖分」,粉絲一定知邊個係糖分王啦!

▲ 廚房附近有 3個紙板公仔,土方用晒成支蛋黃醬呢!

有故事的暗黑料理

講到食物,今次真係玩很大,並唔係平時主題餐廳插支旗咁簡單,每一個餐都有故事,都係同銀魂入面嘅人同劇情有關,真係粉絲先會明。特別係妙的蛋包意粉真係要樣無樣,但就似足阿妙煮嘅暗黑理料。

▲ 宇治銀時 $48

呢碗紅豆係銀時嘅最愛,睇落咁澎湃,就知有幾甜,好彩唔係成碗都係,個底係係 Tiramisu 同抹茶蛋糕。不過都係好膩,應該要幾個人分一碗先得!

▲阿妙墨魚蛋包意粉 $78

呢碟黑忟忟咁恐佈嘅就係阿妙煮嘅墨魚蛋包意粉。雖然個樣係⋯⋯不過食落鹹鹹地,有菇係入面,配搭係怪啲,不過都食得落肚嘅。

▲ 伊莉莎白菠菜咖喱飯 $75

相比起前面兩個,呢碟伊莉莎白菠菜咖喱飯就可愛好多。菠菜汁混入微辣嘅咖喱,飯底有豬扒粒,感覺清新。

▲ 冲田 珍珠奶茶 (左) $32、伊莉莎白抹茶奶葢 (右) $40

冲田 珍珠奶茶無乜驚喜,而伊莉莎白抹茶奶葢上面奶葢好豐厚,加埋個厚唇就滿分。

粉絲必買銀魂精品

要滿足動漫迷,單單食又點夠,餐廳一個角落售賣唔少銀魂精品,以細細件嘅文具以主,好容易就會買好多。

▲ 每點一款食物或飲品,都有一次抽杯墊機會,唔少人都為咗儲齊一套 13款,一個人飲幾杯嘢飲呢!

▲ 呢啲細細個嘅期間限定牌仔,唔少粉絲都買齊一套呢!

▲ 手機繩都好受歡迎㗎!(不過宜家仲有人用手機繩㗎咩?)

銀魂 x Youme cafe

地址:香港荃灣眾安街2-8號沙嗲王3樓
日期: 2017年 3月 15日 至 4 月 27日


About 依莉詩
網媒出身嘅 90後,抱住「試咗先講」嘅精神。終日飲飲食食、遊走各大商場、小店尋找好去處。