一年一度美食墟市青衣戲棚又來了！胃食嘅 依莉詩 已經第三年過嚟試新嘢！今年新派小食多咗！物價亦高咗～下晝去唔洗點排隊！鐘意搞街嘅點都要試下嘅～
▲ 哈哈笑蜜糖疏乎 Pancake $25
講到近期大熱甜品一定非梳乎 Pancake 莫屬，不過去 cafe 食最少 $70起跳，要比咁多錢食空氣，唔少男士都覺得晒氣。估唔到戲棚都有梳乎 pancake 食，貴旺角白布街少少，一塊 $25 ，上面有哈哈笑圖案同一支自己擠嘅蜜糖，外貌同鬆軟口感絕不輸蝕。
▲ 有得食有得玩流水麵 $30 (2玩2食)
有得食又有得玩，(雖然係幾無聊) ，不過小朋友可以學下點揸筷子啊！至於麵嘅味道呢～都滑嘅，但就無乜味。
▲食嘅麵同玩嘅麵分開，唔怕衛生問題。
▲ 好有氣蝶豆花奶樽 $30
近期大熱蝶豆花飲品，呢度都有好幾檔賣，不過呢個用奶樽裝嘅就夠晒特別，入面加咗乾冰，飲嘅時間啲氣谷晒上嚟。終於明白咩叫出盡飲奶嘅力。
▲ 暗黑臭豆腐 $25
臭豆腐本身已經生人勿近，仲要整到黑忟忟，真係知音人先明白。佢加咗醬汁，無平時食開咁乾，不過食開濃味嘅我，無咗甜醬好似少淡咗啲。
▲ 整形長條章魚燒 $25
邊個話章魚燒一定係一粒粒波，長形你又試過未？呢條長長嘅棒有齊章魚燒要有嘅材料同味道，真係估你唔到。
▲ 有內餡雞翅包飯 $30
有幾檔都有雞翅包飯，眼見呢檔好似最肥最大隻。入面啲飯都好惹味！
▲傳統蟹蓋八寶飯 $20
掃街大忌叫白飯，但我就被個蟹蓋吸引咗去買。結果未就係好快好後悔囉！雖然飯係香嘅，仲有少少蟹黃，不過就好飽肚。
▲ 霧煙芋圓 $25
芋圓加咗乾冰，霧住煙好勁咁！入面粒提子夠晒凍呢！
青衣戲棚
日期：2017年 4月8日至12日
時間：下午 2點 30開始 至 深夜
地址：青衣青綠街球場
更多小食推介！
睇更多拍拖好去處！
FB： 依莉“詩”生活
